Mika 6

Mulandu wa Baisilayeli

¹ Lino amuswiilile ncaamba Mwami Leza ulati, “Amwiime, amukazye mulandu wanu kumbele lyazilundu, tulundu atuswiilile nzyomuyanda kwaamba.

² “Amumvwe, nywebo nozilundu, mulandu Mwami Leza ngwapa, amuswiilile nywebo nontalisyo zyanyika. Mwami Leza wapa bantu bakwe mulandu, waamba mulandu wa Baisilayeli.

³ “Nobantu bangu, ino ndakamucita nzi? Ino ndamukatazya buti? Amundiingule. ⁴ Ndakamugwisya mu Ijipiti akumunununa kuzwa munyika yabuzike. Ndakatuma Mozesi kuti amusolwede antoomwe a Aloni a Miliyamu. ⁵ Nobantu bangu, amuyeeye Balaki Mwami wacisi ca Mowabu ncaakamulailide ambuli Balaamu mwanaa Beyo mbwaakaingula. Amuyeeye lweendo lwanu kuzwa ku Syitimu kuyoosika ku Giligali, kutegwa muzibe milimo ya Mwami Leza iiluleme.”

Ziyanda Mwami Leza

⁶ Ino nkaletelezye nzi kumbele lya Mwami Leza ndaakufugama kumbele lya Leza uulemekwa? Sena nkaboole azipaizyo zyakutenta zyaboombe bamwaka omwe? ⁷ Sena Mwami Leza uyoobotelwa kumuletela bagutu bali zyuulu-zyuulu alimwi amilonga yamafuta iili zyuulu zili kkumi? Sena ndikapaizye mwanaangu wakusaanguna akaambo kansotoko zyangu, mwana ngwendilizyalila nkamupaizye akaambo kazinyonyoono zyamoyo wangu? ⁸ Wakakutondezya kale cintu cibotu omuntu. Ino ncinzi Mwami Leza ncayanda kuti kocita? Ncakuti ucite cilule akuba aaluyando lutamani akweenda cakulibombya antoomwe a Leza wako.

⁹ Amuswiilile! Mwami Leza waambila munzi, kuti kuyoowa zina lyakwe mbobusongo. Amuswiilile ooyo uujisi musako ayooyo wakamupa. ¹⁰ Sena uyeeya kuti inga ndaluba yebo omusyobo mubi akaambo kamali aali muziyobwedo zyako nzyookajana mubumpelenge amukupimya kasebyo kasyoonto kasinganyizidwe? ¹¹ Sena ndeelede kuleka muntu uujisi zipimyo zyalucengo ankomo yamyeelwe yakubeja? ¹² Bantu bawo bavubide lupyopyongano, bantu bawo mbabeji, milaka yabo ilaamba zyakucenga. ¹³ Nkaako ndatalika kumunyonyoona, ndimunyonyoone akaambo kazinyonyoono zyanu. Muyoolya, pele tamukakkuti, munooyocifwide nzala. ¹⁴ Muyooyobola, pele taakwe aciyoobambwa, nkaambo zyoonse nzyomubamba ziyootolwa abasinkondonyoko ¹⁵ Muyoosyanga pele taakwe ncomuyootebula, muyooenga mafuta aaoliva pele mafuta aayo tamukaanani pe, muyoolyatauka nsaansa, pele waini tamukuunywi. ¹⁶ Nkaambo mwakatobela milimo mibi yamwami Omuli, amilimo mibi yakali kucita baciinga ca Ahabu akutobela zilengwa zyabo. Nkaako njoomulekelezya kutegwa mukanyonyoonwe, bantu banu bayoosampaulwa, misyobo iyoomusampaula kapati.