Myeelwe 16
Zyabuzangi bwa Kola, Datani a Abilamu
1 Lino Kola mwana wa Izihaa, walo wakali mwanaa Kohati, waluzubo lwa Levi, antoomwe abaluzubo lwa Lubeni aaba: Datani, Abilamu mwana wa Eliyabu, a Oni mwanaa Peleti, 2 bakazangila Mozesi. Ambabo kwakali bamwi baalumi ba Isilayeli bali myaanda yobilo amakumi osanwe. Balo bakali bapati babantu bankuta. 3 Bakalibunga-bunga aamwi kuzookazya Mozesi a Aloni baamba kuti, “Mwaciindilizya! Tee kayi bantu boonse balasalala alimwi Mwami Leza mpali akati kabo, ino nkaambo nzi ncomulisumpula kwiinda mbungano yoonse yabantu ba Leza?”
4 Mozesi amvwe makani aaya wakavuntama akukomba. 5 Wakaambila Kola abatobeli bakwe kuti, “Juunza cifumo-fumo Mwami Leza uzootondezya naa nguni wakwe uusalala. Iiyi uyoocita kuti ooyo ngwasalide aswene kucipaililo cakwe. 6 Lino mboobu mbomuyoocita. Mukabweze zikaye, yebo Kola lwako abantu bako, 7 mukabikke mulilo mulinzizyo akubikka tununkilizyo. Mwamana mukalete kubusena bwa Mwami Leza juunza, nkabela muntu ooyo Mwami Leza ngwayoosala nguusalala. Nywebo Nobalevi andinywe mwaciindilizya.”
8 Mozesi wakaindilizya akwaambila Kola akuti, “Amuswiilile nywebo Nobalevi! 9 Sena mulimo Mwami Leza wa Baisilayeli ngwaakamupa wamuceela? Wakamuzandula ku Baisilayeli bamwi kuti mumubelekele mutente lyakuswaanganina, alimwi akumanina bantu boonse milimo. 10 Mwami Leza wakazumizya nduwe a Balevi bamwi kuti mumubelekele, kwamana mulayanda akutola bupaizi. 11 Mwami Leza ngumwabukila yebo abantu bako. Ani Aloni nguni ngomutongooka?” 12 Lino Mozesi wakaita Datani a Abilamu bana ba Eliyabu. Pele balo bakakaka bakati, “Peepe tatukooboola. 13 Wakabisya kale nookatugwisya mu Ijipiti mukunka mukupa abuci, lino uyanda kutujaila munkanda. Alimwi uyanda kutudyaminina. 14 Tookatweeta kunyika iikunka mukupa abuci naa kutupa myuunda yamisaansa amyuunda iimbi. Sena uyanda kuunina bantu aaba? Tatukooboola pe!”
15 Mpoonya Mozesi wakanyema akwaambila Mwami Leza kuti, “Utatambuli zipaizyo nzibakuletela bantu aaba. Taakwe naba omwe ngondakabisizya pe. Alimwi taakwe ngondakanyanga niiba mbongolo.”
16 Amane Mozesi wakaambila Kola kuti, “Juunza yebo abatobeli bako bali myaanda yobilo amakumi osanwe mukaboole akulibonya kutente lya Mwami Leza. Awalo Aloni unooliko ooko. 17 Umwi aumwi wanu akabweze cikaye cakwe camulilo akubikka tununkilizyo mukati, muzitole kucipaililo ca Mwami Leza. Yebo a Aloni muyoobweza umwi aumwi cikaye cakwe.”
18 Nkaako muntu umwi aumwi wakabweza cikaye cakwe camulilo, atununkilizyo mukati, nkabela bakaima kumulyango watente lyakuswaanganina ooko kwakali Mozesi a Aloni. 19 Kola wakabunganya bantu bakwe boonse kuli Mozesi a Aloni kumulyango watente lyakuswaanganina. Mpoonya kwakaboneka bulemu bwa Mwami Leza kubantu boonse bakabungene. 20 Mwami Leza wakaambila Mozesi a Aloni kuti, 21 “Amutantamuke kuzwa kubantu aaba, mbanyonyoone ndilyonya ono.”
22 Mozesi a Aloni bakavuntama bati, “O Mwami Leza, nduwe wamyuuya yabantu boonse, naa muntu omwe buyo wabisya, sena inga wasubula bantu boonse?”
23 Lino Mwami Leza wakaambila Mozesi kuti, 24 “Ambila bantu kuti batantamuke kuzwa kumatente aba Kola a Datani a Abilamu.”
