Myeelwe 29
Zipaizyo zyapobwe lyamyeembo
1 Lino mubuzuba butaanzi bwamwezi waciloba muswaangane mbuli mbungano iisalala mutakabeleki pe. Mbuzuba bwakulizya myeembo. 2 Amupe cipaizyo cakutenta cakapoho, amugutu, atubelele tuli ciloba twamwaka omwe, zyoonse eezi kazitakwe kampenda, zibe bweema bubotelezya ku Mwami Leza. 3 Antoomwe akapoho mupe cituuzyo camaila abusu buzula ntumba, bukandidwe amafuta. Amugutu ape katumba. 4 Akabelele komwe-komwe ape nsangwa. 5 Antoomwe azipaizyo eezi apaizye asijembwe wakukombelezezya zinyonyoono zyanu. 6 Atala azipaizyo eezi, mupe zipaizyo zyamwezi amwezi, zyakutenta, zyamaila azyazyakunywa kweendelana amweelwe uubikkidwe, zibe bweema bubotelezya ku Mwami Leza.
Zipaizyo zyakukombelezezya zinyonyoono
7 Lino mubuzuba bwakkumi bwamwezi waciloba mukaswaangane, mukaliimye kulya alimwi mutakabeleki pe. 8 Amupe cipaizyo cibotelezya ku Mwami Leza cakapoho komwe, amugutu omwe atubelele tuli ciloba twamwaka omwe tutakwe kampenda. 9 Akapoho komwe-komwe ape cituuzyo camaila abusu buzula ntumba bukandidwe amafuta, amugutu ape katumba. 10 Akabelele komwe-komwe ape nsangwa. 11 Antoomwe azipaizyo eezi apaizye asijembwe omwe, wakugwisya zinyonyoono atala asijembwe uulya ape zituuzyo zyabuzuba abuzuba zili nzyamaila azyazyakunywa, zibe bweema bubotelezya ku Mwami Leza.
Zipaizyo zyamapobwe azivuka
12 Lino mubuzuba bwakkumi aasanu mumwezi waciloba mukaswaangane, mukabambe pobwe eeli mukulemeka Mwami Leza. Mutakabeleki kwamazuba aali ciloba. 13 Akupaizigwe cipaizyo cibotelezya ku Mwami Leza, catupoho tuli kkumi atutatu, bagutu bobilo, atubelele tuli kkumi atune twamwaka omwe tutakwe kampenda. 14 Akapoho komwe-komwe kupegwe cituuzyo camaila abusu buzula ntumba bukandidwe amafuta, akagutu komwe-komwe kupegwe katumba. 15 Akabelele komwe-komwe kupegwe nsangwa. 16 Antoomwe azipaizyo eezi kupaizigwe sijembwe wakugwisya zinyonyoono atala aasijembwe uulya kupegwe azituuzyo zyabuzuba abuzuba zili nzyamaila azyazyakunywa.
17 Lino mubuzuba bwabili, kupegwe tupoho tuli kkumi tugutu tobilo, atubelele tuli kkumi twamwaka omwe tutakwe kampenda. 18 Antoomwe akapoho, tugutu atubelele kupegwe azituuzyo zyamaila azyazyakunywa mukweendelana amweelwe uubikkidwe. 19 Kupaizigwe sijembwe wakugwisya zinyonyoono atala aazipaizyo zyabuzuba abuzuba zyakutenta azyazyakunywa.
20 Lino mubuzuba bwatatu kupaizigwe tupoho tuli ciloba, tugutu tobilo, atubelele tuli kkumi atune twamwaka omwe tutakwe kampenda. 21 Mupaizye sijembwe wakugwisya zinyonyoono atala azipaizyo zyabuzuba abuzuba azipaizyo zyakutenta azyazyakunywa, 22 antoomwe azipaizyo eezi kupaizigwe sijembwe omwe wakugwisya zinyonyoono atala asijembwe uulya kupaizigwe zituuzyo zyabuzuba abuzuba zili nzyamaila azyazyakunywa.
23 Lino mubuzuba bwane, kupaizigwe tupoho tuli kkumi, abagutu bobilo atubelele tuli kkumi atune twamwaka omwe tutakwe kampenda. 24 Aaba bapoho, bagutu, atubelele bapaizigwe azituuzyo zyamaila azyazyakunywa kweendelana amweelwe uubikkidwe. 25 Mupaizye sijembwe omwe wakugwisya zinyonyoono atala aazipaizyo zyabuzuba abuzuba, azipaizyo zyakutenta azyazyakunywa.
26 Lino mubuzuba bwasanu, kupaizigwe bapoho bali fuka, abagutu bobilo atubelele tuli kkumi atune, twamwaka omwe tutakwe kampenda. 27 Abapoho, bagutu, atubelele kupaizigwe zituuzyo zyamaila azyazyakunywa kweendelana amweelwe uubikkidwe, 28 mupaizye sijembwe omwe wakugwisya zinyonyoono atala aazipaizyo zyabuzuba abuzuba, azipaizyo zyakutenta azyazyakunywa.
29 Lino mubuzuba bwacisambomwe, kupaizigwe bapoho bali lusele abagutu bobilo, atubelele tuli kkumi atune twamwaka omwe tutakwe kampenda. 30 Abapoho, bagutu, atubelele kupaizigwe zituuzyo zyamaila azyazyakunywa kweendelana amweelwe uubikkidwe, 31 kupaizigwe sijembwe omwe wakugwisya zinyonyoono atala aazipaizyo zyabuzuba abuzuba azipaizyo zyakutenta azyazyakunywa.
32 Lino mubuzuba bwaciloba, kupaizigwe bapoho bali ciloba bagutu bobilo, atubelele tuli kkumi atune, twamwaka omwe tutakwe kampenda. 33 Abapoho, bagutu, atubelele kupaizigwe zituuzyo zyamaila azyazyakunywa kweendelana amweelwe uubikkidwe, 34 kupaizigwe asijembwe wakugwisya zinyonyoono atala aazipaizyo zyabuzuba abuzuba azipaizyo zitentwa azyazyakunywa.
35 Lino mubuzuba bwalusele, mukaswaangane, mutakabeleki pe. 36 Kupaizigwe cipaizyo cakutenta ku Mwami Leza kuti cibe bweema bubotelezya, kapoho komwe, mugutu omwe, tubelele tuli ciloba tutakwe kampenda. 37 Abapoho, bagutu, atubelele kupaizigwe zituuzyo zyamaila azyazyakunywa kweendelana amweelwe uubikkidwe, 38 kupaizigwe asijembwe wakugwisya zinyonyoono atala aazipaizyo zyabuzuba abuzuba zyakutenta azyazyakunywa. 39 Aaya ngamalailile aajatikizya zyazipaizyo zyakutenta, zituuzyo zyamaila, azyazyakunywa antoomwe azipaizyo zyalumvwano nzyomupa ku Mwami Leza muziindi zyeelede. Eezi nzyaatala aazipaizigwa mukuzuzikizya cikonke naa kuliyandila. 40 Aboobo Mozesi wakaambila Baisilayeli zyoonse Mwami Leza nzyaakamulailila.