Mateyo 26

Bapati ba Bajuda mbubakazuminana kuti Jesu ajaigwe

¹ Lino Jesu naakamana kwaamba makani oonse aaya, wakati kuli basikwiiya bakwe, ² “Mulizi kuti kwainda mazuba obilo kuyooba Pobwe lya Kwiindilila, nkabela Mwanaa Muntu uyooabwa kuti akankaminwe aciingano.”

³ Eelyo bapaizi basilutwe abapati ba Bajuda bakabungana kubbuwa lyamupaizi mupati, Kayafa. ⁴ Bakazuminana kuti bajane nzila imwi yakujata Jesu cakusisikizya kuti ajaigwe. ⁵ Pele bakati, “Kutaamba ciindi capobwe, nkaambo inga kulaba lupyopyongano akati kabantu.”

Jesu mbwaakananikwa mafuta

⁶ Lino Jesu naakali kumunzi wa Betani muŋanda ya Saimoni uutegwa sicinsenda. ⁷ Kwakasika mukaintu umwi kajisi ansazi iizwide mafuta aanunkilila kabotu aadula kapati. Wakaatila amutwe wa Jesu ciindi Jesu naakali kulya. ⁸ Pele basikwiiya nibakabona boobo, bakatongooka bati, “Ino anyonyweedwa nzi mafuta aaya? ⁹ Nkaambo naauzigwa mali manji kaapegwa kubacete.” ¹⁰ Jesu wakaziba nzibakali kwaamba, eelyo wakati kulimbabo, “Ino mumukatazizya nzi mukaintu ooyu? Wandicitila cintu cibotu. ¹¹ Nkaambo lyoonse bacete muli kuli aambabo, pele tamunooli aandime lyoonse pe. ¹² Eeci cakutila mafuta amubili wangu wacicita kundibambilila kuzikkwa. ¹³ Ncobeni ndamwaambila kuti, koonse ooko nkwaayookambaukwa Makani Mabotu munyika yoonse, mane eeci ncaacita mukaintu ooyu ciyooambwa, kutegwa kabayoomuyeeyela mpawo.”

Judasi mbwaakakanza kumwaaba

¹⁴ Nkabela umwi wabali kkumi ababili uutegwa Judasi Isikaliyoti wakainka kubapaizi basilutwe ¹⁵ akuti kulimbabo, “Ino mulandipa nzi kuti naa ndaaba Jesu kulindinywe?” Bakamupa mali aansiliva aali makumi otatwe. ¹⁶ Lino kuzwa waawo wakali kuyandaula ciindi cibotu cakumwaaba.

Jesu mbwaakalya pobwe lya kwiindililwa abasikwiiya bakwe

¹⁷ Lino mubuzuba butaanzi bwapobwe lya Cinkwa Citakwe Mimena basikwiiya bakasika kuli Jesu bati, “Nkukuli nkoyanda kuti tukakubambile Pobwe lya Kwiindilila kuti ulye?” ¹⁸ Jesu wakati, “Kamuya mumunzi kulindaba, mukaambe kuti kulinguwe, Mwiiyi wati, ‘Ciindi cangu cili aafwiifwi. Ndiyanda kulya pobwe kuŋanda yako antoomwe abasikwiiya bangu.’” ¹⁹ Nkabela basikwiiya bakacita mbubonya mbuli Jesu mbwaakabalailila. Bakabamba cilalilo ca Pobwe lya Kwiindilila.

²⁰ Nikwakaba kumangolezya Jesu abasikwiiya bakwe bali kkumi ababili bakali kulya. ²¹ Lino kabacilya wakati, “Ncobeni ndamwaambila kuti, umwi wanu ulandaaba.” ²² Bamvwe boobo basikwiiya bakausa kapati, eelyo bakatalika kumubuzya omwe omwe kuti, “Sena ndime O Mwami?” ²³ Walo wakati, “Nguwenya ooyu ngwesunsa aawe mumutiba nguuti ndaabe. ²⁴ Mwanaa Muntu uyoofwa mbubonya mbuli mbokulembedwe anguwe. Pele akomena mapenzi ayooba kumuntu ooyo uutaabe Mwanaa Muntu! Nicakabota kuli nguwe naatakazyalwa.” ²⁵ Mpawo Judasi ooyo wakamwaaba wakabuzya kuti, “Sena ndime O Mwami?” Walo wakati kulinguwe, “Waamba.”

