Milimo 18
Mbwaakacita mu Kolinti
1 Musule akooku, Paulu wakazwa ku Atenesi, wakaya ku Kolinti. 2 Okuya wakaakujana Mujuda uutegwa Akwila, wakazyalilwa kumunzi wa Pontusi. Ooyu muntu amukaintu wakwe Pulisila bakacisikide lino-lino kuzwa kucisi ca Itali, nkaambo Muleli Mupati Kilaudiyasi wakalailila Bajuda boonse kuti bazwe mumunzi wa Loma. Paulu wakainka kuyoobabona, 3 wakaakukkala akubeleka ambabo, nkaambo wakali muluki wa matente mbubonya abalo. 4 Paulu wakali kukanana abantu mucikombelo, Sabata a Sabata, kasoleka kuti Bajuda a Bagiliki bazumine Makani Mabotu.
5 Ciindi Sailasi a Timoti nibakasika kuzwa ku Masedoniya, Paulu wakapa ciindi cakwe coonse kukukambauka, kalungulwida Bajuda kuti Jesu ngo Munanike wa Leza. 6 Nkabela nibakamukazya akutalika kwaamba zintu zitaluleme kulinguwe, walo wakatondezya kutazuminana ambabo kwiindila mukukunkumuna lusuko kuzisani zyakwe akubaambila kuti, “Mwalijaya nobeni! Nyina mulandu pe. Kuzwa sunu ndikukambaukila bamasi.” 7 Mpoonya wakabasiya, walongela kuŋanda yamwaalumi umwi wamasi uutegwa Titiyasi Jusitusi, wakali muntu uukomba Leza. Ŋanda yakwe yakalibambene acikombelo. 8 Eelyo mwaalumi uutegwa Kilisiposi, mweendelezi wacikombelo wakasyoma mu Mwami antoomwe amukwasyi wakwe oonse. Alimwi Bakolinti banji bakamvwa mulumbe akuusyoma, eelyo bakabbapatizigwa.
9 Masiku amwi Paulu wakabona cilengaano. Mwami Jesu wakati, “Utayoowi, pele kokambauka buyo, utaleki pe, 10 nkaambo mebo ndili aayebo. Taakwe muntu naba omwe uutikucise. Mumunzi ooyu ndijisi bantu banji kapati.” 11 Nkabela Paulu wakakkala ooko mwaka acisela kaiisya bantu majwi aa Leza.
12 Lino Galiyo naakabikkwa bweendelezi bwacisi ca Akeya, Bajuda bakabungana, bajata Paulu akumutola kunkuta. 13 Bakati, “Ooyu muntu usoleka kusungilizya bantu kukomba Leza munzila iiteendelani amulawo wesu!”
14 Paulu naakatitalike kwaamba, Galiyo wakaambila Bajuda kuti, “Nikwali kuti muntu ooyu watyola mulawo naa wabisizya mweenzinyina nindakaswiilila kaambo kanu no Bajuda. 15 Pele nkaambo makani aaamba zyamajwi, amazina buyo aazintu zyamilawo yanu, nywebo amulibonene nobeni. Mebo nsikonzyi kuba mubetesi wazintu zili boobo pe!” 16 Eelyo wakabatanda munkuta. 17 Mpoonya boonse bakajata mwaalumi uutegwa Sositinesi, wakali ngomweedelezi wacikombelo, bakamuuma kumbele lyankuta nkukonya. Pele eeco acalo taakwe anicakapenzya Galiyo abuniini.
Paulu mbwaakabweeda ku Antiyoki
18 Paulu wakacilikkede abasyomi mu Kolinti mazuba amwi manji. Kuzwa aawo wakabasiya, wakanjila mubwato buya kucisi ca Siliya antoomwe a Akwila a Pulisila. Pele ku Senkileye katanainka abwato, wakanyoola mutwe nkaambo wakalikonkezezye kuli Leza. 19 Nkabela bakasika kumunzi wa Efesusi, eelyo Paulu wakasiya Akwila a Pulisila, walo wakanjila mucikombelo, waakutalika kwaambaula a Bajuda. 20 Nibakamukumbila kuti kacikkede ambabo kwaciindi cilamfu, wakakaka. 21 Pele naakabalaya wakabaambila buyo kuti, “Naa Leza kayanda ndiyooboola alimwi kuno kulindinywe.” Mpoonya wakazwa mu Efesusi, wakainka abwato.
22 Nkabela naakaakusika kumunzi uutegwa Sizaliya, wakaya ku Jelusalemu kuyoojuzyanya abambungano ya Mwami, amane wakaya ku Antiyoki. 23 Naakakkala-kkala ooko, wakazwa akuya kucisi ca Galatiya aca Fuligiya kuya buyumya-yumya basyomi boonse.
Milimo ya Apolosi mu Efesusi amu Kolinti
24 Umwi Mujuda uutegwa Apolosi, wakazyalilwa mumunzi wa Elekizandaliya, wakasika ku Efesusi. Wakali kunongosola kwaamba, alimwi wakalaazi kapati Malembe. 25 Wakaliiisidwe kabotu munzila ya Mwami, alimwi mukusungwaala kupati wakali kwiisya zya Munanike wa Leza buluzi. Nikubaboobo wakazi buyo zyalubbapatizyo lwa Joni. 26 Nkabela wakali kwaamba cabusicamba mucikombelo. Lino Akwila a Pulisila nibakamumvwa, bakamutola kuŋanda yabo akuyoomupandulwida kabotu zya Nzila ya Leza. 27 Apolosi naakayeeya kuya kucisi ca Akeya, basyomi bamu Efesusi bakamulembela lugwalo lwakutolelezya kubasyomi bakali mu Akeya, kubaambila kuti bamutambule kabotu. Naakaakusika ooko, wakaakugwasya kapati aabo bakali basyomi kwiindila muluse lwa Leza. 28 Awalo wakakazya Bajuda antangalala, katondezya kuzwa mu Malembe kuti Jesu ngo Munanike wa Leza.