Milimo 6

Kusalwa kwabagwasyi bacikombelo bali ciloba

¹ Lino mumazuba aayo, basyomi bakali kuya buvula. Kwakali kutamvwana akati ka Bajuda bakali kukanana Cigiliki abaabo bakali kukanana Cijuda. Bacigiliki bakali kutongooka kuti bamukabafu bakuli mbabo tiibakali kulanganyizigwa lyakali kwaabwa zyabupe zya buzuba abuzuba ² Aboobo batumwa bali kkumi ababili bakabunganya nkamu yoonse yabasyomi akuti, “Tacili cibotu kuti swebo tuleke kukambauka Majwi aa Leza tugame kulanga zyabupe. ³ Nkaako nobakwesu, amusale baalumi bali ciloba bazizilwe kuti balizwide Muuya Uusalala abusongo, kuti batole mulimo ooyu. ⁴ Pele swebo tulipe kukukomba akukambauka.”

⁵ Lino nkamu yoonse yakabotelwa amakani aaya, eelyo bakasala Sitivini, mwaalumi wakazwide lusyomo a Muuya Uusalala, Filipo, Pulokolasi, Nikanoo, Timoni, Palamenasi, a Nikolasi waku Antiyoki, ooyo kaindi wakasandukide akutobela Cijuda katanaba musyomi. ⁶ Lino nkamu yakabaleta baalumi aaba kubatumwa. Batumwa bakabakombela akubabikka maanza.

⁷ Lino Majwi aa Leza akamwaika koonse-koonse, awalo mweelwe wabasyomi wakali kuya buvula akukomena mu Jelusalemu. Abalo bapaizi banji bakasyoma.

Kujatwa kwa Sitivini

⁸ Lino Sitivini wakali aluse anguzu zya Leza. Wakali kucita maleele azitondezyo zyanguzu akati kabantu. ⁹ Pele bamwi bantu bakamukazya, bakamukatazya bakali bankamu yacikombelo ca Bantu Baangulukide (mbocakali kwiitwa). Bakali Bajuda bazwa kuminzi ya Sailini a Alekizandaliya, alimwi kwakali bamwi bazwa kuzisi zya Silisiya a Asiya. ¹⁰ Muuya wa Leza wakapa Sitivini busongo bunji cakuti bantu aabo tiibakamuzunda pe. ¹¹ Aboobo bakoongelezya bamwi bantu kuti batamikizye Sitivini kuti, “Twakamumvwa kaamba makani aakusampaula Mozesi a Leza!” ¹² Munzila eeyi bakanyonganya bantu, balupati-pati bacisi, abamayi ba Mulawo. Mpawo bakajata Sitivini akumutola kunkuta. ¹³ Bakaleta bakamboni babeji bakati, “Ooyu muntu lyoonse waamba makani aasampaula ŋanda ya Leza iisalala a Milawo ya Mozesi. ¹⁴ Nkaambo twakamumvwa kaamba kuti Jesu Munazaleta uyoomwaya ŋanda ya Leza akuyoosandula zilengwa nzyaakatupa Mozesi!” ¹⁵ Lino boonse aabo bakakkede munkuta bakalangisisya Sitivini akubona kuti busyu bwakwe bwakozyanya abusyu bwamungelo.