Milimo 24

Paulu mbwaakatamikizigwa a Bajuda

¹ Nikwakamana mazuba osanwe, mupaizi mupati Ananiyasi wakainka ku Sizaliya, wakaya abapati alimwi asimulawo umwi uutegwa Teetulasi. Bakaakulibonya kumweendelezi Filikisi, akulungulula makani aamulandu ngobakali kupa Paulu. ² Paulu naakaitwa, Teetulasi wakapa kaambo kakwe munzila eeyi,

“Nomulemekwa! Busololi bwanu bwabusongo bwakatuletela ciindi caluumuno cilamfu, alimwi zintu zinji zibotu zyeelede zilacitwa mukusumpula akuleta bubotu mucisi cesu. ³ Eezi zintu zili boobu zilatambulika kulindiswe koonse-koonse muziindi zyoonse. Aboobo tulilumbide kapati kulindinywe. ⁴ Pele kwalo nsiyandi kumumanina ciindi canu pe, ndamukumbila kuti mundiswiilile ndipe matongoosi eesu mafwiifwi. ⁵ Twajana kuti muntu ooyu ngusiŋunzuunzu. Utalika lupyopyongano akati ka Bajuda munyika yoonse, alimwi mmusololi wankamu iitegwa Banazaleti. ⁶ Naakasola kusofwaazya ŋanda ya Leza, twakumujata. [Twakakanzide kumubeteka kwiindila mumulawo wesu, ⁷ pele mweendelezi Lisiyasi wakasika akumutola canguzu. ⁸ Amane wakalailila kuti aabo basikumupa twaambo baboole kumbele lyanu.] Kuti naa mwamubuzya ooyu, inga ndinywena lwanu mwalimvwida kuzwa kulinguwe ootu twaambo toonse ntotumwaambila.” ⁹ Abalo Bajuda bakazumina akwaamba kuti toonse twaambo ootu tuli kasimpe.

Paulu mbwaakalikazizya kumbele lya Filikisi

¹⁰ Lino mweendelezi wakoobola Paulu kuti awalo aambe. Eelyo Paulu wakati,

“Ndilizi kuti muli babetesi bacisi cino kwaciindi cilamfu, aboobo ndiliboteledwe kulikazizya kumbele lyanu. ¹¹ Mulakonzya kuziba nobeni kuti, kwainda buyo mazuba aali kkumi aabili kuzwa nindakasika ku Jelusalemu kuzookomba. ¹² Bajuda taakwe nibakandijana kandikazyanya amuntu muŋanda ya Leza, nikuba kundijana kandipyopyonganya bantu pe, nimuba muzikombelo zyabo nikuba kubusena bumwi buyo mumunzi. ¹³ Tabakonzyi kutondezya kuti zintu eezi nzyobanditamikizya mpozili. ¹⁴ Ncendizumina buyo kulindinywe nceeci, ndikomba Leza wabasikale besu kwiindila mukutobela Nzila eeyo njobati njabuzangi. Alimwi ndilazisyoma zintu zyoonse zilembedwe mu Milawo ya Mozesi amumabbuku aabasinsimi. ¹⁵ Ndijisi lulangilo lomwe muli Leza mbuli oolo ndobajisi aaba bali waawa lwabo beni lulangilo oolo ndwakuti boonse bantu, baluleme abataluleme, bayoobusigwa kuzwa kubafu. ¹⁶ Aboobo lyoonse ndasoleka mbuli mbwendikonzya, kuti kandilaamoyo uusalala kumbele lya Leza abantu.

¹⁷ “Lino mukuti ndakali kumbi kwamyaka minji ndakainka ku Jelusalemu kutola mali kubantu bokwesu bacete alimwi akuti ndikape zipaizyo. ¹⁸ Nindakali kucita mulimo ooyu, bakandijana muŋanda ya Leza, kandili ndalisalazya kale. Kwakanyina nkamu yabantu njindakali aayo pe, alimwi kwakanyina lupyopyongano. ¹⁹ Pele kwakali bamwi Bajuda bazwa kucisi ca Asiya, abalo lwabo beni baleelede kuboola akuzoopa kaambo kabo kulindinywe, kuti ambweni inga bajisi mulandu umwi ngobandipede. ²⁰ Nibaba baaba bamwaambile naa bakandijanina mulandu nzi nindakali kubetekwa ankuta yabo. ²¹ Kuli buyo cintu comwe ncindakaamba nindakaimvwi kumbele lyabo. Ndakati, ‘Ndabetekwa andinywe sunu akaambo kakusyoma mukubuka kwabafu!’”

²² Lino Filikisi, mbwaakazi kabotu makani aa Nzila ya Mwami, wakajala amajwi aakuti, “Ndizooukosola mulandu wanu asika mweendelezi Lisiyasi.” ²³ Nkabela wakalailila silumamba wakali kulanga Paulu kuti kamubamba, pele amupe lwaangunuko lwakulikkalila kabotu akuzumizya beenzinyina kuti kabamugwasya kumupa zintu nzyabula.

Paulu kumbele lya Filikisi a Dulusila

²⁴ Lino naakainda mazuba mace, Filikisi wakaboola amukaintu wakwe Dulusila, Mujuda. Filikisi wakatumina kuti Paulu aletwe kulinguwe, eelyo wakazoomuswiilila kaamba zyalusyomo lwamuli Kilisito Jesu. ²⁵ Pele Paulu kacaamba makani aabululami, aakulijata mubuumi, alimwi aabuzuba bwalubeta buboola, Filikisi wakayoowa. Eelyo wakaambila Paulu kuti, “Pe mbubo, koya calino buyo, ndakwiita alimwi ndajana ciindi cibotu.” ²⁶ Namupilusya boobo wakali kulangila kuti antela Paulu inga ulamupa mali, ncaakali kumwiita-ita boobo akwaambaula anguwe.

²⁷ Lino niyakamana myaka yobilo, Poosiyosi Fesitosi wakasika akutola busena bwa Filikisi bwabweendelezi bwacisi. Lino Filikisi mbwaakali kuyanda kubotezya Bajuda, wakasiya Paulu kacili muntolongo.