Myeelwe 26
Kubalwa kwabili kwa Baisilayeli
1 Lino nicakamana cuumo, Mwami Leza wakaambila Mozesi a Eliyazaa mwana wa Aloni kuti, 2 “Amubale baalumi ba Isilayeli mumikwasyi yabo, kutalikila kuli baabo bali aamyaka iili makumi obilo akwiindilila aabo bakonzya kuya kunkondo.” 3 Eelyo Mozesi a Eliyazaa bakaambila bantu mumabanda aa Mowabu mutala lyamulonga wa Jolodani kulangana a Jeliko bati, 4 “Amubale baalumi boonse, kutalikila kuli bali aamyaka iili makumi obilo akwiindilila mbubonya mbuli Mwami Leza mbwaakalailila Mozesi.”
Lino mbaaba Baisilayeli bakazwa munyika ya Ijipiti. 5 Balunyungu lwa Lubeni, mwana wakusaanguna wa Isilayeli, bakabalwa muziinga zya Hanoki, Palu, 6 Heziloni a Kaami. 7 Eeci nceciinga ca Lubeni, mweelwe wabo wakali zyuulu zili makumi one azitatu amyaanda iili ciloba amakumi otatwe. 8 Mwanaa wa Palu wakali Eliyabu. 9 Bana ba Eliyabu bakali ba: Nemuweli, Datani a Abilamu. Datani a Abilamu mbabakali balupati-pati babuleya bakazangila Mozesi a Aloni, alimwi bakali a Kola ciindi nibakazangila Mwami Leza. 10 Eliya niyakabamena nyika, antoomwe a Kola wakali aabaccilili bakali myaanda yobilo amakumi osanwe bakafwa mumulilo. Mbambabo aaba bakaba cicenjezyo kubantu. 11 Pele balunyungu lwa Kola taakwe nibakamaninina pe.
12 Lino balunyungu lwa Simiyoni bakabalwa muziinga zya Nemuweli, Jamini, Jakini, 13 Zela a Syauli. 14 Eeci nceciinga ca Simiyoni, mweelwe wabo wakali zyuulu zili makumi obilo azibili amyaanda yobilo.
15 Lino balunyungu lwa Gadi bakabalwa muziinga zya Zefoni, Hagi, Syuni, 16 Ozini, Eli, 17 Alodi, a Aleli. 18 Eeci nceciinga ca Gadi, mweelwe wabo wakali zyuulu zili makumi one amyaanda yosanwe.
19 Lino Ee a Onani bakali bana ba Juda bakafwida munyika ya Kenani.
20 Lino balunyungu lwa Juda bakabalwa muziinga zya Syela, Pelezi a Zela. 21 Balunyungu lwa Pelezi bakabalwa muziinga zya Heziloni a Hamuli. 22 Eeci nceciinga ca Juda, mweelwe wabo wakali zyuulu zili makumi aali ciloba acisambomwe amyaanda yosanwe.
23 Lino balunyungu lwa Isakaa bakabalwa muziinga zya Tola, Puwa, 24 Jasyubu a Syimuloni. 25 Eeci nceciinga ca Isakaa, mweelwe wabo wakali zyuulu zili makumi aali cisambomwe azine amyaanda yotatwe.
26 Lino balunyungu lwa Zebuluni bakabalwa muziinga zya Seledi, Eloni a Jaleeli. 27 Eeci nceciinga ca Zebuluni, mweelwe wabo wakali zyuulu zili cisambomwe amyaanda yosanwe.
28 Lino balunyungu lwa Josefa bakabalwa muziinga zya Manase a Efulemu. 29 Balunyungu lwa Manase bakabalwa muziinga zya Makii, wakali wisi Giliyadi, a Giliyadi. 30 Balunyungu lwa Giliyadi bakabalwa muziinga zya Heleki, 31 Asiliyeli, Syekemu, 32 Syemida, a Hefee. 33 Nkabela Zelofehadi mwanaa Hefee katakwe bana balombe, pele wakajisi basimbi, mazina aabo ngaaya, Mala, Nowa, Hogila, Milika, a Tiliza. 34 Eeci nceciinga ca Manase, mweelwe wabo wakali zyuulu zili makumi osanwe azibili amyaanda iili ciloba.