25 Mpoonya aawo Mozesi wakaya kuli Datani a Abilamu kasindikilwa abasololi ba Baisilayeli. 26 Wakaambila bantu kuti, “Amuzwe munsi amatente aabantu aaba babi, alimwi mutagumi cintu niciba comwe cabo, mukuti mutanyonyoonywi muzibi zyabo.” 27 Nkaako bantu bakatantamuka kuzwa kumatente aayo. Eelyo Datani a Abilamu bakazwa mumatente aabo, baima munsi amilyango antoomwe abakaintu abana babo.
28 Mozesi wakaambila bantu kuti, “Mbombuboobu mbomutizibe kuti Mwami Leza nguwakandituma kucita milimo eeyi yoonse, kutali kuyanda kwangu ndemwini pe. 29 Kuti naa bantu aaba bafwa lufuŋanda mbuli bantu boonse nkokuti Mwami Leza taakandituma. 30 Pele kuti naa Mwami Leza acite cintu cimwi cikankamanisya, bamenwe nyika ambono zyabo zyoonse, bazikkwe bulanga, mulaziba kuti bantu aaba bakakide Mwami Leza.”
31 Mbwaakamanina kwaamba oobo nyika yakaanduka mpobakaimvwi, 32 akubamena amikwasyi yabo antoomwe abantu ba Kola kubikkilizya ambono zyabo zyoonse. 33 Mbombuboobu mbobakamenwa bulanga ambono zyabo zyoonse. Nyika yakabavumbila kunsi, bakanyonyooka. 34 Lino Baisilayeli nibakamvwa kulila kwabo bakatija bakoongolola bati, “Atutije, ambweni nyika ilaba niitumena aswebo!” 35 Ciindi eeco Mwami Leza wakatuma mulilo wakavutuka akutenta bali myaanda yobilo amakumi osanwe baya bakali kutenta tununkilizyo.
Zikaye zyamulilo
36 Lino Mwami Leza wakaambila Mozesi kuti, 37 “Mwaambile Eliyazaa mwana wa Aloni mupaizi kuti agwisye zikaye zyamukuba mumulilo, asowe makala kulaale, nkaambo zilasalala. 38 Zikaye zyabantu aaba bakabisya akulijazya, zifulwe zipapalale zibe zyakuvumbya cipaililo, nkaambo zyakaletedwe ku Mwami Leza, nkaako zyasalala. Mbuboobu mboziyooba cicenjezyo ku Baisilayeli.”
39 Aboobo Eliyazaa mupaizi wakazibweza zikaye zyabaabo bakatentwa, waakuzifula kuti zivumbye cipaililo, 40 mbuli Mwami Leza mbwaakamulailila kwiindila muli Mozesi. Eeci cakaba cicenjezyo ku Baisilayeli cakuti taakwe muntu buyo uutali walunyungu lwa Aloni weelede kuswena kucipaililo kuti atente tununkilizyo ku Mwami Leza. Naa wacita oobo ulafwa cakafwa Kola abantu bakwe.
Aloni mbwaakamanina bantu mulimo
41 Lino mubuzuba bwakaccilila, bantu boonse bakatongooka Mozesi a Aloni bakati, “Mwajaya bantu ba Mwami Leza.” 42 Ciindi nibakabungana akutongooka Mozesi a Aloni, bakacengulukila kutente lyakuswaanganina, bakabona kkumbi lilivumbide tente eelyo bulemu bwa Mwami Leza bwakaboneka. 43 Mozesi a Aloni bakaya akuyooima kumbele lyatente.
44 Lino Mwami Leza wakaambila Mozesi kuti, 45 “Amukale kulaale abantu aaba, nkaambo ndilabajaya ndilyona ono!” Balo bakavuntama. 46 Mpoonya Mozesi wakaambila Aloni kuti, “Gwisya cikaye cako camulilo, bikka makala aazwa acipaililo. Omana ubikke tununkilizyo amakala aayo, nkabela ufwambaane uye kubantu, ukabakombelezezye mulandu wabo. Nkaambo Mwami Leza wanyema kapati. Cuumo catalika!”
47 Lino Aloni wakacita oobo, wakazuzaana kubantu baya. Naakabona kuti cuumo catalika kale, wakabikka tununkilizyo mucibwezelo akubakombelezezya mulandu wabo. 48 Aloni wakaakwiima akati kabafu abaumi, mpoonya cakamana. 49 Mweelwe wabantu bakafwa wakali zyuulu zili kkumi azine amyaanda iili ciloba kutabalilizya abaabo bakafwa kumakani aa Kola. 50 Cuumo nicakamana, Aloni wakabweeda kuli Mozesi kumulyango watente lyakuswaanganina.