Mukambausi 2
Kulibotezya nkwabuyo
1 Ndakayeeya mumoyo wangu ndakati, “Boola lino nkusole ndibone zibotu! Pele acalo eeci ndakajana kuti ncabuyo.” 2 Ndakati, “Kuseka-seka mbufuba-fuba. Ino kulibotezya kujanya nzi?” 3 Ndakasolekesya kulitangazya awaini wakandeetela buyo bufuba-fuba. Moyo wangu ucindisolweda mubusongo. Ndakali kuyanda kuti ndibone naa ncinzi ncobeelede kucita bantu ansi aano mumazuba mace aabuumi bwabo.
4 Ndakacita milimo mipati. Ndakayaka maanda akusyanga myuunda yamisaansa. 5 Ndakapanda myuunda akuyaka mabbuwa aakulyookezezya akusyanga misamu iizyala micelo iindene-indene mulingawo. 6 Ndakapanga zitelekezezyo zyamaanzi zyakutilizya misamu eeyo njindakasyanga. 7 Ndakaula bazike baalumi abakaintu, ndakalijisi abazike bamwi bakazyalilwa mwangu. Alimwi ndakalijisi matanga aa ŋombe aambelele kwiinda boonse aabo bakalelede kale mu Jelusalemu. 8 Ndakalijisi nsiliva angolida zinji, aciyobwedo cabami abasololi bazisi ziniini. Ndakajana baalumi abakaintu baimbi abakaintu bamwi banji zili nzezibotezya muntu. 9 Ndakaba aampuwo kwiinda boonse aabo bakandisaangunina kulela mu Jelusalemu. Muli zyoonse eezi ndakali musongo. 10 Taakwe ncindakalilesya kuli zyoonse nzindakabona, taakwe nindakalilesya zyoonse nzindakali kuyanda. Ndakabotelwa muli zyoonse nzindakacita. Oobu mbubwakali bulumbu bwamilimo yangu. 11 Pele nindakalanga-langa zyoonse eezyo nzindakacita, zyoonse zyakali zyabuyo, kuli mbuli kutandaanya luuwo, taakwe mpindu iijanwa ansi aano.
Busongo abufuba-fuba nzyabuyo
12 Mpoonya ndakatalika kutelaika zyabusongo, zyancinko azyabufuba-fuba. Ino ooyo uuyootola busena bwamwami uyoocita nzi cipati ciinda eeco cakacitwa kale? 13 Ndakabona kuti busongo mbubotu kwiinda bufuba-fuba, mbubonya mbuli mumuni mbuuli mubotu kwiinda mudima. 14 Syaabupampu ulaamutwe muuba ubona zyakumbele, pele mufuba-fuba uleenda mumudima. Ndakayeeya kuti tee kayi mapenzi alabasikila boonse. 15 Eelyo ndakayeeya mumoyo kuti, “Eeco ciyoocitika kumufuba-fuba
ciyoondicitikila ambebo. Ino nimpindu nzi njendijana mukuba musongo?”
Ndakayeeya mumoyo kuti, “Acalo eeci ncabuyo.”
16 Nkaambo musongo, mbubonya mbuli mufuba-fuba, taakwe naciyooyeeyegwa pe,
mumazuba aaboola boonse bayoolubwa. Mbubonya mbuli mufuba-fuba musongo awalo uyoofwa.
Kubeleka nkwabuyo
17 Lino ndakabucimwa buumi, nkaambo mulimo uucitwa ansi aano wakali kundikatazya. Woonse ngwabuyo, cili mbuli kutandaanya luuwo. 18 Ndakasulaika milimo yoonse eeyo njindakabelekela ansi aano nkaambo ndeelede kuyooisiila ooyo uuza musule lyangu. 19 Nguni uuzi kuti ambweni unooli musongo naa mufuba-fuba? Nikuba boobo nguuyooendelezya milimo yoonse eeyo njindakoonda akucita ansi aano. Eeci acalo ncabuyo. 20 Aboobo ndakatalika kutyompwa akaambo kamilimo yangu eeyo njindakacita ansi aano. 21 Muntu ulakonzya kucita milimo yakwe cabusongo, caluzibo acabuuya, kwamana akasiile muntu umwi ooyo watakazibelekela. Acalo eeci ncabuyo alimwi nkokubula coolwe kupati. 22 Ino muntu ujana nzi akaambo kamilimo yakwe yoonse njacita akulipenzya ansi aano? 23 Mazuba aakwe oonse ngabeleka ngakupenga akuusa, naaba masiku talyookezyi, ulayeeya. Acalo eeci ncabuyo.
24 Taakwe muntu ncakonzya kucita kunze aakulya akunywa kuti alikondelezye akaambo kamilimo yakwe. Eeci ndicibwene kuti acalo cizwa kuli Leza, 25 nkaambo kunze lyakwe, nguni uukonzya kulya nikuba kulibotezya? 26 Kumuntu uumubotezya, Leza ulapa busongo, luzibo akubotelwa, pele sizibi ulamupa mulimo wakubunganya akuyobola lubono kuti azoolupe kuli yooyo uubotezya Leza. Acalo eeci ncabuyo, cili mbuli kutandaanya luuwo.