Mateyo 9

Jesu mbwaakaponya muntu wakayuminide mubili

¹ Lino Jesu wakanjila mubwato wakazubuka lwizi akusika kumunzi wokwabo. ² Mpoonya baalumi bamwi bakamuletela mulema wakayuminide mubili, wakalede amacila. Jesu naakabona lusyomo lwabo wakati kumulwazi, “Koba aacamba mwanaangu zinyonyoono zyako zyalekelelwa.”

³ Mpawo bamwi bamayi ba Mulawo bakayeeya muli cabo beni bati, “Ooyu muntu usampaula Leza.”

⁴ Pele Jesu wakaziba ncibaali kuyeeya eelyo wakati, “Ino nkaambo nzi nimuyeeya bubi mumyoyo yanu? ⁵ Ino ncili citete kwaamba kuti, ‘Zinyonyoono zyako zyalekelelwa’ naa ‘Nyamuka enda?’ ⁶ Pele ono njanda kuti muzibe kuti Mwanaa Muntu ulijisi nguzu munyika zyakulekelela zinyonyoono.” Mpoonya wakaambila yooyo wakayuminide mubili kuti, “Nyamuka, bweza macila uye kuŋanda yako!”

⁷ Ndilyonya wakapona akunyamuka, waya kuŋanda yakwe. ⁸ Bantu baya nibakabona cakacitika bakayoowa, bakalumbaizya Leza ooyo wakapa bantu nguzu zili boobu.

Jesu mbwaakaita Mateyo

⁹ Lino Jesu naakazwa ooko, wakabona mwaalumi uutegwa Mateyo kakkede amulimo wakwe, Jesu wakati, “Nditobele.” Mpoonya wakanyamuka akumutobela.

¹⁰ Jesu naakali kulya muŋanda ya Mateyo, basimitelo abatakali kubamba milawo ya Mozesi bakalya antoomwe anguwe abasikwiiya bakwe. ¹¹ Babone buyo boobo, Bafalisi bakati kuli basikwiiya ba Jesu, “Ino nkaambo nzi mwiiyi wanu ulalya aantoomwe abantu bali boobu?”

¹² Pele Jesu naakamvwa boobo, wakati kulimbabo “Teensi baabo baumi bayanda musilisi, ccita aabo baciswa. ¹³ Kamuya mukaiye ncaaamba majwi aa Leza aati, ‘Ndiyanda lweengelelo kutali cipaizyo pe?’ Nkaambo nsiindakazida kwiita aabo mbomuyeeya kuti mbalulami ccita basizinyonyoono.”

Mbubakabuzya zyakuliimya kulya

¹⁴ Kuzwa waawo basikwiiya ba Joni mubapatizi bakasika kuli Jesu akumubuzya kuti, “Ino nkaambo nzi kanji-kanji swebo a Bafalisi tulaliimya kulya kakuli basikwiiya bako tabaliimyi pe?”

¹⁵ Jesu wakabaingula kuti, “Sena beenzinyina sibwiinga balakonzya kulila ciindi nacili ambabo? Peepe, nikuba boobo ciyoosika ciindi basinkondonyina nibayoomutola sibwiinga, ndendilyo beenzinyina nibayooliimya kulya mukuusa.”

¹⁶ Jesu wakaya ambele akuti, “Taakwe muntu uusuma cigamba cacisani cipya kucisani cakaindi. Nkaambo cigamba eeco cilamonkola cisani, nkabela cimonko caco cilakomenesya. ¹⁷ Nikuba kutila waini munkomo zyazikutu zyakaindi, kuti naa wacita boobo, zikutu zilaanduka, waini ulasoomoka, azyalo nkomo zicinyina mulimo. Tee kayi waini mupya utilwa munkomo mpya, nkabela zyoonse zilayobolwa kabotu.”

Jesu mbwaakabusya mwana musimbi amukaintu wakaguma cisani ca Jesu

¹⁸ Jesu kacaamba boobo kwakasika mweendelezi wacikombelo umwi wakamufugamina wati, “Mwanaangu musimbi wafwa lino-lino. Ndakukomba uboole uzoobikke maanza aako alinguwe, eelyo ulapona.”

¹⁹ Mpoonya Jesu wakanyamuka, abasikwiiya bakwe bakamutobela.

²⁰ Lino umwi mukaintu wakali kuciswa kalobola kwamyaka kkumi aibili, wakasika kusule akuguma moombe wacisani cakwe. ²¹ Wakacita oobo nkaambo wakalizi mumoyo kuti, “Kufumbwa buyo kuti naa ndaguma cisani cakwe, ndilapona.”

²² Mpawo Jesu wakacebuka, naakamubona wakati kulinguwe, “Baama koba aacamba lusyomo lwako lwakuponya.” Mpoonya aawo wakapona kuzwa kubulwazi bwakwe.

²³ Lino Jesu naakasika kuŋanda yamweendelezi wakabona basimitetele ankamu yabantu kaboomoka. ²⁴ Mpawo wakati, “Amuzwe nkaambo musimbi ooyu tafwide, woona buyo.” Mpoonya bantu bakamuseka. ²⁵ Ciindi nkamu niyakazwa, wakanjila munanda akujata mufu janza, mpawo wakabuka. ²⁶ Mpuwo eeyo yakamvwigwa koonse-koonse.

Jesu mbwaakaponya boofu bobilo

²⁷ Lino Jesu naakazwa ooko, balombwana boofu bobilo bakaletwa kabazabumutobela, kaboongolola kabati, “O Mwanaa Devedi kotweengelela.” ²⁸ Ciindi naakanjila muŋanda imwi aabo balombwana bakasika kulinguwe. Jesu wakati kulimbabo, “Sena mulasyoma kuti eeci ndakonzya kucicita?” Balo bakaingula kuti, “Iiyi O Mwami.” ²⁹ Mpoonya Jesu wakaguma meso aabo kumwi kati, “Acibe kulindinywe mbubonya mbumwasyoma.” ³⁰ Mpoonya aawo bakakonzya kubona. Eelyo Jesu wakabalailila kuti, “Kutabi naba muntu omwe uutizibe eeci pe!” ³¹ Nikuba boobo bakainka kabaya bumwaya mpuwo yakwe mucisi eeco coonse.

Jesu mbwaakaponya syaataambi

³² Lino bazwe buyo balombwana aabo, kwakaletwa kuli Jesu syaataambi wakanjidwe muuya mubi. ³³ Jesu naakaugwisya muuya mubi, mwaalumi syaataambi wakaambaula. Eelyo nkamu yabantu yakagambwa yakati, “Kunyina nicakacitikide cili boobu mu Isilayeli pe.” ³⁴ Bafalisi bakati, “Ulagwisya myuuya mibi muzina lyamupati wamyuuya mibi.”

Jesu mbwaakababeda aalubomba bantu

³⁵ Lino Jesu wakeenda koonse-koonse, muminzi atunzi kaya bwiisya muzikombelo zya Bajuda akukambauka Makani Mabotu aazyabwami bwa kujulu, kumwi ooku kasilika malwazi amaciswe oonse aakabajisi. ³⁶ Lino naakabona makamu aabantu, wakaba aalweetelelo, nkaambo bakali katede akupenga, mbuli mbelele zitakwe mweembezi. ³⁷ Mpoonya wakati kuli basikwiiya bakwe, “Butebuzi bwavula, pele basikutebula baceya. ³⁸ Nkaako amukombe ku Mwami wabutebuzi kuti atume basikutebula bazikumutebwide.”