Mateyo 17

Ciwa ca Jesu mbucakasanduka acilundu

¹ Nkabela naakainda mazuba aali cisambomwe Jesu wakainka a Pita a babunyina bobilo Jemusi a Joni batanta cilundu cilamfu. ² Mpoonya aawo ciwa cakwe cakasanduka. Busyu bwakwe bwakabala mbuli zuba, azyalo zyakusama zyakwe zyakatuba bu. ³ Mpawo basikwiiya baya bakabona Mozesi a Elija kabakanana a Jesu. ⁴ Abone boobo Pita wakati kuli Jesu, “O Mwami, ncibotu kuti tuli aano! Kuti naa koyanda, ndilayaka zilawo zyotatwe aano. Cimwi cibe cako, cimwi cibe ca Mozesi, cimwi cibe ca Elija.” ⁵ Kacaambaula kkumbi libala lyakabavumbilila, eelyo kwakamvwigwa mukkumbi eelyo jwi kaliti, “Ngooyu Mwanaangu ngweyandisisya mulinguwe mwenkondwa. Amumuswiilile!” ⁶ Ciindi basikwiiya nibakabona eeci, bakayoowa kapati nkabela bakawa cakuvuntama. ⁷ Pele Jesu wakasika akubaguma wati, “Amubuke mutayoowi.” ⁸ Nkabela nibakalungumana bakabona kuti kwakanyina muntu uumbi pele Jesu alikke.

⁹ Lino nibakali kuseluka kuzwa acilundu, Jesu wakabalaililisya kuti, “Eezi nzimwabona mutakaambili muntu naba omwe pe, mane kusikila Mwanaa Muntu akabusigwe kuzwa kubafu.” ¹⁰ Basikwiiya bakamubuzya kuti, “Ino kayi bamayi ba Mulawo baambila nzi kuti Elija nguuelede kusaanguna kuboola?” ¹¹ Wakaingula kuti, “Ncobeni nguuelede kusaanguna Elija kuboola kuti abambe zintu zyoonse. ¹² Pele ndamwaambila kuti wakasika kale nkabela taakwe nibakamuziba, pele bakamucita mbuli mbubakali kuyanda. Mbuboobo awalo Mwanaa Muntu mbwayoopenzegwa ambabo.” ¹³ Eelyo basikwiiya bakamvwa kuti wakali kubaambila makani a Joni Mubbapatizi.

Jesu mbwaakaponya sikasuntu

¹⁴ Lino nibakasika kwakali bantu banji, umwi muntu wakaza kulinguwe wakamufugamina wati, ¹⁵ “O Mwami, mufwide lubomba mwanaangu, nkaambo ngusikasuntu alimwi ulapenzegwa kapati. Kanji-kanji ulawida mumulilo, amumaanzi. ¹⁶ Ndakali muletede kuli basikwiiya bako kuti bamuponye pele cakabakakila kumuponya.” ¹⁷ Mpawo Jesu wakati, “Akaka nywebo nobantu batasyomi basicinguni, ino ndikkale ciindi cilamfu cili buti andinywe? Ino mmupengele ciindi cilamfu cili buti? Amumulete kuno kulindime.” ¹⁸ Mpawo Jesu wakakalalila muuya mubi wakali kusuntusya mulombe ooyo, mpoonya wakazwa mulinguwe. Eelyo mulombe wakapona ciindi eeco nciconya. ¹⁹ Basikwiiya bakamubuzya kumbali bati, “Ino swebo twakakacilwa buti kuugwisya?” ²⁰ Wakati kulimbabo, “Nkaambo lusyomo lwanu nduniini. Ncobeni ndamwaambila kuti, kuti kamujisi lusyomo luli mbuli nseke yamasitadi, mulakonzya kwaambila cilundu eeci kuti, ‘Zyuka aawa uyookuya,’ nkabela cilainka ncobeni. Taakwe cikonzya kumwaalila pe. ²¹ Pele muuya mubi wamusyobo ooyu taakwe bumbi mbuugwisigwa, ccita kwiindila mukukomba akuliimya kulya.”

Jesu mbwaakaamba zyalufu lwakwe alimwi

²² Lino basikwiiya nibakabungene mu Galilii, Jesu wakati kulimbabo, “Mwanaa Muntu uyooabwa kubantu. ²³ Bayoomujaya. Pele uyoobusigwa mubuzuba bwatatu.” Bamvwe boobo basikwiiya bakausa kapati.

Jesu mbwaakatela mutelo waŋanda ya Leza

²⁴ Lino nibakasika ku Kapenaumu, basikutezya mutelo waŋanda ya Leza bakaya kuli Pita akuti kulinguwe, “Sena mwiiyi wanu ulatela?” ²⁵ Walo wakati, “Iiyi.” Nkabela Pita naakanjila muŋanda, Jesu wakaambaula kusaanguna kulinguwe wakati, “Uyeeya nzi Saimoni? Nkuulini bami baansi nkobatezya mutelo? Sena nkuubantu babo antela kubeenzu?” ²⁶ Pita wakaingula kuti, “Nkuubeenzu!” Jesu wakamwaambila kuti, “Caamba kuti bantu babo tabeelede kutela.” ²⁷ Pele kuti tutaubausyi basikutezya aaba koya kulwizi ukalobole. Nswi iiyoocegwa kusaanguna ukayaasamune, uyoojana mali, ukaatole ukanditelele mebo alwako.