Mukambausi 9
Ciyoosikila boonse
1 Makani aaya oonse ndakaatelaika, kumane ndakayeeya kuti baluleme abasongo azyoonse eezyo nzyobacita zili mumaanza aa Leza, pele taakwe muntu naba omwe uuzi naa ulamuyanda naa ulimusulaikide. 2 Nkaambo ciyoosikila boonse ncimwi, baluleme abasizibi, babotu ababi, basalala abasofweede, aabo bapa zipaizyo abaabo batapi. Mbuli mbocibede kumuntu mubotu, mbocibede akuli sizibi, mbuli mbocibede akuli sizibi. Mbuli mbocibede kuli baabo bakonkezya, mbocibede akuli baabo bayoowa kukonkezya. 3 Oobu mbobubi kuzintu zyoonse zicitika ansi aano. Boonse ciyoobasikila. Kunze aboobu myoyo yabantu mmibi, izwide bubi, mbaasincinko nobacipona, kwamana abalo balafwa. 4 Woonse ulijisi lulangilo, mubwa uupona mubotu kwiinda syuumbwa uufwide. 5 Baumi balizi kuti bayoofwa, pele bafu taakwe ncobazi, tabakonzyi kulumbulwa, balalubwa. 6 Luyando lwabo, kusulaika kwabo, amunyono zilalubwa, taakwe ncobacikonzya kucita muli zyoonse zicitwa ansi aano.
7 Kolya cilyo cako cakutangala, konywa waini wako amoyo uukondedwe, cino nceciindi Leza naboteledwe amilimo yako. 8 Zisani zyako kazituba ciindi coonse konana mafuta kumutwe lyoonse. 9 Kobotelwa amukaintu wako uuli ngoyandisisya mumazuba oonse, aabuyo, aabuumi bwako aayo Leza ngakupede ansi aano. Ucite oobo mumazuba aako oonse aabuyo. Nkaambo eeci ncecaabilo cabuumi bwako cizwa mumilimo iiminya ansi aano. 10 Kufumbwa eeco ncoyanda kubeleka, cicite anguzu zyako zyoonse, nkaambo mucuumbwe oomo moyoonjila, taakwe ncoyoocita nikuba kuyeeya, niluba luzibo nibuba busongo pe.
11 Kuli cimwi ncindakabona ansi aano. Tali siluno uuzwidilila mukusiyana, tali sintanze uuzunda munkondo, tabali basongo bajana zyakulya, tabali bamaanu baba alubono, tabali baiide bafwide luzyalo, pele boonse balasikilwa ziindi. 12 Kunze aboobo taakwe muntu uuzi ciindi cakwe nociyoosika. Mbuli nswi mbozijatwa mukanyandi kazambaila, abayuni mbobacegwa mukakole, bantu bamwi balacegwa aziindi zibi, zilababoolela kabatalibambilide.
Busongo mbubotu kwiinda bufuba-fuba
13 Alimwi ndakabona ansi aano citondezyo cabusongo oobo bwakandibotela kapati. 14 Kwakali munzi muniini wakajisi bantu bace. Eelyo kwakasika mwami umwi singuzu kuzooulwana, wakazinguluka akuyaka zitantaala zyakuulwanina. 15 Lino mukati kamunzi ooyu mwakali mwaalumi umwi mucete pele kali musongo, eelyo kwiindila mubusongo bwakwe wakavuna munzi ooyo. Pele taakwe muntu wakayeeya mwaalumi mucete uulya pe. 16 Mpawo ndakati, “Busongo mbubotu kwiinda nguzu.” Pele busongo bwamwaalumi ooyu mucete bwakasampaulwa, majwi aakwe taaciswiililwi limbi pe.
17 Majwi aamvwigwa aamusongo aleelede kuswiililwa kwiinda kuyobeka kwamuleli waziyanga. 18 Busongo mbubotu kwiinda zilwanyo zyankondo, pele sizibi omwe ulanyonyoona zibotu zinji.