Mateyo 27

Jesu mbwaakabetekwa a Pilato

¹ Lino nibwakaca, bapaizi basilutwe boonse abapati ba Bajuda bakapangana kuti bajaye Jesu. ² Nkabela bakaanzya Jesu akumutola, bamupa mumaanza aa Pilato mweendelezi, wakazwa ku Loma.

Judasi mbwaakalisina

³ Lino Judasi ooyo wakamwaaba, naakabona kuti Jesu wapegwa mulandu walufu, wakeempa akuboozya mali aansiliva aali makumi otatwe kubapaizi basilutwe akubapati ba Bajuda wati, ⁴ “Ndabisya kwaaba muntu uutakwe mulandu.” Balo bakaamba kuti, “Ino tutyani swebo? Makani aako omwini.” ⁵ Judasi wakasowa mali aansiliva ansi muŋanda ya Leza, wakazwa, wainka waakulisina. ⁶ Bapaizi basilutwe nibakabweza mali aansiliva aayo bakati, “Takweelede kuti twaabike muciyobwedo, nkaambo mali aamalowa.” ⁷ Aboobo bakabuzyanya, bamane bakaauzya muunda wamubumbi, kuti kabazikkila mumo beenzu. ⁸ Nkaako ooyo muunda ucitegwa muunda wamalowa ambuli sunu. ⁹ Mpoonya cakacitika eeco cakaamba musinsimi Jelemiya naakati, “Eelyo bakabweza mali aansiliva aali makumi otatwe, muulo wayooyo wakabikkilidwe muulo a Baisilayeli, ¹⁰ nkabela bakaula muunda wamubumbi mbubonya mbuli Mwami Leza mbwaakandilailila.”

Pilato mbaakabuzya Jesu

¹¹ Lino bakaimika Jesu kumbele lyamweendelezi, mweendelezi wakamubuzya kuti, “Sena ndonduwe Mwami wa Bajuda?” Jesu wakati kulinguwe, “Waamba.” ¹² Pele nibakamutamikizya bapaizi basilutwe abapati ba Bajuda taakwe naakaingula pe. ¹³ Mpawo Pilato wakati kulinguwe, “Sena totumvwide twaambo toonse ntobakwaamba?” ¹⁴ Pele taakwe naakamwiingula, niliba ijwi lyomwe buyo, aboobo mweendelezi wakagambwa kapati.

Jesu mbwaakapegwa mulandu walufu

¹⁵ Ciindi ca Pobwe lya Kwiindilila mweendelezi wakalizibide kubaangunwida bantu, kufumbwa mwaange ooyo ngubakayanda. ¹⁶ Ciindi eeco kwakali umwi mwaange wakalaampuwo mbi, uutegwa Balabbasi. ¹⁷ Nibakabungene, Pilato wakati kulimbabo, “Ino nguni ngomuyanda kuti ndimwaangunwide, Balabbasi antela Jesu uutegwa Munanike wa Leza?” ¹⁸ Nkaambo wakalizi kuti akaambo kamunyono bakamuleta kulinguwe. ¹⁹ Pilato naakakkede acuuno calubeta, mukaintu wakwe wakatumya jwi kulinguwe lyakuti, “Utabi ncocita amuntu ooyo mululami, nkaambo ndapenga kapati akaambo kanguwe muciloto.” ²⁰ Lino bapaizi basilutwe abapati ba Bajuda bakakombelezya bantu kuti bakumbile Balabbasi, Jesu ajaigwe. ²¹ Alimwi mweendelezi wakati kulimbabo, “Ino nguuli aakati kabo bobilo ngomuyanda kuti ndimwaangunwide?” Bakati, “Balabbasi.” ²² Pilato wakati kulimbabo, “Ino mmucite buti Jesu uutegwa Munanike?” Boonse bakati, “Akankaminwe aciingano.” ²³ Mpawo wakati “Ino kayi, mbubi nzi mbwaacita?” Bakoongololesya kabati, “Akankaminwe aciingano.”

²⁴ Aboobo Pilato naakabona kuti taakwe cintu ncaakali kukonzya kucita, akuti kuyanda kuba lupyopyongano wakabweza maanzi akusamba mumaanza bantu kabalangilide wati, “Nsikwe mulandu wabulowa bwamuntu ooyu uululeme. Amucite ncomuyanda nobeni.” ²⁵ Lino bantu boonse bakavuwa kuti, “Naa mulandu uube kulindiswe akubana besu.” ²⁶ Nkabela wakabaangunwida Balabbasi, naakamana kukwabbauzya Jesu wakamwaaba kuti akankaminwe aciingano.

Jesu mbwaakakankaminwa aciingano

²⁷ Mpoonya basilumamba bakanjizya Jesu muŋanda ya mweendelezi akubunganya mpi yoonse yazinguluka Jesu. ²⁸ Mpawo bakamusamununa akumusamika jansi lisalala pyu. ²⁹ Bakaluka musini wamamvwa bamusamika kumutwe, akumufumbatisya lubu mujanza lyalulyo. Eelyo bakamufugamina bamusabwida bati, “Wabonwa O Mwami wa Bajuda.” ³⁰ Nkabela bakamuswida mate, eelyo bakabweza lubu bamuumya amutwe. ³¹ Nibakamana kumuseka, bakamusamununa jansi eelyo, bamusamika zisani zyakwe mwini, bakamutola kuyoomukankamina aciingano.

