Milimo 17
Mbobakacita mu Tesalonika
1 Lino bakeenda akwiinda mumunzi wa Amfipolisi amu Apoloniya mane baakusika ku Tesalonika. Ooko kwakali cikombelo ca Bajuda, 2 eelyo mbuli cilengwa cakwe, Paulu wakanjila mucikombelo. Nkabela ooko wakali kwaambila bantu zya Malembe kwa Masabata otatwe. 3 Wakali kubapandulwida Malembe akutondezya kuzwa mulingawo kuti Munanike wa Leza wakali kweelede kupenga akubusigwa kuzwa kubafu. Paulu wakali kuti, “Jesu ooyu ngwemwaambila, ngonguwe Munanike wa Leza.” 4 Bamwi bakalamwa akuzumina, aboobo bakatobela Paulu a Sailasi, ankamu imwi mpati ya Bagiliki bakali kukomba Leza yakabatobela, antoomwe abakaintu banji bakazizilwe kapati.
5 Pele Bajuda bamwi bakaba aamunyono, nkabela bakabunganya nkamu yazidakwa nzibakali kujana mumigwagwa. Aboobo bakanyonganya munzi oonse akuyoofumpa ŋanda ya Jasoni, baya bulangaula Paulu a Sailasi kuti babatole kubantu. 6 Nibakabona kuti tabako, bakajata Jasoni abamwi basyomi, babakwelaanya kubapati bamunzi akupozomoka kuti, “Bantu baya, baya bucita manyongwe koonse-koonse. Lino baza kumunzi wesu! 7 Jasoni ooyu nguubabamba muŋanda yakwe. Batyola milawo ya Muleli Mupati waku Loma. Baamba kuti kuli aumbi mwami, wiitwa kuti Jesu.” 8 Lino majwi aaya akapyopyonganya bantu boonse antoomwe abapati bamunzi. 9 Bapati aabo bakalunzya Jasoni abeenzinyina mweelwe wamali uuyandika kuti baangununwe, mpoonya bakabaleka.
Mbobakacita mu Beleya
10 Lino mbukwakasiila buyo, basyomi bakatumina Paulu a Sailasi kumunzi wa Beleya. Nibakaakusika, bakaya kucikombelo ca Bajuda. 11 Bantu baku Beleya bakali aamyoyo yakumvwisya kwiinda baku Tesalonika. Bakayandisya kuswiililisya makani amyoyo iimaninide, alimwi bakali kubalulula akwiiya Malembe buzuba abuzuba kuti babonesye naa eezyo nzyaakali kwaamba Paulu zyakali zyakasimpe ncobeni. 12 Nkabela Bajuda banji bakasyoma, alimwi a Bagiliki banji, baalumi abakaintu bazizilwe bakasyoma. 13 Pele Bajuda baku Tesalonika nibakamvwa kuti Paulu wakakambauka majwi aa Leza aku Beleya bakasika kuzoonyonganya akukopanya bantu. 14 Cakufwambaana basyomi bakatumina Paulu kuya kulwizi, pele Sailasi a Timoti bakacaala mu Beleya. 15 Lino baalumi bakasindikila Paulu bakaakumusisya mane ku Atenesi. Bamane bakabweeda ku Beleya, kabajisi malailile ngaakabapa Paulu aakuti Sailasi a Timoti bafwambaane kuboola kulinguwe.
Paulu mbwaakacita mu Atenesi
16 Paulu naakacili kulindila Sailasi a Timoti mu Atenesi, wakabijilwa kapati kubona munzi oonse mbuwakazwide baleza bapange mbobakali kukomba bantu. 17 Aboobo mucikombelo wakali kwaambilana a Bajuda alimwi abamasi bakali kukomba Leza, amwalo muzisambalilo wakali kwaambaula buzuba abuzuba abantu bakali kuboola mumo. 18 Bamwi bantu basongo baitwa kuti Baipikuleya abamwi bamayi baitwa kuti Basitoyiki bakakazyanya anguwe. Bamwi bakati, “Ino ooyu uutaiide usola kwaamba nzi?”
