Myeelwe 22
1 Lino Baisilayeli bakalongela kumabanda aa Mowabu, mutala lyamulonga wa Jolodani, kulangana a Jeliko.
Mwami waku Mowabu mbwaakaita Balaamu
2 Lino mwami Balaki mwanaa Zipoo naakamvwa eezyo zyoonse Baisilayeli nzibakacita ku Baamoli, 3 walo abantu bakwe baku Mowabu bakakankamana nkaambo Baisilayeli bakali banji kapati. Masimpe Bamowabu bakayoowa akaambo ka Baisilayeli. 4 Aawo Bamowabu bakaambila basololi ba Bamidiyani bakati, “Aaya makamu azookwangulwida limwi zyoonse mbubonya mbuli musune mbwasyukutula bwizu.” Mpaawo mwami Balaki mwanaa Zipoo, 5 wakatuma bantu kuyooambila Balaamu mwanaa Beyo, wakali kukkala ku Petoo kufwiifwi amulonga munyika yokwabo. Bakati, “Bantu bakazwa ku Ijipiti bazoondikkalila, mbanji kapati.
6 “Uboole, uzoondisinganyizizye bantu aaba, nkaambo mbaasinguzu kutwiinda. Ambweni tuzookonzya kubazunda akubatanda munyika eeyi, nkaambo ndilizi kuti kufumbwa ngoleleka ulalelekwa, kufumbwa ngosinganya, ulasinganyizigwa.”
7 Lino basololi ba Bamowabu aba Bamidiyani bakatolelela mali aakusondya kuli Balaamu akumwaambila makani aakazwa kuli Balaki. 8 Amvwe boobo Balaamu wakati, “Amulale juunza ndizoomwaambila eeco Mwami Leza ncatilailile.” Nkaako aaba basololi ba Bamowabu bakakkala.
9 Lino Leza wakasika kuli Balaamu, wakamubuzya kuti, “Mbaani baalumi aaba mboli aabo?”
10 Balaamu wakati, “Balaki mwanaa Zipoo waku Mowabu wanditumina mulomo wakuti, 11 ‘Bantu bakazwa ku Ijipiti bazuzya nyika yoonse, uboole, uzoondisinganyizizye. Ambweni tuzookonzya kubazunda akubatanda munyika.’”
12 Lino Mwami Leza wakaambila Balaamu kuti, “Utainki pe. Toelede kubasinganya bantu aabo, nkaambo balilelekedwe.”
13 Lino nibwakaca, Balaamu wakabuka wainka kubasololi ba Balaki, wabaambila kuti, “Amubweede kucisi canu, Mwami Leza wandikasya kuunka andinywe. 14 Mpawo basololi baku Mowabu nibakaambilwa oobo bakajokela kuli Balaki, baakumwaambila kuti Balaamu wakaka kuboola andiswe.”
15 Alimwi Balaki wakatuma bambi basololi banji balemenede kwiinda aabo bakusaanguna. 16 Bakaya kuli Balaamu akuti, “Mboobu mbwaamba Balaki mwanaa Zipoo, ‘Akaka kutabi cintu cikukasya kuboola kulindime, 17 nkaambo nzookulumbula cibotelezya kufumbwa ncoyanda. Ndakomba koboola uzoondisinganyizizye bantu aaba.’”
18 Balaamu wakaingula kuti, “Nikuba kuti Balaki wandipa nsiliva yoonse angolida zyaŋanda zyakwe, nsikonzyi kusotoka malailile aa Mwami Leza wangu naaceya. 19 Amulale bwakacita bamwi baya. Ndiyanda kuziba naa Leza ujisi acimwi cakundaambila.”
20 Lino masiku aayo Leza wakasika kuli Balaamu, akumwaambila kuti, “Nkaambo kakuti bantu aaba basika kuzookwiita, koya ambabo, pele ucite buyo nceti kwaambile.”