Mulalilo wa Mwami

²⁶ Lino nibakacili kulya, Jesu wakabweza cinkwa wakalumba, wacikomona, akucipa kuli basikwiiya bakwe wati, “Mubweze, mulye, nkaambo ooyu ngomubili wangu.” ²⁷ Eelyo wakabweza nkomeki, nkabela naakamana kulumba Leza wakiipa mbabo, wati, “Amunywe nyoonse. ²⁸ Nkaambo oobu mbulowa bwangu bwacizuminano cipya, bwatililwa banji kuti zinyonyoono zilekelelwe. ²⁹ Ndamwaambila kuti, nsiciyoonywi limbi musinza wansaansa mane do kubuzuba mbwentikanywe andinywe mubwami bwa Taata.”

³⁰ Eelyo nibakamana kwiimba lwiimbo, bakainka ku Cilundu camisamu ya Oliva.

Jesu mbwaakaamba kuti Pita ulamutama

³¹ Mpoonya Jesu wakati kulimbabo, “Nywebo nyoonse mulatyompwa masiku aano akaambo kandime, nkaambo kulilembedwe kuti, ‘Nzoouma mweembezi, nkabela butanga bwa mbelele buyoomwaikizyanya.’ ³² Pele ndaakubusigwa njoomusaangunina kuya ku Galilii.” ³³ Mpawo Pita wakati kulinguwe, “Nikuba kuti boonse bakusiye mebo nsikookusiya pe.” ³⁴ Jesu wakati kulinguwe, “Ncobeni ndakwaambila kuti, masiku aaya ngoonya, mukombwe katanalila, ulanditama ziindi zyotatwe.” ³⁵ Pita wakati kulinguwe, “Nikuba kuti ndifwe anduwe, nsikookutama.” Mbubonya oobo mbubakaamba basikwiiya bamwi boonse.

Jesu mbwaakakomba mumuunda wa Getesemani

³⁶ Mpawo Jesu wakainka abasikwiiya bakwe kubusena bwiitwa kuti Getesemani, eelyo wakati kuli mbabo, “Amukkale aano, ndaya kuya nkakombe.” ³⁷ Jesu wakatolelela Pita abana ba Zebedii bobilo. Mpoonya wakatalika kuusa akukatazigwa. ³⁸ Wakati kulimbabo, “Moyo wangu uluuside kapati abuusu bwalufu. Amusyaale aano mulangile andime.” ³⁹ Jesu wakaya kumbele buniini wakavuntama, wakomba wati, “Taata, kuti naa kakukonzeka, eeyi nkomeki yamapenzi aiindilile. Nikuba bobo, kutabi mbuli kuyanda kwangu, pele akukabe mbuli kuyanda kwako.” ⁴⁰ Ucimana wakasika kuli basikwiiya bakwe, wajana baloona. Wakati kuli Pita, “Sena nywebo tamukonzyi kulangila andime kwaoola lyomwe buyo? ⁴¹ Amulangile akukomba kuti mutanjili mumasunko. Moyo ncobeni ulayandisisya, pele mubili wabula nguzu.”

⁴² Jesu wakainka lwabili, waakukomba wati, “Taata, kuti naa nkomeki eeyi itandiindilili, pele njinywe alucitwe luyando lwako.” ⁴³ Amane wakasika kuli basikwiiya, wabajana baloona nkaambo bakafwide ŋonzi. ⁴⁴ Aboobo wakabasiya alimwi, wainka akuyookomba lwatatu, kaamba majwi ngoonya buyo. ⁴⁵ Kumane wakainka kuli basikwiiya bakwe akuti kulimbabo, “Sena mucoona akulyookezya? Ciindi casika, Mwanaa Muntu waabwa mumaanza aabasizibi. ⁴⁶ Amunyamuke tweende. Ngooyu sikundaaba ulaafwiifwi.”

