Mika 1

Majwi Mwami Leza ngaakaambila Mika

¹ Ngaaya majwi Mwami Leza ngaakapa Mika waku Molesyeti mumazuba aakulela kwa Jotamu, Ahazi a Hezekiya bami bacisi ca Juda. Wakabona cilengaano cakali kwaamba zyaminzi ya Samaliya a Jelusalemu.

² Amuswiilile nywebo nobantu boonse, koteelela onyika antoomwe abantu

boonse bali mulinjiyo, kutegwa Mwami Leza aambe zyamulandu wanu,

Mwami aambe kuzwa muŋanda yakwe iisalala.

³ Amubone, Mwami Leza ulaboola kuzwa mubusena bwakwe,

waboola ansi akweendeenda azilundu zyanyika.

⁴ Zilundu zileenzemuka kunsi aamaulu aakwe, aalo makkuti alaanduka

akweenzemuka mbuli bunzuka bwatemekwa mulilo,

mbuli maanzi aakunkila kunselelo.

⁵ Eezi zyoonse zyakacitika akaambo kansotoko zya Jakobo, akaambo kazinyonyoono zyamusyobo wa Isilayeli. Ino nsotoko zya Jakobo ninzi? Sena tabali bantu bamu Samaliya? Ino malende aabamu Juda ali kuli? Sena taali mu Jelusalemu? ⁶ “Nkaambo njoocita kuti munzi wa Samaliya ube cilwi camafuse, ube busena bwamyuunda yamisaansa. Mabwe aawo njooasowela mukkuti, ntalisyo zyawo ziyoosyaala antangalala. ⁷ Mituni yawo yoonse iyootyoloolwa, zipego zyoonse zyacikombelo cawo ziyootentwa amulilo, njoonyonyoona zikozyanyo zyawo zyoonse. Lino mbokunga wakajana zipego eezi mukukomba baleza, abalo basinkondonyina bayoozisaala kuti bakazikombe.”

Kulila akweema

⁸ Akaambo kaceeci ndilalila akweema, ndileendeenda nketasamide ndyasyo kandili cintanda. Ndauula mbuli mwaaba akulila mbuli tumba. ⁹ Nkaambo cilonda cawo tacisilikiki, lino caboolela cisi ca Juda. Casika kumulyango wabantu, kumunzi wa Jelusalemu. ¹⁰ Mutakacaambi mu Gati, mutalili pe. Mu Betiofula amubumbuluke mulusuko. ¹¹ Amweende acintanda mukuusa nywebo nomukkala mu Syafi. Aabo bakkala mu Zaanani tabakazwi. Bamu Betiezeli balalila, nkaambo bali mulinguwo tabacikwabilidwe. ¹² Aabo bakkala mu Maloti balaalabana mukucisa, balindila kuti bavunwe, nkaambo mapenzi aazwida ku Mwami Leza, asika kumulyango wa Jelusalemu. ¹³ Nywebo nomukkala mu Lakisyi, amwaange cipani cankalaki. Ndinywe mwakatalisya cinyonyoono kumunzi wa Ziyoni, nkaambo nsotoko zya Baisilayeli zyakajanwa mulindinywe. ¹⁴ Nkaako uyoopa zipego zyakulayana ku Molesyetigati. Munzi wa Akizibu uyoolibonena kuti ngwalucengo kubami bamu Isilayeli.

¹⁵ Ndiyoomuletela muzundi nywebo nomukkala mu Malezya. Ooyo uuli ngobulemu bwa Isilayeli uyooboola ku Adulamu. ¹⁶ Amulinyoole mukulila akaambo kabana banu bayandwa, amulikulule mube alubala mbuli lwasikube, nkaambo bayoogwisigwa kulindinywe akutolwa mubwaange.