35 Lino balunyungu lwa Efulemu bakabalwa muziinga zya Syutela, Beka, a Tahani. 36 Balunyungu lwa Syutela bakabalwa muciinga ca Elani. 37 Eeci nceciinga ca Efulemu, mweelwe wabo wakali zyuulu zili makumi otatwe azibili amyaanda yosanwe. Eeci nceciinga ca Josefa mumikwasyi yabo.
38 Lino balunyungu lwa Benjamini bakabalwa muziinga zya Bela, Asyibeli, Ahilamu, 39 Syufamu, a Hufamu. 40 Balunyungu lwa Bela bakabalwa muziinga zya Aadi a Naamani. 41 Eeci nceciinga ca Benjamini, mweelwe wabo wakali zyuulu zili makumi one azisanu amyaanda iili cisambomwe.
42 Lino balunyungu lwa Dani bakabalwa muciinga ca Syuhamu. 43 Eeci nceciinga ca Dani, mweelwe wabo wakali zyuulu zili makumi aali cisambomwe azine amyaanda yone.
44 Lino balunyungu lwa Asyee bakabalwa muziinga zya Imuna, Isyivi, Beliya, 45 Hebee, a Malikeyeli bakali baciinga ca Beliya. 46 Asyee wakajisi mwana musimbi uutegwa Sela. 47 Eeci nceciinga ca Asyee, mweelwe wabo wakali zyuulu zili makumi osanwe azitatu amyaanda yone.
48 Lino balunyungu lwa Nafutali bakabalwa muziinga zya Jazeli, Guni, 49 Jazee, a Syilemu. 50 Eeci nceciinga ca Nafutali, mweelwe wabo wakali zyuulu zili makumi one azisanu amyaanda yone. 51 Lino mweelwe woonse wa Baisilayeli baalumi wakali zyuulu zili myaanda iili cisambomwe acimwi amyaanda iili ciloba amakumi otatwe.
52 Lino Mwami Leza wakaambila Mozesi kuti, 53 “Uyoopambaula nyika akati kamisyobo yabantu mbubonya mbuli kuvula kwabo.” 54 Musyobo uuli aabantu banji uyoopegwa cisi cipati, musyobo uuli aabantu bace uyoopegwa cisi ciniini, musyobo umwi aumwi uyooabilwa mbubonya mbuli mweelwe wabo. 55 Pele nyika ileelede kupambaulwa kwiindila mukuuma cisolo. Cisi coonse ciyooitwa azina lyasikale wamusyobo wabo.
56 Mbombuboobu mbomuyoobaabila lukono lwabo kwiindila mukuuma cisolo, banji bakatole lunji, bace bakatole luce.
57 Lino balunyungu lwa Levi bakabalwa muziinga zya Gesyoni, Kohati a Melali. 58 Njeeyi mikwasyi ya Balevi, Libini, Hebuloni, Mali, Musyi, a Kola. Kohati nguwakazyala Amulamu 59 wakakwete Jokibedi wamukowa wakwe wakazyalilwa mu Ijipiti. Mukaintu ooyu wakazyala bana balombe bobilo, Aloni a Mozesi amucizi wabo Miliyamu. 60 Aloni wakazyala bana balombe bone, Nadabu, Abihu, Eliyazaa, a Itamaa. 61 Pele Nadabu a Abihu bakafwa nibakapaizya catakazumizigwa a Mwami Leza. 62 Balevi balombe kutalikila kuli uuli a amwezi omwe wakuzyalwa bakali zyuulu zili makumi obilo azitatu.
Aaba tiibakabalilizigwa antoomwe a Baisilayelinyina pe, nkaambo taakwe nibakapegwa lukono munyika ya Isilayeli.
63 Aaba mbabakabalwa a Mozesi a Eliyazaa mupaizi mumabanda aa Mowabu mutala lyamulonga wa Jolodani kuzwa ku Jeliko. 64 Taakwe umwi wabaaba wakabalidwe a Mozesi a Aloni kunkanda ya Sinai. 65 Nkaambo Mwami Leza wakaamba kuti boonse balafwida munkanda. Ncobeni boonse bakafwa, kuleka buyo Kalebi mwanaa Jefune a Josyuwa mwanaa Nuni.