Jesu mbwaakajatwa

⁴⁷ Jesu kacaambaula, Judasi umwi wabali kkumi ababili wakasika. Wakaza ankamu mpati yabantu kaijisi mapanga ankoli. Eeyi nkamu yakatumwa, yakazwa kubapaizi basilutwe abapati ba Bajuda. ⁴⁸ Lino sikumwaaba wakabapede citondezyo cakuti, “Ooyo ngwenjoomyonta ngonguwe, mukamujate.” ⁴⁹ Eelyo wakasika kuli Jesu wati, “Wabonwa, Mufundisi!” Mpawo wakamumyonta. ⁵⁰ Jesu wakati kulinguwe, “Mweenzuma, cita ncoozida.” Mpawo bakavumpa Jesu bamujata. ⁵¹ Umwi wabaabo bakali aa Jesu wakasomona panga lyakwe, wakakwezula kutwi kwa muzike wamupaizi mupati. ⁵² Mpoonya Jesu wakati kulinguwe, “Bweedezya panga lyako mumukutu walyo, nkaambo boonse babelesya panga bayoonyonyoonwa apanga. ⁵³ Sena uyeeya kuti nsikonzyi kukumbila Taata kuti anditumine ndilyonya ono zyuulu-zyuulu zyabangelo? ⁵⁴ Naa ndacita boobo, ino inga zyacitika buti zilembedwe mu Malembe?” ⁵⁵ Amane Jesu wakati kunkamu yabantu aabo, “Nkaambo nzi mwazikundijata amapanga ankoli mbuli kuti ndimubbi? Buzuba abuzuba ndali kukkala muŋanda ya Leza nkenjiisya, pele taakwe nimwakandijata. ⁵⁶ Pele eezi zyoonse zyacitika kutegwa zibe mbubonya mbobakalemba basinsimi.” Mpoonya boonse basikwiiya bakamumwaika akutija.

Jesu mbwaakatolwa kunkuta

⁵⁷ Bantu aabo bakajata Jesu bakamutola kuli Kayafa mupaizi mupati, ooko bamayi ba Mulawo abapati ba Bajuda nkobakabungene. ⁵⁸ Pita wakali kutobela aalaale mane kuyoosikila kubbuwa lyamupaizi mupati. Wakanjila mukati, wakkala antoomwe abalindizi kuti abone citicitike. ⁵⁹ Bapaizi basilutwe antoomwe ababetesi bapati boonse bakasola kuyandaula bumboni bwakubejelezya Jesu kutegwa bamujaye. ⁶⁰ Pele taakwe nibakabujana, nikuba kuti bakamboni babeji banji bakasika akumubejelezya. Kumamanino kwakasika bantu bobilo ⁶¹ bakati, “Ooyu wakali kuti, ‘Mebo ndakonzya kumwaya ŋanda ya Leza akwiiyakulula mumazuba otatwe buyo.’” ⁶² Mupaizi mupati wakanyamuka akwaamba kuti, “Sena unyina cakwaamba kumakani aaya ngobakwaamba?” ⁶³ Pele Jesu wakaluumwide wi. Mpawo mupaizi mupati wakati kulinguwe, “Ndakwaambila muzina lya Leza muumi kuti ukonke kuti naa nduwe Munanike, Mwanaa Leza?” ⁶⁴ Mpawo Jesu wakati kulinguwe, “Waamba. Pele ndamwaambila kuti kuzwa lino muyoobona Mwanaa Muntu kakkede kujanza lyalulyo lya Singuzu muyoomubona alimwi kaboola amakumbi aakujulu.” ⁶⁵ Mpoonya mupaizi mupati wakazapaula cisani cakwe akuti, “Usampaula Leza, ino tuciyandila nzi bumboni bumbi? Kayi mwalimvwida mbwaaamba? ⁶⁶ Ino muyeeya buti?” Mpawo bakaingula kuti, “Uleelede kufwa.” ⁶⁷ Eelyo bakamuswida mate kubusyu, bamuuma nkabela bamwi bakamubakula ⁶⁸ bati, “Twaambile yebo O Munanike wa Leza. Ino nguni wakuuma?”

Pita mbwaakatama Jesu

⁶⁹ Lino Pita wakalikkede anze mulubuwa. Nkabela umwi musimbi wakamusikila akuti kulinguwe, “Ayebo wakali aa Jesu waku Galilii.” ⁷⁰ Pita wakatama kabamvwide boonse wakati, “Nsicizi ancoamba pe.” ⁷¹ Nkabela kayanda kuti azwide aanze, aumwi musimbi wakamubona, wakati kuli baabo mbaakaimvwi limwi, “Ooyu mwaalumi awalo wakali aa Jesu waku Nazaleta.” ⁷² Alimwi Pita wakatama cakukonka kuti, “Masimpe ooyu muntu nsimwizi.” ⁷³ Nikwakainda kaindi kaniini aabo bakaimvwi kooko bakasika akuti kuli Pita, “Ncobeni, ayebo uli umwi wabo, nkaambo mwaambo wako ulakuyubununa.” ⁷⁴ Mpawo wakatalika kukonka akuti, “Ncobeni ooyu muntu nsimwizi pe.” Mponya aawo mukombwe wakalila. ⁷⁵ Nkaako Pita wakaibaluka jwi ndyaakaamba Jesu lyakuti, “Mukombwe katanalila unoonditamide ziindi zyotatwe.” Nkabela Pita wakazwida anze waakulila kapati.