Myeelwe 2
Misyobo mbuyakabambwa muzivuka zyayo
1 Lino Mwami Leza wakalailila Mozesi a Aloni kuti, 2 “Baisilayeli baakuyaka zivuka zyabo, muntu umwi aumwi akabe kumukowa wakwe, ooko kuli ndembela yawo. Bayake cakulanzya kutente lyakuswaanganina kabalizingulukide. 3 Batiyakile nkolili kujwe mbamukowa wa Juda. Bayooyaka muli lwabo kundembela yabo. Mupati wabo ngu Nasyoni, mwana wa Aminadabu. 4 Bantu aabo nibakabalwa bakali zyuulu zili makumi aali ciloba azine amyaanda iili cisambomwe. 5 Kuzwa kwakayaka mukowa wa Isakaa. Mupati wamukowa wa Isakaa ngu Netaneli mwanaa Zuwaa. 6 Bantu aabo nibakabalwa bakali zyuulu zili makumi osanwe azine amyaanda yone. 7 Kuzwa waawo kwakayaka mukowa wa Zebuluni. Mupati wabo ngu Eliyabu mwanaa Heloni. 8 Bantu aabo nibakabalwa bakali zyuulu zili makumi osanwe aciloba amyaanda yone. 9 Aboobo bakayaka kubbazu lya Juda bakalizyuulu zili mwaanda amakumi aali lusele acisambomwe amyaanda yone. Aabo mbabanoosaanguna kwalongwa.
10 “Lino kulubazu lwakumusanza kunooli bamukowa wa Lubeni andembela yabo. Mupati wabo ngu Elizuu mwanaa Syedeyuu. 11 Bantu aaba nibakabalwa bakali zyuulu zili makumi one acisambomwe amyaanda yosanwe. 12 Kuzwa waawo kwakayaka mukowa wa Simiyoni. Mupati wabo ngu Syelumiyeli mwanaa Zulisyadayi. 13 Bantu aaba nibakabalwa bakali zyuulu zili makumi osanwe afuka amyaanda yotatwe. 14 Kuzwa waawo kwakayaka mukowa wa Gadi. Mupati wabo ngu Eluyasafu mwanaa Dyuweli. 15 Bantu aabo nibakabalwa bakali zyuulu zili makumi one azisanu amyaanda iili cisambomwe. 16 Aboobo bakayaka kubbazu lya Lubeni, bakali zyuulu zili mwaanda amakumi osanwe acimwi amyaanda yone amakumi osanwe. Aabo mbabanooli babili kwalongwa.
17 “Lino batobela mbunga zyobilo eezi mbamukowa wa Levi nkaambo zivuka zyabo nzezili akati kamikowa yosanwe. Balo mbabanoobweza tente. Nkabela bantu bayoonyamuka mbubonya mbuli mbubayakide zivuka zyabo, kumbali aandembela yabo.
18 “Lino kulubazu lwakumbo, kunooli bamukowa wa Efulemu andembela yabo. Mupati wabo ngu Elisyama mwana wa Amihudi. 19 Bantu aabo nibakabalwa bakali zyuulu zili makumi one amyaanda yosanwe. 20 Kuzwa waawo kwakayaka mukowa wa Manase. Mupati wabo ngu Gamaliyeli mwanaa Pedazuu. 21 Bantu aabo nibakabalwa bakali zyuulu zili makumi otatwe azibili amyaanda yobilo. 22 Kuzwa waawo kwakayaka mukowa wa Benjamini. Mupati wabo ngu Abidani mwanaa Gideyoni. 23 Bantu aabo nibakabalwa bakali zyuulu zili makumi otatwe azisanu amyaanda yone. 24 Aboobo bakayaka kubbazu lya Efulemu bakali zyuulu zili mwaanda alusele amwaanda omwe. Aabo mbabanooli batatu kwalongwa. 25 Lino kulubazu lwakunyika kunooli bamukowa wa Dani andembela yabo. Mupati wabo ngu Ahiyeza mwana wa Amisyadayi. 26 Bantu aabo nibakabalwa, bakali zyuulu zili makumi aali cisambomwe azibili amyaanda iili ciloba. 27 Kuzwa waawo kwakayaka mukowa wa Asya. Mupati wabo ngu Pagiyeli mwana wa Okulani. 28 Bantu aabo nibakabalwa bakali zyuulu zili makumi one acimwi amyaanda yosanwe. 29 Kuzwa waawo kwakayaka mukowa wa Nafutali. Mupati wabo ngu Ahila mwana wa Enani. 30 Bantu aabo nibakabalwa bakali zyuulu zili makumi aali lusele amyaanda yone. 31 Aboobo bakayaka kubbazu lya Dani bakali zyuulu zili mwaanda amakumi osanwe aciloba amyaanda iili cisambomwe. Aaba mbabanoosyaalizya kwalongwa.”
32 Lino mweelwe wabantu boonse wa Baisilayeli bakalembwa mumikowa yabo wakali zyuulu zili myaanda iili cisambomwe azitatu amyaanda yosanwe amakumi osanwe. 33 Pele mbubonya mbuli Mwami Leza mbwaakalailila Mozesi, Balevi tiibakalembwa akubalilizigwa a Baisilayelinyina bamwi pe.
34 Mbombuboobu Baisilayeli mbubakacita zyoonse mbubonya mbuli Mwami Leza mbwaakalailila Mozesi. Bakakkala muzivuka zyabo umwi aumwi kwakali ndembela yamukowa wakwe, alimwi nibakeenda bakanyamuka mumikowa yabo mbubonya mbuli mbubakalaililwa.