Milimo 20

Lweendo lwaku Masedoniya aku Akeya

¹ Lino naakamana manyongwe, Paulu wakabunganya basyomi akubaambila majwi aakubayumya-yumya. Mpawo wakabalaya wakainka ku Masedoniya. ² Wakaandulula muzisi eezyo kuya buyumya-yumya basyomi amajwi manji. Waakusika ku Akeya, ³ akukkala ooko myezi yotatwe. Wakali kulibambila kuya kucisi ca Siliya, pele naakaziba kuti Bajuda bakali kumukanza, wakayeeya buyo kubweeda kwiinda mu Masedoniya. ⁴ Sopatee, mwanaa Pilusi, uuzwa ka Beleya, wakainka aawe, aba Alisitakosi a Sekundusi bazwa ku Tesalonika, a Gayosi uuzwa ku Deebe, Timoti, aba Tikikasi a Tulofimosi bazwa kucisi ca Asiya. ⁵ Aaba bakatusaangunina akuyootulindilila kumunzi wa Tilowasi. ⁶ Mbulyakamanina buyo pobwe lya Cinkwa Citakwe Mimena, aswebo twakeenda abwato kuzwa kumunzi wa Filipi. Lino naakamana mazuba osanwe, twakaakubajana ku Tilowasi, nkabela twakaakukkala mvwiki yomwe ooko.

Paulu mbwaakabusya Yutikosi ku Tilowasi

⁷ Mubuzuba butaanzi bwamvwiki twakabungana antoomwe kulya mulalilo wa Mwami. Nitwakamana Paulu wakatalika kwaambaula makani abantu. Nkaambo kakuti wakali kuyanda kuunka mubuzuba butobela wakaambaula mane kusika akati kamasiku. ⁸ Kwakali malambe manji muŋanda yamujulu motwakabungene. ⁹ Alimwi mwakali mulombe uutegwa Yutikosi wakakkede ampulungwido yaŋanda. Nkaambo kakuti Paulu wakatola ciindi cilamfu kaambaula, Yutikosi wakatalika kufukula mane limwi wakoona. Eelyo naakali koona wakatesuka akuwida ansi kuzwida ampulungwido yaŋanda yatatu mujulu. Nibakaakumujana, wakalifwide. ¹⁰ Paulu wakaselukila ansi, waakuliwaala amubili wamulombe akumufukatila. Mpoonya wakaambila bantu kuti, “Mutapengi pe, ulapona!” ¹¹ Lino Paulu wakatanta akubweeda alimwi muŋanda yamujulu. Wakakomona cinkwa walya. Wakaambaula ambabo kwaciindi cilamfu, limwi bwaca, amane wakalaya. ¹² Eelyo bantu bakamutola kuŋanda yokwabo mulombe ooyo kali muumi, alimwi kabakondedwe kapati.

Lweendo lwakuzwa ku Tilowasi kuya ku Miletusi

¹³ Lino twakasaanguna kuunka abwato kuya ku Asosi, ooko nkutwakaakutansikila Paulu mubwato. Wakatwaambilide kucita oobo nkaambo walo wakeenda amaulu kuya nkuko. ¹⁴ Eelyo naakaswaangana andiswe ku Asosi, twakamutansika mubwato akuya kumunzi wa Mitiline. ¹⁵ Bucica buyo twakeenda abwato kuzwa ooko, twakaakusika ku munzi wa Kiyosi. Mubuzuba bwakatobela twakaakusika kumunzi wa Samosi, eelyo bukace alimwi twakaakusika ku Miletusi. ¹⁶ Pele Paulu wakayeeya kuti akainde munsi amunzi wa Efesusi mukuti atasowi ciindi mucisi ca Asiya. Nkaambo wakali kuyanda kufwambaana kusika ku Jelusalemu, kuti naa kacikonzeka kanooli nkuko bwaakusika buzuba bwa Pentekosite.

