Milimo 8
Saulu mbwaakapenzya Bakilisito
1 Mbubonya buzuba oobo, mbungano ya Bakilisito yamu Jelusalemu yakatalika kupenzegwa kapati. Aboobo basyomi boonse bakamwaikila mumabazu oonse aa Judiya a Samaliya. Kwakasyaala buyo batumwa balikke mu Jelusalemu. 2 Bamwi baalumi basyomi bakazikka Sitivini, bakamulila kapati.
3 Pele Saulu wakasoleka kuti amwaye akumanizya mbungano. Wakali kuunka kuŋanda aŋanda yabasyomi, akujata baalumi abakaintu akubawaala kuntolongo.
Mulumbe Mubotu mbuwakakambaukwa mu Samaliya
4 Nkabela aabo bakamwaikide, bakainka koonse-koonse kuya bukambauka Mulumbe Mubotu. 5 Filipo wakaya kumunzi mupati waku Samaliya, waakukambauka zya Munanike wa Leza kubantu bankuko. 6 Bantu banji nibakamvwa majwi aa Filipo akubona maleele ngaakacita bakamuswiilila. 7 Wakagwisya myuuya mibi mubantu, kiikwiila ajwi pati, alimwi bantu banji bakayuminide mibili abakapuutide bakaponyezegwa. 8 Aboobo bantu bamumunzi oomo bakakondwa kapati.
9 Lino mumunzi ooyo mwakali kukkala mwaalumi wali kutegwa Saimoni. Wakali musondi, alimwi wakali kukankamanisya bantu bamu Samaliya. Wakali kulidumaizya lwakwe mwini kuti mmuntu mupati. 10 Aboobo bantu boonse bamumunzi ooyo, balupati-pati abantu buyo bakali kumulemeka kapati akumuswiilila. Mane bakali kumulumbaizya kuti, “Muntu ooyu ulijisi nguzu zya Leza uutegwa Mupati.” 11 Wakali kubakankamanisya bantu azimpangaliko zyakwe kwaciindi cilamfu mane abalo bakatalikide kumuswiilila. 12 Ciindi Filipo naakakambauka Mulumbe Mubotu waamba zyabwami bwa Leza azya Jesu Kilisito, bantu banji bakasyoma akubbapatizigwa, baalumi abakaintu. 13 Awalo Saimoni lwakwe wakasyoma, naakamana kubbapatizigwa wakali kukkala antoomwe a Filipo. Wakagambwa naakabona maleele azitondezyo zipati zyakali kucitwa a Filipo.
14 Batumwa bakali mu Jelusalemu bakamvwa kuti abalo bantu bamu Samaliya batambula majwi aa Leza, mpawo bakatuma ba Pita a Joni kuya nkuko. 15 Lino nibakaakusika ooko, bakaakukombela basyomi kutegwa batambule Muuya Uusalala. 16 Nkaambo Muuya Uusalala taakanasika amuntu naba omwe wabo, nikuba kuti bakabbapatizigwa muzina lya Mwami Jesu. 17 Ba Pita a Joni bakabikka maanza aabo alimbabo, mpoonya bakatambula Muuya Uusalala.
18 Lino Saimoni wakali musondi uulya naakabona kuti Muuya wakapegwa kubantu batumwa nibakabikka maanza alimbabo. Wakayanda kubapa mali ba Pita a Joni. 19 Wakabaambila kuti, “Amundipe nguzu eezi ambebo kutegwa kufumbwa muntu ngundabikka maanza atambule Muuya Uusalala.”
20 Pele Pita wakamwiingula kuti, “Kofwa amali aako! Sena uyeeya kuti inga cipego ca Leza caulwa amali! 21 Tokwe lubazu niciba caabilo mumulimo wesu nkaambo kakuti moyo wako tuululeme kuli Leza. 22 Uleelede kweempa nkaambo kacibi eeci ncoyeeya. Ukombe ku Mwami kuti ambweni inga wakulekelela. 23 Nkaambo ndabona kuti uli muntu uuzwide bbivwe, uli mwaange wacibi.”