Bamwi bakati, “Uboneka anga waamba makani aabaleza bamasi.” Bakaamba boobo nkaambo Paulu wakakambauka makani aa Jesu aabubuke bwabafu. 19 Nkabela bakatola Paulu kunkanzo iitwa kuti Aleopagasi, baakuti kulinguwe, “Tuyanda kuziba lwiiyo lupya oolu ndoiisya. 20 Zimwi zintu yebo nzyoiisya tatuna kuzimvwide mbotwakabeda pe, nzyeenzu kulindiswe. Aboobo tuyanda kuziba naa zyaamba nzi.” 21 (Nkaambo baku Atenesi abeenzu bakalongelede mumunzi ooyu lyoonse bakali kuyandisya kuswiilila akukanana makani mapya.)
22 Lino Paulu wakaima kumbele lyabantu kunkanzo akuti, “Nywebo nobaalumi bamu Atenesi ndabona kuti muli basungu kukomba. 23 Nkaambo nindakali kweendeenda mumunzi wanu, nindakali kulanga mumasena oomo momukombela, ndakajana cipaililo cilembedwe kuti, ‘Kuli Leza Uutazizilwe.’ Aboobo ooyo ngomukomba buyo kamutamuzi ngonguwe ngwenjanda kumwaambila lino. 24 Leza ooyu, nguwakalenga nyika azintu zyoonse zili mulinjiyo. Ngo Mwami wajula anyika, nkokuti takkali mumaanda aayakwa amaanza aabantu pe. 25 Alimwi bantu tabakonzyi kumubelekela amaanza mbuli kuti ubulide cintu. Nkaambo walo mwini nguutupa buumi amuuya ngotuyoya, azimwi zyoonse. 26 Alimwi kuzwa kumuntu omwe ngwaakalenga, nkukwakazwa misyobo yabantu, akubacita kuti bakkale munyika yoonse. Walo lwakwe mwini nguwakabamba ziindi zyabuumi bwabo ankobayookkala. 27 Wakacita oobo kutegwa kuti bakakonzye kumulangaula, kuti ambweni inga balamuziba. Kwalo Leza tali kule kuzwa kuluumwi aumwi wesu pe. 28 Tee kayi bakati,
‘Mulinguwe motuponena, motweendela, motubede.’
Mbubonya mbobakalemba bamwi basongo banu kuti,
‘Aswebo tuli bana bakwe.’
29 Lino mbuli mbotuli bana ba Leza, tatweelede kuyeeya kuti Leza ulakozyanyisigwa abaleza bapange bangolida, naa nsiliva, niliba bbwe lyakabezwa cabuuya alimwi akucitwa mumaanu aabantu. 30 Leza wakalekelela bantu ciindi nibatakamuzi, pele sunu ulabalailila boonse mumasena oonse kuti beempe. 31 Nkaambo Leza ulibambide kale buzuba mbwatizoobeteke nyika yoonse mubululami kwiindila mumuntu ooyo ngwaakasala. Leza wakatondezya kubantu boonse kuti ooyo muntu ngonguwe ngwaakasala nkaambo wakamubusya kuzwa kubafu!”
32 Aawo nibakamvwa kuti Paulu waamba makani aakubuka kuzwa kubafu, bamwi babo bakamuseka, pele bamwi bakati, “Tuciyanda kuzookumvwa alimwi kumakani aaya.” 33 Paulu wakazwa ooko wainka. 34 Bamwi bakaba bakwe, basyoma. Akati kabantu aabo kwakali umwi uutegwa Dayonisiyosi. Ooyu wakali wankamu ya Aleyopagasi. Alimwi kwakali umwi mukaintu uutegwa Damalisi, alimwi abamwi bakasyoma.