Jesu mbwaakakankaminwa aciingano

³² Lino nibakazwa bakajana mwaalumi uutegwa Saimoni uuzwa ku Sailini. Mwaalumi ooyu bakamusungilizya kuyumuna ciingano ca Jesu. ³³ Nibakasika kubusena butegwa Gologota, “Nkokwaamba kuti, Busena bwakapapa kamutwe” ³⁴ bakamupa waini uuvweledwe ndulwe kuti anywe, pele naakalabila wakakaka kunywa. ³⁵ Lino nibakamukankamina aciingano, bakaabana zisani zyakwe akati kabo kwiindila mukuuma cisolo. ³⁶ Mpoonya bakakkala ansi bamulindilila nkukonya ooko. ³⁷ Atala aamutwe wakwe bakalemba majwi aatondezya ncibakamujaila, aati, “Ooyu ngu Jesu Mwami wa Bajuda.” ³⁸ Aawo kwakali bambwidwe babbi bobilo, umwi kululyo umwi kulumwensi. ³⁹ Bantu bakali kwiinda aawo bakali kugunya-gunya mitwe, ⁴⁰ baamba bati, “Wali kuti ulakonzya kumwaya ŋanda ya Leza akwiiyakulula mumazuba otatwe. Nkooko kolifutula lwako omwini, kuti koli Mwanaa Leza koseluka aciingano.” ⁴¹ Mbubonya oobo abalo bapaizi basilutwe abamayi ba Mulawo alimwi abapati ba Bajuda bakamuseka bakati, ⁴² “Wakali kufutula bamwi, pele walo takonzyi kulifutula. Tee ngo Mwami wa Isilayeli, aaseluke kuzwa aciingano kuti tumuzuminine. ⁴³ Ulasyoma muli Leza akwaamba kuti, ‘Ndi Mwanaa Leza.’ Leza aamununune, kuti naa kamuyanda.” ⁴⁴ Abalo babbi bakabambwidwe aciingano bakali kumusampaula mbubonya buyo.

Jesu mbwaakafwa

⁴⁵ Lino nikwakaba aacilungu-lungu kusikila aacilangankumo kwakali mudima uusiya mbi koonse-koonse. ⁴⁶ Nicatikakkwane maola otatwe Jesu wakoongolola ajwi pati wati, “Eli, Eli lama sabakatani?” Nkokuti, “Leza wangu, Leza wangu, wandisiila nzi?” ⁴⁷ Bamwi babo bakaimvwi munsi-munsi nibakamvwa boobo bakati, “Ooyo muntu wiita Elija.” ⁴⁸ Umwi wabo wakatijaana, wabweza nsinsa, wiizuzya ndulwe, wiibikka alubu, wamupa kuti anywe. ⁴⁹ Pele bamwi bakati, “Mulindile, tubone naa Elija ulasika kuzoomufutula.” ⁵⁰ Alimwi Jesu wakoompolola ajwi pati, eelyo wakafwa.

⁵¹ Mpoonya-mpoonya cisitilizyo camuŋanda ya Leza cakayauka muzibeela zyobilo, kuzwa ajulu do ansi. Nyika yakazungaana kapati, myaala yakaanduka. ⁵² Zyuumbwe zyakajaluka, nkabela bantu banji bakali kusyoma Leza bakabuka kuzwa kubafu. ⁵³ Bakazwa muzyuumbwe, eelyo Jesu naakabuka kuzwa kubafu, bakainka mumunzi uusalala oomo mubakabonwa abantu banji.

⁵⁴ Lino silutwe wabasilumamba abaabo mbaakali aabo kulangilila Jesu, nibakabona kuzungaana kwanyika azyakacitika, bakayoowa kapati bati, “Ncobeni, ooyu wali Mwanaa Leza.”

⁵⁵ Alaale kwakali bakaintu banji, bakali kulangilila. Mbambabo bakali kutobela Jesu kuzwa ku Galilii akumugwasya. ⁵⁶ Akati kabo kwakali Maliya waku Magadala, a Maliya banyina Jemusi a Josefa, alimwi abanyina bana ba Zebedii.

Kuzikkwa kwa Jesu

⁵⁷ Lino nikwakaba kumangolezya, kwakasika kuli Pilato umwi muntu uutegwa Josefa. Wakali muvubi uuzwa ku Alimatiya, awalo wakali muccilili wa Jesu. ⁵⁸ Muntu ooyu wakakumbila mutumba wa Jesu. Mpawo Pilato wakalailila kuti bamupe mutumba ooyo. ⁵⁹ Mpoonya Josefa, wakauputaila mumulembo uutuba, ⁶⁰ akuulazika mucuumbwe cakwe mwini, cipya ncaakakolwede mumwaala. Wakakunkulisya bbwe pati amulyango wacuumbwe, wainka. ⁶¹ Maliya waku Magadala a Maliya umwi bakaliko ooko, kabakkede kulangana aacuumbwe.

Balindizi bacuumbwe ca Jesu

⁶² Nibwakaca mu Buzuba bwa Kulyookezya butegwa Sabata, bapaizi basilutwe a Bafalisi bakabungana kuli Pilato ⁶³ akuti, “Mwami, tulayeeya mbuli mubeji uulya mbwaakaamba kacipona wakati, ‘Aakumana mazuba otatwe njoobuka alimwi.’ ⁶⁴ Nkaambo kaako lailila kuti cuumbwe cilindilwe mane kusikila mazuba otatwe ainde. Ambweni inga basikwiiya bakwe bayoosika akumubba, bamana baambile bantu kuti, ‘Wabuka kuzwa kubafu.’ Eelyo lucengo lwabili luyoobija kwiinda lutaanzi.” ⁶⁵ Amvwe boobo Pilato wakati kuli mbabo, “Mulijisi balindizi basilumamba, Kamuya mukacibambisye mbuli mbomukonzya.” ⁶⁶ Aboobo bakainka akuyoocibambisya cuumbwe akusinka-sinka bbwe basiya balindizi.