Myeelwe 19

Itwe lyaŋombe iisalala pyu

¹ Lino Mwami Leza wakalailila Mozesi a Aloni kuti, ² “Bape Baisilayeli mulawo ooyu wakuti balete ŋombe iisalala pyu iitakwe kampenda alimwi iitanapopedwe. ³ Nkabela mwiipe kuli Eliyazaa mupaizi, kwamana itolwe kunze lyazivuka ijaigwe kalangilila. ⁴ Ndendilyo Eliyazaa nayoonjizya munwe mubulowa akusansaila ziindi zili ciloba kumbele lyatente lyakuswaanganina. ⁵ Kwamana ŋombe eeyo yuumpwe kalangilila, ŋombe yoonse, nyama, cikutu, bulowa, abufumba. ⁶ Mpawo abweze nkuni zyamulombe ansinsa yakatabi kahisopo akatali kasalala pyu, aziwaale mumulilo uutenta ŋombe eeyo. ⁷ Aakumana kucita boobo, akasanzye zisani zyakwe nkabela akulitila maanzi. Ndendilyo nayookonzya kunjila kuzivuka, pele unoocisofweede kusikila kumangolezya. ⁸ Awalo muntu ooyo watenta ŋombe uleelede kusanzya zisani zyakwe, akusamba amubili, nikuba boobo unoocisofweede kusikila kumangolezya. ⁹ Mwaalumi uusalala mumulawo nguuyooyola twe lyaŋombe eeyo alisowele mubusena busalala anze lyazivuka. Ooko nkoliyoobambwa akubelesegwa a Baisilayeli mumaanzi aakusalazya kugwisya zinyonyoono. ¹⁰ Ooyu muntu uuyola twe uleelede kusanzya zisani zyakwe, pele nikuba boobo unoocisofweede kusikila kumangolezya. Mulawo ooyu ulajatikizya Baisilayeli abamasi bakkala akati kabo.

Kuguma mutumba

¹¹ “Kufumbwa muntu uuguma mutumba ulasofwaala kwamazuba aali ciloba. ¹² Muntu ooyo uleelede kulisalazya amaanzi aasalazya aayo mubuzuba bwatatu amubuzuba bwaciloba. Kuti naa wacita oobo inga wasalala, pele kuti taciti oobo mubuzuba bwatatu naa bwaciloba, taakwe nayoosalala limbi. ¹³ Kufumbwa muntu uuguma mutumba akutalisalazya amaanzi aakusalazya ulisofweede. Ulakonzya kusofwaazya tente lya Mwami Leza, nkaako uyoogwisigwa ku Baisilayelinyina, eelyo busofwaazi bwakwe bulamukkalilila.

¹⁴ “Kwaamba zyamuntu uufwide mutente, kufumbwa muntu uunjila naa uuli mutente eelyo uyoosofwaala kwamazuba aali ciloba. ¹⁵ Alimwi cibiya cili buti citavunikidwe, cilasofwaala. ¹⁶ Ncintu comwe akuti naa muntu wajaigwa apanga nikuba kufwa lufuŋanda anze, alimwi kufumbwa waguma zifuwa zyamuntu niciba cuumbwe ulasofwaala kwamazuba aali ciloba.

¹⁷ “Lino mukusalazya busofwaazi bwamuntu, batile twe lyacipaizyo caŋombe iisalala pyu mucibiya, bamana batile maanzi mabotu. ¹⁸ Eelyo umwi muntu uusalala mumulawo abweze nsinsa ya hisopo, anyike mumaanzi aayo akusansaila atente azintu zyoonse zili mumo kubikkilizya abantu. Mbubonya buyo akuli yooyo wakaguma cifuwa naa mutumba wayooyo wakajaigwa naa kufwa lufuŋanda niciba cuumbwe. ¹⁹ Nkabela mubuzuba bwatatu abwaciloba muntu ooyo uusalala mumulawo akasansaile maanzi aayo amuntu ooyo alimwi, mubuzuba bwaciloba amusalazye. Walo ooyu wasalazigwa asanzye zisani zyakwe akusamba amubili, eelyo mangolezya aayo ngoonya ulasalala.

²⁰ “Kufumbwa muntu uusofweede watalisalazya, ulagwisigwa mumbungano. Wasofwaazya busena busalala bwa Mwami Leza nkaambo kakuti maanzi aakusalazya taatilwa amubili wakwe. ²¹ Nkabela mulawo ooyu unooli walyoonse. Awalo muntu uusansaila maanzi aasalazya uleelede kusanzya zisani zyakwe. Kufumbwa uuguma maanzi aakusalazya unoosofweede kusikila kumangolezya. ²² Kufumbwa ncaaguma uutasalali acalo cilasofwaala, eelyo uuciguma eeco ulasofwaala kusikila kumangolezya.”