Zya Balaamu a mbongolo yakwe
21 Nibwakaca Balaamu wakatanta mbongolo yakwe, akuunka abasololi ba Bamowabu. 22 Pele Leza wakanyema kapati nkaambo Balaamu wakazumina kuunka, nkaako mungelo wa Mwami Leza wakaima munzila akumujalila. Balaamu wakalitantide ambongolo yakwe kasindikilwa ababelesi bobilo. 23 Lino mbongolo niyakabona mungelo wa Mwami Leza kaimvwi munzila, kajisi apanga lisomwedwe mujanza lyakwe, mbongolo yakaleya mumugwagwa akunjila mumuunda. Mpawo Balaamu wakauma mbongolo kuti injile mumugwagwa.
24 Mungelo wa Mwami Leza wakaima mukazila akati kamyuunda yamisaansa kajisi bwaanda koonse-koonse. 25 Nkabela mbongolo niyakabona mungelo ooyo yakalisyaanikizya kubwaanda akusyanikizya kuulu kwa Balaamu. Alimwi Balaamu wakaiuma.
26 Kumane mungelo wa Mwami Leza wakaya kumbele akuyooima abusena busyanikide cakuti kwakabula abusena bwakwiinda. 27 Lino ciindi eeco mbongolo niyakabona mungelo ooyo, yakalala ansi. Nkabela Balaamu wakanyema wakatalika kuuma mbongolo amusako. 28 Mpoonya Mwami Leza wakabbamuna mulomo wambongolo kuti yaambaula, nkabela yakaambila Balaamu kuti, “Ino ndakucita nzi ncoonduumina ziindi eezi zyotatwe?”
29 Lino Balaamu wakaambila mbongolo kuti, “Nkaambo wandifubaazya, nindalijisi panga nindakujaya.”
30 Ayalo mbongolo yakati, “Sena mebo nsili mbongolo yako njotanta lyoonse kusikila sunu? Sena kulinindakacicitide eeci alimwi?”
Balaamu wakaingula kuti, “Peepe.”
31 Mpoonya aawo Mwami Leza wakajalula meso aa Balaamu, mpawo wakabona mungelo wa Mwami Leza kaimvwi munzila apanga lyakwe lisomwedwe, nkabela Balaamu wakakotama wawida ansi.
32 Mungelo wa Mwami Leza wakamubuzya kuti, “Nkaambo nzi ncoouma mbongolo yako ziindi zyotatwe eezi? Mebo ndasika kuzookujalila nzila, nkaambo toelede kuya mulweendo oolu pe. 33 Mbongolo yako yandibona yaleya ziindi eezi zyotatwe. Niyataleya, nindakujaya, yalo nkeileka.”
34 Lino Balaamu wakaambila mungelo kuti, “Ndabisya. Teendazi kuti uliimvwi munzila kundikasya pe. Lino kuti kacitakubotelede, ndilapiluka kumunzi.”
35 Pele mungelo wa Mwami Leza wakaamba kuti, “Koya abantu aaba, ukakanane buyo makani ngetikwaambile.” Nkaako Balaamu wakeenda abantu ba Balaki.
Balaki mbwaakacingauzya Balaamu
36 Lino Balaki naakamvwa kuti Balaamu ulaza, wakainka kukumucinga kumunzi wakumunyinza wa Anoni kugolela cisi cakwe. 37 Eelyo Balaki wakaambila Balaamu kuti, “Sena nsikatumine mulomo? Nkaambo nzi ncookasika kufwambaana? Sena wakayeeya kuti nsikonzyi kukupa bulumbu?”
38 Mpawo Balaamu wakaingula kuti, “Mbubo ndasika lino! Pele tandikonzyi kwaamba kufumbwa cintu, ccita buyo Leza ncaandaambila.”
39 Mpawo Balaamu wakaya a Balaki ku Kiliyati huzotu. 40 Mpoonya Balaki wakapaizya basune ambelele akupa zimwi kuli Balaamu abasololi mbaakaza aabo.
Kusinsima kutaanzi kwa Balaamu
41 Lino nibwakaca Balaki wakatola Balaamu ku Bamoti baali. Kuzwa kooko Balaamu wakali kukonzya kubona Baisilayeli.