Myeelwe 10

Myeembo yansiliva

¹ Lino Mwami Leza wakaambila Mozesi kuti, ² “Panga myeembo yobilo yansiliva yoondedwe, ibe yakwiita bantu kuti babungane alimwi akubazibya kuti balonge. ³ Ciindi myeembo yoonse yobilo yasibwa, bantu boonse baleelede kubunganina kumulyango watente. ⁴ Pele kwasibwa buyo omwe, basololi baziinga zya Isilayeli mbebayooswaangana balikke. ⁵ Alimwi naa yasibwa buyo asyoonto, misyobo iiyakide kujwe njiielede kulonga. ⁶ Kuti naa yasibwa asyoonto lwabili, misyobo iili kumusanza njiielede kulonga. Aboobo myeembo yasibwa asyoonto njakulonga. ⁷ Pele kwayandika mbungano yoonse, myeembo isibisigwe kapati. ⁸ Myeembo isibwe buyo abana ba Aloni, mupaizi. Eeci mucitobele kwamazyalani oonse aaciboola.

⁹ “Kuti mwalwanwa munyika yanu, mukuti mulivune kuli basinkondonyoko, muleelede kusiba myeembo eeyi. Ndendilyo mebo nde Mwami Leza wanu, nenjoomuvuna kuli basinkondonyoko. ¹⁰ Alimwi amuziindi zyakusekelela, mbuli pobwe lyamwezi mupya amapobwe amwi, baleelede kusiba myeembo nomupa zipaizyo zyakutenta azyalumvwano. Zinooli ciibalusyo kuli Leza wanu. Ndime Mwami Leza wanu.”

Baisilayeli mbubakalonga

¹¹ Lino mubuzuba bwamakumi obilo mumwezi wabili mumwaka wabili ciindi bantu kabazwide kale mu Ijipiti, kkumbi lyakavumbide atente lyacizuminano lyakeenda. ¹² Mpoonya Baisilayeli bakatalika kulonga kuzwa munkanda ya Sinai. Kkumbi lyakazooimina munkanda ya Palani.

¹³ Lino bakeenda ciindi eeci cakusaanguna mbubonya mbuli Mwami Leza mbwaakalailila Mozesi. ¹⁴ Bantu ba Juda mbibakasaanguna kweenda andembela yabo muzibunga-zibunga, nkabela mupati wa mbunga yabo wakali Nasyoni mwana wa Aminadabu. ¹⁵ Netaneli mwana wa Zuwaa ngowakali mupati wamusyobo wa Isakaa. ¹⁶ Eliyabu mwanaa Heloni ngowakali mupati wamusyobo wa Zebuluni.

¹⁷ Lino tente lyakukombela nilyakali kumwaigwa, bamukowa wa Gesyoni a Melali mbibakali kulibweza. ¹⁸ Bakabatobela mbamusyobo wa Lubeni andembela zyabo muzibunga-zibunga, nkabela mupati wa mbunga yabo wakali Elizuu mwanaa Syedeyuu. ¹⁹ Syelumiyeli mwanaa Zulisyadayi ngowakali mupati wamusyobo wa Simiyoni. ²⁰ Eliyasafu mwanaa Deyuweli ngowakali mupati wamusyobo wa Gadi.

²¹ Mpoonya kwakatobela bamukowa wa Kohati bakabwezede zibelesyo zisalala. Nkabela tente lyakukombela lyakaimikwa Bakohati kabatanasika. ²² Kuzwa mbabo kwakaza bamusyobo wa Efulemu andembela zyabo muzibunga-zibunga, nkabela mupati wa mbunga yabo wakali Elisyama mwana wa Amihudi. ²³ Gamaliyeli mwanaa Pedazuu ngowakali mupati wamusyobo wa Manase. ²⁴ Abidani mwanaa Gideyoni ngowakali mupati wamusyobo wa Benjamini.

²⁵ Kumamanino kwakaza bamukowa wa Dani andembela zyabo muzibunga-zibunga. Bakali kucingilila bantu musule, nkabela mupati wabo wakali Ahiyeza mwana wa Amisyadayi. ²⁶ Pagiyeli mwana wa Okulani ngowakali mupati wamusyobo wa Asya. ²⁷ Ahila mwana wa Enani ngowakali mupati wamusyobo wa Nafutali. ²⁸ Mbombuboobu mbunga zya Baisilayeli mbuzyakali kweenda ciindi cakulonga.

²⁹ Lino Mozesi wakaambila Hobabu mwanaa Luweli wisizyala Mozesi Mumidiyani kuti, “Tuya kubusena Mwami Leza mbwaakati ndiyoomupa. Wakasyomezya Baisilayeli kuti bayoosumpuka. Aboobo atweende ayebo kuti tukaabane lusumpuko ooko.”

³⁰ Pele walo wakaingula kuti, “Peepe, mebo ndilabweeda kucisi cangu kumukowa wangu.”

³¹ Mozesi wakati, “Akaka, utapiluki. Ulizi nkotukonzya kuyooyakila munkanda. Uli mbuli meso eesu. ³² Kuti tweende limwi, tuyooabana anduwe zibotu zyoonse Mwami Leza nzyayootupa.”

³³ Lino Baisilayeli bakalonga kuzwa kucilundu ca Mwami Leza, bakeenda kwamazuba otatwe. Bbokesi lyacizuminano ca Mwami Leza lyakali kumbele lyabo, bakeenda andilyo kwamazuba otatwe kuti bakajane busena bwakulyookezezya. ³⁴ Nibakalonga, kkumbi lya Mwami Leza lyakali amutwe wabo ciindi casikati.

³⁵ Ciindi coonse bbokesi lyacizuminano ca Mwami Leza nilyakali kulonzegwa, Mozesi wakali kwaamba kuti,

“Nyamuka, O Mwami Leza, umwaye basinkondonyoko! Batije bakusulide!”

³⁶ Alimwi ciindi nilyakakkazikwa, Mozesi wakali kwaamba kuti,

“Koboola O Mwami Leza, uleleke zyuulu-zyuulu zya Baisilayeli.”