Mateyo 28

Jesu mbwaakabuka kuzwa kubafu

¹ Lino Buzuba bwa Kulyookezya butegwa Sabata nibwakamana, bucica buyo, mubuzuba butaanzi bwamvwiki Maliya waku Magadala aumwi Maliya bakainka kuyoolanga cuumbwe. ² Mpawo kwakaba muzumo mupati wanyika, nkaambo mungelo wa Mwami wakaseluka kuzwa kujulu, wakasika wakunkulisya bbwe akukkala ali ndilyo. ³ Ciwa cakwe cakali mbuli lulabo, zyakusama zyakwe zyakali kutuba buu. ⁴ Akaambo kakuyoowa kapati, balindizi bakakankama akuba mbuli bantu bafwide.

⁵ Lino mungelo wakati kubakaintu nibakasika, “Mutayoowi, nkaambo ndilizi kuti muyandaula Jesu wakakankaminwa aciingano. ⁶ Tako kuno, wabuka mbubonya mbuli mbwaakaamba. Kamuza mubone mpaakalede. ⁷ Lino kamuya cakufwambaana mukaambile basikwiiya kuti wabuka kuzwa kubafu, alimwi ulamusaangunina kuya ku Galilii ooko nkomuyoomubonena. Muyeeye mbwindamwaambila” ⁸ Bakaintu bakazwa kufwambaana kucuumbwe kabayoowede ooku kabakondedwe kapati! Bakatijaanina kuyooambila basikwiiya bakwe. ⁹ Jesu wakabaswaana akwaamba kuti, “Mwapona.” Balo bakaswena akumujata kumaulu, bamukomba. ¹⁰ Mpoonya Jesu wakati kulimbabo, “Mutayoowi, kamuya mukaambile bakwesu kuti baye ku Galilii ooko nkobayoondiswaanganyina kuti tukabonane.”

Kwaamba kwabalindizi

¹¹ Lino kabaciya buya, bamwi babalindizi bakanjila mumunzi akwaambila bapaizi basilutwe nzyoonse zyakacitika. ¹² Nkabela nibakabungana antoomwe abapati akubuzyanya-buzyanya, bakapa basilumamba mali manji, ¹³ bakati, “Amwaambile bantu kuti, ‘Basikwiiya bakwe basika masiku akumubba nitwacili koona.’ ¹⁴ Kuti naa eeci cimvwigwe kumweendelezi tulamukombelezya kuti mutajani mulandu.” ¹⁵ Aboobo bakatola mali aayo akucita mbubonya mbuli mbubakalaililwa. Nkabela makani aaya mbwaamwaikide mbubonya oobo aakati ka Bujuda nikuba kusikila sunu.

Jesu mbwaakatuma basikwiiya bakwe

¹⁶ Lino basikwiiya bali kkumi aumwi bakainka ku Galilii, kucilundu ooko Jesu nkwaakabalaililide. ¹⁷ Nibakamubona bakamukomba, pele bamwi bakacili kudonaika. ¹⁸ Mpawo Jesu wakasika akuti kulimbabo, “Ndapegwa nguzu zyoonse kujulu alimwi aansi. ¹⁹ Nkaambo kaako kamuya mukaiisye bantu bamisyobo yoonse, mukababbapatizye muzina lya Taata alya Mwana alya Muuya Uusalala. ²⁰ Mukabaiisye kuti babambe makani oonse ngindamulailila. Mebo ndili aanywebo lyoonse, mane kusikila kumamanino aanyika.”