24 Aboobo Saimoni wakaambila ba Pita a Joni kuti, “Akaka, amundikombele ndinywe ku Mwami kuti kutabi niciba comwe camakani aaya ngimwandaambila citicitike kulindime.”
25 Lino nibakamana kwaambilizya bumboni akwaamba majwi aa Mwami, ba Pita a Joni bakabweeda ku Jelusalemu. Kabaya, bakali kuya bukambauka Makani Mabotu muminzi minji yamucisi ca Samaliya.
Filipo a Muitiyopiya
26 Lino mungelo wa Mwami wakaambila Filipo kuti, “Libambile, uye kumugwagwa uuli kumusanza, uuzwida ku Jelusalemu kuya ku Gaza.” Mugwagwa ooyu tuucibelesegwi sunu. 27 Aboobo Filipo wakalibambila wakainka. Lino kwakali Muitiyopiya umwi wakali muntu mupati, wabulemu. Muntu ooyu wakapedwe nguzu mpati zyakubamba lubono lwa Kandasi, mwami mukaintu wacisi ca Itiyopiya. Wakali kuzwida ku Jelusalemu kukukomba Leza akubweeda kumunzi wakwe. 28 Wakalitantide munkalaki kumwi uya bubala bbuku lyamusinsimi Izaya. 29 Mpawo Muuya Uusalala wakaambila Filipo kuti, “Koya aafwiifwi ankalaki iilya.” 30 Filipo naakaswena, wakamvwa muntu ooyo kabala bbuku lyamusinsimi Izaya, mpawo wakamubuzya kuti, “Sena mulimvwide ncaamba makani aayo ngomubala?”
31 Ooyo muntu wakaingula kuti, “Peepe, nsyaamvwide, ccita kwaba muntu uundipandulwida.” Mpoonya wakakumbila Filipo kuti atante akuzookkala anguwe munkalaki. 32 Cibalo ca Malembe ncaakali kuya bubala nceeci,
“Wakali mbuli mbelele iiya kukujaigwa.
Wakali mbuli mwanaa mbelele uutalili nagelwa boya.
Taakwe naakaamba jwi niliba lyomwe.
33 Wakabombezegwa alimwi taakabetekwa bweelede.
Kunyina uyooamba zyalunyungu lwakwe ansi aano,
nkaambo buumi bwakwe bwamanizigwa.”
34 Mpoonya muntu mulemu ooyo wakati kuli Filipo, “Amundipandulwide, ino ooyu musinsimi waamba zyani mumakani aaya? Sena ulyaamba lwakwe mwini naa waamba muntu uumbi?” 35 Filipo wakatalika amakani aacibalo eeci nciconya, wakamwaambila zya Mulumbe Mubotu wa Jesu. 36 Kabaya bweenda mumugwagwa, bakasika kubusena bwakajisi maanzi. Mpoonya muntu ooyo wakati, “Amubone ngaaya maanzi. Ino ncinzi cicindikasya kubbapatizigwa?”
[ 37 Filipo wakaingula kuti, “Mulakonzya kubbapatizigwa kuti kamusyoma amoyo woonse.”
Eelyo muntu ooyo wakati, “Iiyi, ndasyoma kuti Jesu Kilisito ngo Mwanaa Leza.”
38 Muntu wakaimika nkalaki yakwe, lino boonse bobilo, Filipo anguwe, bakanjila mumaanzi, mpoonya Filipo wakamubbapatizya. 39 Nibakazwa mumaanzi, Muuya wa Mwami wakatola Filipo. Muntu ooyo taakamubona limbi pe. Muntu ooyo wakaya mulweendo lwakwe kaboteledwe kapati. 40 Lino Filipo wakaakulijana kumunzi wa Azotusi. Ooko wakali kuya bukambauka Mulumbe Mubotu muminzi mane waakusika ku Sizaliya.