Mika 3

Basololi abasinsimi mbubakanyemenwa

¹ Mpawo ndakati, “Amuswiilile nywebo nobasololi babantu ba Jakobo, nywebo nobaleli bamusyobo wa Isilayeli. Sena tamuyandi kuziba zyabululami, ² nywebo nomusulaika bubotu akuyanda bubi, nywebo nomufunda bantu bangu, nomugwisya nyama yamibili yabo kuzwa kumafuwa aabo! ³ Mulya bantu bangu bulanga, mulabafunda akutyoloola mafuwa aabo, mulabatemauna mbuli kuti ninyama yakukanga mucikangilo, mbuli nyama yakujika mucibiya.” ⁴ Eelyo bayoolilila Mwami Leza, pele takabainguli pe. Ciindi eeco uyoobayuba, akaambo kabubi mbubakacita.

⁵ Mboobu mbwaamba Mwami Leza ulati, “Pele kwaamba basinsimi aabo basowa bantu bangu, kuti naa umwi wabasowa, baambilizya kuti kuli luumuno. Kuti naa taciti boobo, balibambilila kumulwana. ⁶ Nkaako busiku buyoomuboolela, tamukaboni zilengaano, mudima uyoomusikila cakuti tamukasondi limbi. Zuba liyoobbilila basinsimi, buzuba buyooba mudima kulimbabo. ⁷ Basinsimi bayoousigwa nsoni, basondi bayoofwa bweeme. Bayoolivumba kumeso nkaambo Leza takabainguli pe.”

⁸ Pele mebo, ndizwide nguzu zya Muuya wa Mwami Leza, cakuti kwiindila mubululami amunguzu ndakonzya kwaamba zyansotoko zya Jakobo, azinyonyoono zya Isilayeli. ⁹ Amumvwe ceeci nywebo nobasololi bamusyobo wa Jakobo, nywebo nobaleli bamusyobo wa Isilayeli, nomuubaula bululami, akupilinganya ziluleme, ¹⁰ nomwakayaka Ziyoni mukutila bulowa, amunzi wa Jelusalemu mububi. ¹¹ Basololi bawo balabeteka mukujana kuti bajane cisinkamulomo, bapaizi bawo balaiisya kuti babbadelwe, basinsimi bawo balaamba zintu zibotu ziyoocitika kuti bajane mali. Nikuba boobo basyomede Mwami Leza akuti, “Sena Mwami Leza tali akati kesu? Taakwe mapenzi aayootusikila.”

¹² Nkaako akaambo kandinywe, munzi wa Ziyoni uyoolimwa mbuli muunda, Jelusalemu uyooba cilwi camafuse, kalundu kaŋanda ya Leza kayooba citantaala ciyoovumbililwa alumpote.