Milimo 21

Paulu mbwaakainka ku Jelusalemu

¹ Nkabela twakabalaya akweenda. Nitwakeenda abwato kuzubuka lwizi, twakasika ku Kosi, eelyo mubuzuba bwakatobela twakasika ku Lodisi. Nitwakazwa ooko twakainka ku Patala. ² Ooko twakajana bwato bwakali kuya ku Fenesiya, mpoonya twakanjila mulimbubo akuunka. ³ Lino twakaakusika kubusena nkotwakali kukonzya kubona nsumbu ya Saipulasi, aboobo bwato bwakainda nkoili kulumwensi nsumbu eeyo, mane limwi twaakusika kucisi ca Siliya. Twakaakuzubukila kucito ca Taya, ooko bwato nkobwakaakulongolwedwa zintu. ⁴ Ooko twakajana basyomi mbotwakakkala aabo mvwiki yomwe. Nkabela Muuya Uusalala wakabayubunwida cakali kuyoocitika, eelyo balo bakaambila Paulu kuti atainki ku Jelusalemu. ⁵ Pele ciindi cesu nicakamana, twakalaya akuunka mulweendo lwesu. Nkabela boonse, baalumi, bakaintu abana, bakatusindikila kuzwa mumunzi, nitwakasika kunkomwe yalwizi, twakavuntama akukomba. ⁶ Mpoonya twakalayana akunjila mubwato, nkabela balo bakabweeda kumunzi.

⁷ Alimwi twakatalika lweendo lwesu, twakeenda abwato kuzwa ku Taya kuyoosika ku Pitolemaisi nkutwakaakujuzya bakwesu, akukkala ambabo buzuba bomwe. ⁸ Mubuzuba bwakatobela twakanyamuka akuyoosika kumunzi wa Sizaliya. Lino ooko twakaakuunka kuŋanda yamukambausi uutegwa Filipo, twakaakukkala awe. Wakali umwi wabaalumi bakali ciloba bakasalidwe mu Jelusalemu. ⁹ Wakajisi bana basimbi bone batakanakwatwa, bakali basinsimi. ¹⁰ Nikwakainda mazuba-azuba kwakasika musinsimi uutegwa Agabusi kuzwa kucisi ca Judiya. ¹¹ Nkabela wakaza kulindiswe, wakabweza lutambo lwa Paulu, walyaanga kumaanza akumaulu, eelyo wakaamba kuti, “Mboobu mbwaamba Muuya Uusalala, ‘Mukamwini lutambo oolu uyooangwa munzila iili boobu a Bajuda mu Jelusalemu, bayoomupa mumaanza aabamasi.’”

¹² Nitwakamvwa makani aaya, swebo antoomwe abantu bakooko, twakakombelezya Paulu kuti atainki ku Jelusalemu. ¹³ Pele walo wakatwiingula kuti, “Ino ninzi ncomucita nimulilauka boobu, akutyompya moyo wangu? Ime ndililibambilide kale, kutali buyo kwaangwa mu Jelusalemu, pele akufwa akaambo ka Mwami Jesu.”

¹⁴ Twakakacilwa kumukombelezya kuti atainki. Aboobo twakaleka buyo twakati, “Luyando lwa Mwami alucitwe.”

¹⁵ Nitwakakkala mazuba amwi ooko twakaangaanga twesu akuya ku Jelusalemu. ¹⁶ Basyomi bamwi bazwa mu Sizaliya bakainka aswebo, baakututola kuŋanda yamuntu, nkutwakeelede kusikila, uutegwa Munasoni uuzwa ku Saipulasi. Wakali musyomi kuzwa kaindi.

Paulu mbwaakaswaya Jemusi

¹⁷ Nitwakasika mu Jelusalemu basyomi bakatutambula amaanza obilo. ¹⁸ Nkabela mubuzuba bwakatobela Paulu antoomwe aswebo twakainka kukubona Jemusi, twakaakujana kuti abalo bapati bambungano boonse bakaliwo. ¹⁹ Eelyo Paulu wakabajuzya alimwi wakaambilizya zintu zyoonse buzwide Leza nzyaakacita akati kabamasi mulinguwe. ²⁰ Nibakamana kumuswiilila, boonse bakalumbaizya Leza. Mpoonya bakaambila Paulu kuti, “Ulakonzya kubona, mukwesu, kuti kuli zyuulu-zyuulu zya Bajuda basyoma, aabo balipede cakumaninina mukutobela Milawo. ²¹ Bantu aaba bakaambilwa zyamakani aako kuti wakali kwiisya Bajuda boonse bakkala mumasi abamasi antoomwe, kuti baleke kutobela Milawo ya Mozesi. Alimwi wakali kubaambila kuti batanoopaluli bana babo nikuba kutobela ziyanza zyesu. ²² Lino bantu aaba balamvwa kuti wakasika, ino tucite buti? ²³ Uleelede kucita ncotutikwaambile. Kuli baalumi bone okuno bakakonkezya kuli Leza. ²⁴ Koya ayebo ukalisalazye aabo. Wamana ubabbadelele zyakupa kuŋanda ya Leza, eelyo nobati kalinyoole. Munzila eeyi bantu boonse bayooziba kuti nzibakali kukwaamba tazili zyakasimpe akuti ulabamba ncobeni Milawo ya Mozesi. ²⁵ Lino kumakani aabamasi aabo basyoma, twakabatumina lugwalo lwakubaambila kuti twakaciyeeya kuti tabeelede kulya cilyo cakapaizigwa kumizimo, nikuba kulya bulowa, naa banyama basinwa, alimwi akuti balintantamune kubumambe.”

