Mateyo 3

Joni Mubbapatizi mbwaakakambauka

¹ Bweende-bweende Joni mubbapatizi wakasika munkanda ya Judiya kakambauka kati, ² “Amweempe, nkaambo bwami bwakujulu bwaswena.” ³ Joni ngonguwe ngwaakaamba Izaya musinsimi naakati,

“Kuli waambilizya munkanda kuti,

‘Amubambe mugwagwa wa Mwami Leza!

Amululamike nzila yakwe kabotu!’”

⁴ Joni mubbapatizi wakali kusama cisani cakalukidwe aboya bwa nkamela, alutambo lwacikanda mucibuno. Wakali kulya cikwikwi abuci. ⁵ Lino bantu banji bakainka kulinguwe kuzwa mu Jelusalemu amu Judiya yoonse amuzisi zyeengelede Jolodani. ⁶ Eelyo nibakalyaamba zinyonyoono wakababbapatizya mumulonga wa Jolodani. ⁷ Lino naakabona Bafalisi a Basaduki banji kababoola kuti ababbapatizye wakabaambila kuti, “Nywebo noba cipile! Nguni wakamucenjezya kutija cisubulo ca Leza ciboola? ⁸ Amucite eezyo zibonya kuti mweempa. ⁹ Nkabela mutanoocaambi mumyoyo yanu kuti, ‘Abulahamu ngu taata!’ Kayi Leza ulakonzya kusandula naaba mabwe aaya kuti abe bana ba Abulahamu. ¹⁰ Lino-lino keembe kakugonsya sikaiminwa kalibambidwe, aboobo woonse uutabi aamicelo mibotu ulatemwa akuwaala mumulilo. ¹¹ Mebo ndamubbapatizya amaanzi nkaambo mweempa, pele kuli yooyo uubola musule lyangu uulemenede kwiinda ndime. Nseelede nikuba kwaangununa ndyasyo zyakwe. Walo uyoomubbapatizya a Muuya Uusalala amulilo. ¹² Acalo cipupuluzyo ulicijisi mumaanza, eelyo uyoopupulula akulongela maila mubutala, pele buungu uyoobutentela mumulilo uutazimi.”

Jesu mbwaakabbapatizigwa

¹³ Lino Jesu wakasika kuzwa ku Galilii kumulonga wa Jolodani kwakali Joni kuti azoobbapatizigwe anguwe. ¹⁴ Pele Joni wakatimukasye wakati, “Ndime eenjelede kubbapatizigwa anduwe, nkaambo nzi ncoza kulindime?” ¹⁵ Jesu wakamwiingula kuti, “Kocita buyo oobo, nkaambo mbuboobu mbotuticite ziluleme zyoonse ziyanda Leza.” Naakamvwa boobo wakazumina. ¹⁶ Lino Jesu naakamana kubbapatizigwa, wakazwa mumaanzi, eelyo julu lyakajaluka, mpawo wakabona Muuya wa Leza kuuseluka mbuli nkwilimba alinguwe, ¹⁷ mpoonya kwakazwa ijwi kujulu, lyakati, “Ooyu ngo mwanaangu ngwenjandisisya, ulandibotezya kapati!”