Mukambausi 7
Busongo
1 Zina bbotu ndibotu kwiinda tufuta tununkilila, abuzuba bwakufwa mbubotu kwiinda buzuba bwakuzyalwa.
2 Ncibotu kuunka kuŋanda yadilwe kwiinda kuunka kuŋanda yapobwe, nkaambo lufu luyoosikila muntu uuli woonse, baumi baleelede kwaayeeya makani aaya.
3 Buumba mbubotu kwiinda kuseka, nkaambo kuumbaalilwa nkokubotya moyo.
4 Moyo wamusongo ulayeeya zyalufu, pele myoyo yabafuba-fuba ilayeeya zyakulitangazya.
5 Ncibotu kuswiilila kutapata kwamusongo, kwiinda kuswiilila nyimbo zyabafuba-fuba.
6 Mbuli kupatauka kwamamvwa kunsi aacibiya mbokubede kuseka kwabafuba-fuba. Acalo eeci ncabuyo.
7 Kucenga kucita kuti muntu musongo afubaale, sinkamulomo libisya moyo wamuntu.
8 Mamanino aakaambo mabotu kwiinda matalikilo aako. Kukkazika camba nkubotu kwiinda kulisumpula.
9 Utanoofwambaani kukalala, nkaambo bukali bujanwa kubafuba-fuba.
10 Utaambi kuti, “Ino nkaambo nzi mazuba aaciindi ncaakali mabotu kwiinda aasunu?” Mbufuba-fuba kubuzya mibuzyo iili mbuli yeeyi.
11 Busongo mbubotu mbubonya mbuli lukono, bulagwasya aabo bapona. 12 Busongo bulakwabilila kwiinda bukwabilila mali. Bubotu bwaluzibo mboobu: Busongo bulavuna aabo babujisi.
13 Koyeeya milimo ya Leza mbwiibede, nguni uukonzya kululamika eeco ncaakapilinganya? 14 Kuti zintu zyakweendela kabotu, kobotelwa, kuti naa zyakweendela bubi, yeeya ceeci, Leza nguwakacita zyoonse eezyo. Nkaako muntu takonzyi kuziba zyabuumi bwakwe bwakumbele.
15 Mubuumi bwangu oobu bwabuyo ndakabona zintu zyobilo eezi: Muntu uululeme wakafwa mubululami bwakwe, amuntu mubi wakoongola mububi bwakwe. 16 Utalulamini limwi, alimwi utasongwaalili limwi, ino ulinyonyweeda nzi? 17 Utabijili limwi, utafubaali, sena ncibotu kufwa kacitanasika ciindi cako? 18 Ncibotu kujata cintu comwe akutaleka cimwi. Muntu uulemeka Leza, uyoolilesya kuli zyoonse.
19 Busongo bucita kuti muntu musongo omwe abe aanguzu kwiinda beendelezi bali kkumi bamumunzi.
20 Taakwe muntu uululeme ansi aano ooyo uucita ziluleme zilikke katabisyi pe.
21 Utanooswiilili kufumbwa majwi aayo bantu ngobaamba, ulaba nomvwa mubelesi wako kakusinganya. 22 Kayi ayebo omwini ulizi kuti kwaziindi zinji wakasinganya bamwi.
23 Zyoonse eezi ndakazilingula mubusongo ndakati, “Ncenciceeco ncendiyandisya kuba musongo! Pele tiindakakonzya pe. 24 Busongo nibuba buti buli kule, bulakatazya, nguni uukonzya kubujana? 25 Aboobo ndakayandisisya kumvwisya zintu, kuti ndilangaule, ndibone busongo ambuli mbozibede zintu zyoonse, kuti ndizibisye bufuba-fuba bwabubi, ancinko yabufuba-fuba. 26 Ndibwene cintu cibi kwiinda lufu, mukaintu uli mbuli kakole, uli aamoyo uuli mbuli cisilazya, uuli aamaboko aali mbuli nketani. Muntu uubotezya Leza ulamupuzuka, pele sizibi ulamuca.” 27 Mboobu mbwaamba Mukambausi, “Bona nceeci ncindajana, ndayeeya cintu comwe-comwe kuti ndizibisye mbuli zintu mbozibede. 28 Ndacilangaula pele nsijani nzila. Ndakajana mwaalumi omwe uululeme akati kabantu bali cuulu, pele taakwe mukaintu naba omwe akati kabaabo boonse. 29 Ncindakajana buyo nceeci, Leza wakalenga muntu kaluleme, pele bantu mbabasakene mumizeezo yabo.”