Paulu mbwaakalaya bapati bambungano yaku Efesusi

¹⁷ Lino kali ku Miletusi Paulu wakatumya mulumbe ku Efesusi, akukumbila bapati bambungano kuti bazooswaangane anguwe. ¹⁸ Nibakasika, Paulu wakati kulimbabo, “Mulizi mbwindakakkala andinywe kuzwa mubuzuba butaanzi mbondakasika mucisi ca Asiya. ¹⁹ Ndakabelekela Mwami cakulitesya akati kamapenzi amause nkaambo kazyakandicita Bajuda. ²⁰ Mulizi kuti taakwe acomwe cintu ncindakamusisila cakali kunoomugwasya nywebo, pele ndakali kumukambaukila akumwiisya antangalala alimwi amumaanda aanu. ²¹ Nkabela ku Bajuda abamasi mbubonya buyo, ndakali kubakumbila kuti beelede kusandukila kuli Leza, akusyoma mu Mwami wesu Jesu.

²² “Lino amubone ndiya ku Jelusalemu, nkaambo Muuya Uusalala mbwaandilailila. Nsizi citikacitike kulindime ooko. ²³ Pele ncendizi buyo ncakuti Muuya Uusalala wakandicenjezya muminzi mipati yoonse kuti ntolongo amapenzi zilandilindila. ²⁴ Pele nsiyeeyeli kuti buumi bwangu mbuyandisi kulindime, pele cipati nkuti ndimanizye mulimo wangu, abutumwa bwakandipa Mwami Jesu, bwakwaambilizya Makani Mabotu aaluse lwa Leza.

²⁵ “Lino ndizi kuti nywebo nyoonse mbindakeendela akukambaukila zyabwami bwa Leza tamukandiboni limbi pe. ²⁶ Aboobo ndaamba cakusinizya sunu obuno buzuba, kuti naa bamwi banu basweeke, ndulwabo beni, mebo nyina mulandu pe. ²⁷ Nkaambo taakwe ncindakamusisa, pele ndakamukambaukila zyoonse Leza nzyayanda. ²⁸ Nkaako kamulibamba lwanu nobeni, alimwi kamububamba butanga boonse oobo Muuya Uusalala mbwamupede kuti mubulange. Amweembele bambungano ya Leza eeyo njaakanununa alufu lwa Mwanaakwe mwini. ²⁹ Ndizi kuti ndazwa, baumpe babutambo, bayoosika akati kanu, nkabela tabakooyomuleka pe. ³⁰ Nikuba akati kanu nobeni, kuyooboola bamwi bayoooamba zyakubeja mukuti ambweni inga balakwela basyomi kulimbabo. ³¹ Aboobo muleelede kulangisisya. Amuyeeye kuti kwamyaka yotatwe ndakaiisya umwi aumwi wanu sikati amasiku amisozi minji.

³² “Lino ndamusiya mumaanza aa Leza amumakani aaluse lwakwe. Alo alakonzya kumuyaka akumupa zileleko eezyo nzyabambila bantu bakwe boonse. ³³ Taakwe nindakalikumbuzya mali niciba cisani camuntu umwi pe. ³⁴ Nywebo nobeni mulizi kuti ndakali kubeleka amaanza aangu aaya kulijanina zyoonse nzindakalikubula anzibakali kubula beenzuma mbotwakali limwi. ³⁵ Ndakamutondezya muzintu zyoonse kuti mukubeleka anguzu tweelede kugwasya aabo batakwe nguzu. Nitucita boobu katuyeeya majwi ngaakaamba Mwami Jesu lwakwe mwini naakati, ‘Kupa kuletela cileleko cipati kwiinda kutambula.’”

³⁶ Eelyo Paulu naakamana kwaamba, wakavuntama ambabo boonse akukomba. ³⁷ Boonse bakali kulila aawo nibakali kumufumbata akumumyonta kukumulaya. ³⁸ Cakabausisya kapati mmajwi ngaakaamba kuti tabaciyoomuboni limbi pe. Nkabela bakamusindikila kuya kubwato.