Mateyo 8
Jesu mbwaakaponya sicinsenda
1 Ciindi Jesu naakaseluka kuzwa acilundu, bantu banji bakamutobela. 2 Eelyo sicinsenda wakasika kulinguwe akumufugamina wati, “O Mwami, kuti naa koyanda, ulakonzya kundiponya.”
3 Mpoonya Jesu wakatandabika janza akumuguma wati, “Ndayanda, pona!” Mpoonya wakaponyezegwa. 4 Mpawo Jesu wakati kulinguwe, “Swiilila, utaambili muntu naba omwe makani aaya pe. Pele saanguna ukalitondezye kumupaizi, ukape cipo mbuli mbwaakalailila Mozesi, cikabe citondezyo kuli boonse kuti wapona ncobeni.”
Jesu mbwaakaponya mubelesi wasilutwe mupati
5 Lino Jesu naakanjila mu Kapenaumu, silutwe umwi wabasinkondo wakasika kulinguwe. Wamukumbila wati, 6 “O Mwami, mubelesi wangu ulilede kuŋanda ulaciswa kapati.”
7 Jesu wakati kulinguwe, “Ndilaboola nzikumuponye.” 8 Pele silutwe ooyo wakamwiingula kuti, “O Mwami, nseelede kuti unjile muŋanda yangu. Nkwaamba buyo majwi eelyo mubelesi wangu ulapona. 9 Nkaambo ambebo ndimuntu weelede kutobela malailile abalupati-pati bangu, alimwi ndijisi basilumamba aabo mbelailila. Naakuti, ndaambila umwi kuti ‘Koya,’ ulainka, aumwi kuti, ‘Koza’ ulasika. Akumuzike wangu ndaamba kuti, ‘Cita eeci,’ ulacicita.”
10 Ciindi Jesu naakamvwa boobo, wakagambwa, eelyo wakati kuli baabo bakali kumutobela, “Ncobeni njanda kumwaambila kuti, ‘Taakwe naba omwe mu Isilayeli uusyoma mbuli yooyu.’ 11 Banji bayooboola kuzwa kujwe akumbo kuti bazoolye antoomwe a Abulahamu, Izaka a Jakobo mubwami bwakujulu. 12 Pele aabo bakeelede kuba mubwami oobo bayoosowelwa anze mumudima uusiya mbi, nkabela ooko bantu bayoolila akuluma ntwino mumapenzi.” 13 Naakamana Jesu wakati kuli silutwe, “Koya acicitike mbubonya mbuli mbosyoma.” Nkabela mubelesi wakwe wakapona ciindi nciconya eeco.
Jesu mbwaakaponya bantu banji
14 Lino Jesu naakanjila muŋanda ya Pita, wakabona banyinazyala Pita kabalede, kabaciswa mubili kuupya kapati. 15 Wakabajata janza, mpoonya bakapona, mpawo bakabuka babakutaukila.
16 Nikwakaba kumangolezya bakamuletela bantu banji bakanjidwe myuuya mibi, nkabela wakali kugwisya myuuya amajwi buyo. Jesu wakabaponya aabo boonse bakali balwazi. 17 Wakacita eezi nkaambo mbombubo musinsimi Izaya mbwaakaamba kuti, “Walo wakagwisya zitucisa akuponya malwazi eesu.”
Zyakutobela Jesu
18 Lino Jesu naakabona makamu aabantu banji aakamuzingulukide, wakalailila basikwiiya bakwe kuti balandukile mutala limwi lyalwizi. 19 Mpoonya umwi mwiiyi wa Mulawo wakasika akuti kulinguwe, “O Mwiiyi, ndiyookutobela kufumbwa nkoyooinka.”
20 Jesu wakaingula kuti, “Bamwaaba balijisi mena abayuni balijisi ziteente, pele Mwanaa Muntu taakwe mpoona pe.”
21 Umwi wabasikwiiya bakwe wakati kulinguwe, “O Mwami, ndali kuyanda kuya kukuzikka taata.”
22 Jesu wakaingula kuti, “Peepe nditobele, kobaleka bafu bazikkane muli cabo.”
Jesu mbwaakaumuzya guwo
23 Lino naakanjila mubwato, basikwiiya bakwe bakainka awe. 24 Mpawo kwakabbubbula guwo mulwizi, cakuti mayuwe akali kunjila mubwato. Jesu wakali koona, 25 basikwiiya bakamubusya bati, “Mwami tuvune tulaba notuunkila!”
26 Eelyo wakati kulimbabo, “Nywebo nobalusyomo luniini, nkaambo nzi nimuyoowa?” Mpoonya wakanyamuka akukalalila guwo amayuwe kuti zibatame bataa! 27 Nkaako basikwiiya bakagambwa kapati bakati, “Ino muntu nzi uunga guwo amayuwe alamuswiilila?”
Jesu mbwaakaponya baalumi bobilo bakanjidwe myuuya mibi
28 Lino naakalandukila mutala, kucisi ca Bagadala, kwakamuswaana banjidwe myuuya mibi bobilo, bakazwa kunamaumbwe. Bakali bakali, tiikwakali muntu wakali kukonzya kwiinda munzila eeyo. 29 Mpoonya bakapozomoka kabati, “Ino uyanda kutucita nzi yebo O Mwanaa Leza? Sena wazida kutupenzya ciindi kacitanasika?”
30 Lino butanga bwangulube bwakali kucela aalaale kuzwa kulimbabo. 31 Aboobo myuuya mibi yakakumbila Jesu yati, “Kuti naa watugwisya tutandile mubutanga bwangulube.”
32 Jesu wakati kulinjiyo, “Kamuya.” Aboobo yakazwa akuyoonjila mungulube, butanga boonse bwakakunkulikila mujeleele yalwizi, bwakadumpukila mumaanzi.
33 Lino beembezi babutanga bakatija baya kumunzi bakwaamba makani oonse, azyoonse zyakacitika kuli baabo bakanjidwe. 34 Aawo bantu boonse bamumunzi bakaza kuyoocingauzya Jesu. Nkabela nibakamujana, bakamukumbila kuti azwe mucisi cabo.