²⁶ Mpoonya buzuba bwakatobela Paulu wakatola baalumi aabo bone, waakulisalazya antoomwe ambabo. Kuzwa aawo wakanjila muŋanda ya Leza akuzibya bantu zya buzuba bwamamanino mumazuba aakulisalazya, ciindi omwe-omwe wabaalumi aabo nayoopa cipaizyo cakwe.

Paulu mbwaakajatwa muŋanda ya Leza

²⁷ Lino mazuba aali ciloba naakali afwiifwi kumana, bamwi Bajuda bazwa kucisi ca Asiya bakabona Paulu muŋanda ya Leza. Bakakopanya bantu banji akujata Paulu. ²⁸ Bakapozomoka akuti, “No Baisilayeli, amutugwasye! Ooyu ngomuntu uuya buya koonse-koonse kwiisya bantu kuti basampule bantu ba Isilayeli, a Milawo ya Mozesi, alimwi aŋanda ya Leza eeyi. Lino ngooyu waleta bamasi muŋanda ya Leza akusofwaazya busena busalala!” ²⁹ Bakaamba makani aaya nkaambo bakabona umwi mwaalumi uutegwa Tulofimosi uuzwa ku Efesusi, wakali a Paulu mumunzi, bakayeeya kuti Paulu wamutolede muŋanda ya Leza.

³⁰ Nkabela kunyongana kwakamwaika mumunzi oonse, bantu bakazuzaana boonse, bavumpa Paulu akumukwelela aanze lyaŋanda ya Leza. Mpoonya aawo bakajala milyango yayo. ³¹ Bantu aabo bakayanda kujaya Paulu, kwakatuminwa kwaambilizya kumweendelezi wabasilumamba wa Baloma kwaamba kuti muli manyongwe mapati mumunzi oonse. ³² Mpoonya-mpoonya mweendelezi wabasilumamba wakatola basilumamba alimwi abapati babo, wafwambaanina kuunka kubantu baya. Lino bantu nibakamubona uleza abasilumamba, bakaleka kuuma Paulu. ³³ Mpoonya mweendelezi walumamba wakaya kuli Paulu, wamujata, eelyo wakalailila kuti aangwe anketani zyobilo. Mpoonya wakabuzya kuti, “Ino nguni ooyu muntu, alimwi ninzi ncaacita?” ³⁴ Bamwi bakaamba eeci bamwi eeci. Nkaambo kamanyongwe aayo mweendelezi taakaziba cini-cini cakacitika. Aboobo wakalailila basilumamba bakwe kuti batole Paulu kulimbabo. ³⁵ Bakeenda aawe mane kusika azitantilo zyamulyango waŋanda, aawo basilumamba bakanyamuna Paulu nkaambo bantu bakaubingana kapati. ³⁶ Boonse bantu bakali kuya bumutobela akupozomoka kuti, “Jaya!”

Paulu mbwaakalyaambilila

³⁷ Lino kabayanda kumunjizya mukati, Paulu wakaambila mweendelezi walumamba kuti, “Ndikumbila kuti ndikwaambile cimwi cintu yebo.”

Mweendelezi wakati, “Sena ulaamba Cigiliki? ³⁸ Nkokuti toli Muijipiti uulya wakabusizye lupyopyongano mazuba aainda, akusololela zyuulu zyone zyabazangi munkanda?”

³⁹ Paulu wakaingula kuti, “Peepe, mebo ndili Mujuda, ndakazyalilwa mumunzi wa Taasosi, mucisi ca Silisiya. Ndili muzyale wamunzi mupati wabulemu. Akaka ndikumbila kukanana kubantu.”

⁴⁰ Mpoonya mweendelezi wakamuzumizya kwaamba. Eelyo Paulu wakaima amatantilo akutambika janza lyakwe kubantu. Nkabela nibakaumuna, Paulu wakaamba kulimbabo mu Cihibulu,