Myeelwe 1
Kubalwa kwa Baisilayeli kwa kusaanguna
1 Lino mubuzuba butaanzi bwamwezi wabili wamwaka wabili ciindi Baisilayeli kabazwide kale mu Ijipiti, Mwami Leza wakaambaula a Mozesi mutente lyakuswaanganina munkanda ya Sinai wakati, 2 “Yebo a Aloni mubale Baisilayeli muziinga amumikwasyi yabo. Mukalembe boonse 3 aabo bajisi myaka iili makumi obilo naa kwiindilila waawo, baalumi boonse bakonzya kuya kunkondo. 4 Muciinga comwe-comwe mutole muntu umwi mupati waciinga eeco kuti amugwasye. 5 Mbaaba baalumi muciinga comwe-comwe bakasalwa. Kuzwa kuli Lubeni kwakasalwa Elizuu mwanaa Syedeyuu, 6 kuzwa kuli Simiyoni ngu Syelumiyeli mwanaa Zulisyadayi, 7 kuzwa kuli Juda ngu Nasyoni mwana wa Aminadabu, 8 kuzwa kuli Isakaa ngu Netaneli mwanaa Zuwaa, 9 kuzwa kuli Zebuluni ngu Aliyabu mwanaa Heloni, 10 kuzwa kubana ba Josefa, kuli Efulemu ngu Elisyama mwana wa Amihudi, kuli Manase ngu Gamaliyeli mwanaa Pedazuu, 11 kuzwa kuli Benjamini ngu Abidani mwanaa Gideyoni. 12 Kuzwa kuli Dani ngu Ahiyeza mwana wa Amisyadayi, 13 kuzwa kuli Asya ngu Pagiyeli mwana wa Okulani, 14 kuzwa kuli Gadi ngu Eliyasafu mwanaa Dyuweli, 15 kuzwa kuli Nafutali ngu Ahila mwana wa Enani.” 16 Aaba mbabakasalwa kuzwa kumbungano ya Baisilayeli, basololi bamikowa, abapati baziinga.
17-18 Mubuzuba bwakusaanguna bwamwezi wabili aaba baalumi bali kkumi ababili bakagwasya Mozesi a Aloni kubunganya bantu boonse muziinga zyabo kubalemba. Nkabela baalumi boonse bakali aamyaka iili makumi obilo naa kwiindilila bakalembwa akubalwa. 19 Mbubonya mbuli Mwami Leza mbwaakalailila, bakabalwa boonse ooko kunkanda ya Sinai.
20 Lino kuzwa muciinga ca Lubeni, mwana wakusaanguna wa Isilayeli, bakalemba mwaalumi umwi aumwi mumikwasyi yabo wakajisi myaka iili makumi obilo naa kwiindilila wakali kukonzya kuya kunkondo. 21 Mweelwe wa Balubeni wakali zyuulu zili makumi one acisambomwe amyaanda yosanwe.
22 Kuzwa kuciinga ca Simiyoni bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 23 Mweelwe wabo wakali zyuulu zili makumi osanwe afuka amyaanda yotatwe.
24 Kuzwa kuciinga ca Gadi bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 25 Mweelwe wabo wakali zyuulu zili makumi one azisanu amyaanda iili cisambomwe amakumi osanwe.
26 Kuzwa kuciinga ca Juda bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 27 Mweelwe wabo wakali zyuulu zili makumi aali ciloba azine amyaanda iili cisambomwe.
28 Kuzwa kuciinga ca Isakaa bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 29 Mweelwe wabo wakali zyuulu zili makumi osanwe azine amyaanda yone. 30 Kuzwa kuciinga ca Zebuluni bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 31 Mweelwe wabo wakali zyuulu zili makumi osanwe aciloba amyaanda yone.
32 Kuzwa kuciinga ca Josefa, nkokuti bana ba Efulemu bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 33 Mweelwe wabo wakali zyuulu zili makumi one amyaanda yosanwe.
34 Kuzwa kubana ba Manase bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 35 Mweelwe wabo wakali zyuulu zili makumi otatwe azibili amyaanda yobilo.
36 Kuzwa kuciinga ca Benjamini bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 37 Mweelwe wabo wakali zyuulu zili makumi otatwe azisanu amyaanda yone.
38 Kuzwa kuciinga ca Dani bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 39 Mweelwe wabo wakali zyuulu zili makumi aali cisambomwe azibili amyaanda iili ciloba.
40 Kuzwa kuciinga ca Asya, bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 41 Mweelwe wabo wakali zyuulu zili makumi one acimwi amyaanda yosanwe.
42 Kuzwa kuciinga ca Nafutali bakalemba mwaalumi umwi aumwi, mumikwasyi yabo wakajisi myaka iili makumi obilo naa kwiindilila, wakali kukonzya kuya kunkondo. 43 Mweelwe wabo wakali zyuulu zili myaanda iili makumi osanwe azitatu amyaanda yone.
44 Aaba mbibakabalwa a Mozesi a Aloni abapati ba Isilayeli bali kkumi ababili bakasalwa umwi aumwi kuzwa kuciinga cawisi. 45 Mbombuboobu Baisilayeli boonse mbubakabalwa, nkokuti mwaalumi umwi aumwi wakajisi myaka iili makumi obilo naa kwiindilila wakali kukonzya kuya kunkondo. 46 Antoomwe bakali zyuulu zili myaanda iili cisambomwe azitatu amyaanda yosanwe amakumi osanwe.
47 Pele bana baciinga ca Levi tiibakabalwa ambabo pe, 48 nkaambo Mwami Leza wakaambila Mozesi kuti, 49 “Utabali Balevi antoomwe a Baisilayeli bamwi. 50 Pele ubacite kuti babe balangi batente lyacizuminano ca Leza azibelesyo zyalyo. Mbambabo beelede kuyumuna tente azibelesyo zyalyo zyoonse, nkabela baleelede kulibamba lyalo akuyaka zivuka zyabo kulizinguluka. 51 Tente lyalonzegwa Balevi mbabeelede kulimwaya alimwi anolisimpwa mbabeelede kulisimpa. Kufumbwa muntu uyooswena aafwiifwi uyoojaigwa. 52 Baisilayeli boonse bayooyaka matente aabo muzibunga-zibunga, umwi aumwi kubusena kusimpidwe ndembela yaciinga cakwe. 53 Balevi balo mbabeelede kuyaka matente aabo kuzinguluka tente lyacizuminano ca Leza, kuti Leza atasubuli buleya bwa Baisilayeli. Balevi mbabeelede kubamba tente eelyo. 54 Mbombuboobu Baisilayeli mbubakacita zintu zyoonse mbuli Mwami Leza mbwaakalailila Mozesi.”