Milimo 22

¹ “Nobaalumi, bakwesu anomatata, amundiswiilile nkaambo ndiyanda kulyaambilila kulindinywe!” ² Nkabela nibakamvwa kuti waamba mu Cihibulu, bakaumuna, Paulu wakaya anembo akuti,

³ “Mebo ndili Mujuda wini-wini, ndakazyalilwa ku Taasosi wamu Silisiya, pele ndakakomenena momuno mu Jelusalemu. Ndakali sicikolo wa Gameliyeli. Ndakatambula lwiiyo luzwide mu Milawo yabasikale besu, alimwi ndakali munkutwe kuli Leza mbubonya mbomubede anywebo nyoonse sunu aano. ⁴ Ndakali kupenzya bantu batobela Nzila mpya eeyi, nikuba kubajaya. Ndakaanga baalumi abakaintu akubawaala muntolongo. ⁵ Mupaizi Mupati abankuta balakonzya kuzumina kumakani aaya kuti ngakasimpe. Nkaambo mbambabo bakandipa magwalo aakutobela bakwesu Bajuda bakali ku Damasikasi. Eelyo ndakainka ooko kuti ndikaange banzila eeyi mukuti nkabalete ku Jelusalemu kabaangidwe kuti bazoosubulwe.

Paulu mbwaakalungulula kusanduka kwakwe

⁶ “Lino nindakali kuya bweenda munzila iiya ku Damasikasi, ciindi casikati, kwakandimwekela mumuni mupati uuzwa kujulu, wakamwekela busena boonse mpondakabede. ⁷ Mpoonya ndakawida ansi, nkabela ndakamvwa jwi liti, ‘Saulu, Saulu, ino undipenzezya nzi?’ ⁸ Mpawo ndakabuzya kuti, ‘Ino nduweni Simalelaangu?’ Walo wakati kulindime, ‘Ndime Jesu waku Nazaleta ngopenzya.’ ⁹ Aabo baalumi bakali aandime bakaubona mumuni, pele taakwe nibakalimvwa jwi lyayooyo wakali kwaambaula kulindime. ¹⁰ Ndakabuzya kuti, ‘Ino ndicite buti, Mwami?’ Mwami wakati kulindime, ‘Nyamuka, uye mu Damasikasi, oomo uyooambilwa zyoonse nzyoelede kucita.’ ¹¹ Ndakoofwaala akaambo kamumuni uumwekesya, eelyo aabo basilweendoma bakandisololela kukuboko akunjila mumunzi ooyo.

¹² “Ooko kwakali mwaalumi uutegwa Ananiyasi, wakali muntu wa Leza uutobela Milawo, alimwi wakali kulemekwa kapati a Bajuda boonse bakali kukkala mu Damasikasi. ¹³ Wakaza kulindime akwiima munsi lyangu. Wakati, ‘Saulu, mukwesu, bona alimwi!’ Ciindi eeco nciconya ndakakonzya kubona alimwi, ndamulanga. ¹⁴ Nkabela wakati, ‘Leza wabasikale besu wakusala kuti uzibe zyaluyando lwakwe, kuti ubone Mululami wakwe, akuti umumvwe kaamba ajwi lyakwe. ¹⁵ Nkaambo uyooba kamboni wakwe wakwaambila bantu boonse zintu nzyoobona akumvwa. ¹⁶ Ino ucilindila nzi? Nyamuka ulumbaizye zina lya Kilisito. Ubbapatizigwe, usanzigwe kuti zinyonyoono zyako zilekelelwe.’

Paulu mbwaakaitwa kukukambauka kuli bamasi

¹⁷ “Lino ndakabweeda ku Jelusalemu. Lino nindakali kukomba muŋanda ya Leza ndakabona cilengaano. ¹⁸ Ndakamubona Mwami kaamba kulindime kuti, ‘Kofwambaana uzwe mu Jelusalemu, nkaambo bantu kuno tabakooswiilila bumboni bwako bwamakani aangu pe.’ ¹⁹ Ndakati, ‘Iiyi, Mwami, balizi kabotu kuti ndakali kuunka muzikombelo kuyooanga akuuma aabo bakali kusyoma mulinduwe. ²⁰ Alimwi akamboni wako Sitivini naakajaigwa, mebo lwangu ndakaliwo akuzuminana abaabo bakamujaya, alimwi ndime ndakali kulindila zisani zyabaabo bakamujaya.’

²¹ “Lino Mwami wakati kulindime, ‘Koya buyo nkaambo ndiyookutuma kule kuli bamasi.’”

²² Bantu bakaliswiilide Paulu kusikila naakaamba majwi aaya, eelyo bakayoba akupozomoka kuti, “Azwe, jaya! Teelede akupona!” ²³ Bakali kupozomoka kabawaala zisani zyabo mujulu akutataula vu. ²⁴ Mpoonya mweendelezi wabasilumamba ba Baloma wakalailila bantu kuti bamunjizye muŋanda Paulu, wakabalailila akuti bamukwabbaule kutegwa bajane naa nkaambo nzi Bajuda ncibakali kumuvoolozyela boobu. ²⁵ Pele nibakamwaangilide kuti aumwe, Paulu wakaambila umwi mupati walumamba wakaimvwi aafwiifwi anguwe kuti, “Sena cileendelana amulawo kuti nywebo muume muntu Muloma uutanabetekwa akujaninwa mulandu?”

²⁶ Silumamba ooyo naakamvwa, wakaya kumweendelezi akuyoomubuzya kuti, “Ino ninzi ncomuyanda kucita? Uulya mwaalumi Muloma!”

²⁷ Aboobo mweendelezi wakaya kuli Paulu akuyoomubuzya kuti, “Kondaambila, sena uli Muloma?”

Paulu wakaingula kuti, “Iiyi.”

²⁸ Nkabela mweendelezi wakati, “Buloma ndakabuula buya amali manji-manji.”

Pele Paulu wakati, “Mebo mbuzyalwe buya.”

²⁹ Mpoonya bantu aabo bakali kuyanda kumubuzya mibuzyo bakasosoloka, awalo mweendelezi wakayoowa naakaziba kuti Paulu wakali Muloma, akuti wakaangidwe nketani.

Paulu kumbele lyankuta ya Bajuda

³⁰ Lino mweendelezi walumamba wakali kuyanda kuzibisya naa mulandu nzi Bajuda ngobakali kuyanda kupa Paulu. Aboobo mubuzuba bwakatobela wakamwaangununa, alimwi wakalailila bapaizi basilutwe abasinkuta kuti babungane. Eelyo wakaleta Paulu, wamwiimika kumbele lyabo.