Mukambausi 11

Zyacinkwa atala aamaanzi

¹ Waala cinkwa cako atala aamaanzi, kwainda mazuba manji uzoocijana alimwi. ² Abila bantu bali ciloba, kwaambisya bali lusele, nkaambo tozi mapenzi aatiboole aanyika aano.

³ Kuti makumbi kaajisi maanzi, alawisya mvula anyika. Kuti naa musamu wawida kumusanza naa kunyika kubbazu ooko nkuutiwide, nkuunoolangide. ⁴ Ooyo uulangilila luuwo takalimi, ooyo uulangilila makumbi takatebuli. ⁵ Mbubonya mbuli mbotazi nzila yaluuwo, ambotazi mbuli mubili wakasalalila mwida mbuukomena, mbubonya oobo ayebo mbotakonzyi kuziba milimo ya Leza, Mulengi wazintu zyoonse. ⁶ Kosyanga mbuto zyako cifumo-fumo, kumangolezya utaleki buyo, nkaambo tozi ziyoozwidilila, ambweni njeeyi naa iilya, ambweni zyoonse zyobilo zilaba kabotu.

Koyeeya Mulengi wako nocili mukubusi

⁷ Mumuni mubotu, meso alabotelwa kubona zuba. ⁸ Nikuba kuti muntu aongole buti, aasekelele. Pele kayeeya mazuba aamudima, kuti anooli manji. Zyoonse ziyoocitika nzyabuyo.

⁹ Kobotelwa omukubusi nocili mwana, kotangala mumazuba aabukubusi bwako. Kotobela ziyanda moyo wako azeezyo nzyobona, pele koyeeyede kuti muzintu zyoonse eezi Leza uyookubeteka. ¹⁰ Nkaako ono koleka kuusa mumoyo wako, kosiya makatazyo aako, nkaambo bukubusi anguzu nzyabuyo.