Mateyo 16

Zyakwiisya kwakubeja kwa Bafalisi

¹ Bafalisi a Basaduki bakasika kuli Jesu kuti bamusunke. Bakamukumbila kuti abatondezye citondezyo cibonya kuti Leza nguwakamutuma. ² Wakabaingula kuti, “Ciindi cakumangolezya mulati, ‘Bulaca kabotu nkaambo kujulu kulasalala.’ ³ Nkabela cifumo-fumo mulati, ‘Sunu bwaca bubi nkaambo kujulu kuli cikumbi cisiya mbi.’ Mulizi mbokupandululwa julu mbolilibonya, pele tamukonzyi kupandulula zitondezyo zyasunu. ⁴ Basizibi basunu batasyomeki kuli Leza balayanda citondezyo, pele taakwe nobatitondezegwe ccita ambweni cakacitika kuli Jona musinsimi.” Aboobo wakabasiya wainka.

Mimena ya Bafalisi a Basaduki

⁵ Ciindi basikwiiya nibakalandukila kubbazu limwi, bakaluba kubweza zinkwa. ⁶ Jesu wakati kulimbabo, “Ncobeni amucenjele amimena ya Bafalisi a Basaduki.” ⁷ Lino bakaambilana bakati, “Nkaambo taakwe nitwabwezelezya cinkwa.” ⁸ Pele Jesu naakaciziba eeci wakati, “Nywebo nobantu basilusyomo luniini! Nkaambo nzi ncomuti akaambo kakuti taakwe nimwabwezelezya zinkwa? ⁹ Sena ambuli sunu tamumvwisyi? Sena tamuyeeyi kuti kuzwa muzinkwa zyosanwe ndakasanina bantu bali zyuulu zyosanwe alimwi akuti bakazuzya zisuwo zinji zyabufwefwelenga? ¹⁰ Ino kuzwa kuzinkwa zili ciloba tee ndakasanina bantu bali zyuulu zyone? Kwamana nywebo ino mwakazuzya zisuwo zyongaye zyabufwefwelenga? ¹¹ Ino nkaambo nzi ncimwataziba kuti taakwe nindaamba zinkwa? Lino amucenjele amimena ya Bafalisi a Basaduki.” ¹² Mpoonya bakamvwa kuti taili mimena njaakabaambila kuti baicenjelele, pele bacenjele kukwiisya kwa Bafalisi a Basaduki.

Jesu ngo Munanike wa Leza

¹³ Lino Jesu naakasika mucisi ca Sizaliya Filipi, wakabuzya basikwiiya bakwe kuti, “Ino bantu mebo nde Mwanaa Muntu bandaamba kuti ndime ni?” ¹⁴ Mpawo bakati, “Bamwi balaamba kuti nduwe Joni Mubbapatizi. Bamwi balaamba kuti nduwe Elija. Bamwi balaamba kuti nduwe Jelemiya naa umwi wabasinsimi.” ¹⁵ Mpoonya Jesu wakati kulimbabo, “Ino nywebo mundaamba kuti ndime ni?” ¹⁶ Saimoni Pita wakaingula kuti, “Nduwe Munanike, Mwanaa Leza Uupona.” ¹⁷ Jesu wakaingula kuti, “Ulilelekedwe yebo Saimoni mwanaa Jona! Nkaambo teensi muntu wakuyubunwida eeci pe, pele ngu Taata uuli kujulu. ¹⁸ Lino ndakwaambila kuti nduwe Pita, aboobo atala amwaala ooyu mpenzooyakila mbungano yangu, nkabela nguzu zyalufu tazikooyooizunda. ¹⁹ Njookupa makkii aabwami bwakujulu, kufumbwa ncomutikaange ansi aano akuluju ciyooangwa, alimwi kufumbwa eeco ncemutikaangunune ansi aano akujulu ciyooangununwa.” ²⁰ Mpawo Jesu wakalaililisya basikwiiya bakwe kuti bataambili muntu naba omwe kuti ngo Munanike wa Leza.

Jesu mbwaakaambilizya zyakupenga azyalufu lwakwe

²¹ Kuzwa ciindi eeco Jesu wakatalika kwaambila basikwiiya bakwe kuti uleelede kuunka ku Jelusalemu akupenga zintu zinji kuzwa kubapati babantu, akubapaizi basilutwe abamayi ba Mulawo. Bayoomujaya, pele mubuzuba bwatatu uyoobusigwa. ²² Amvwe boobo Pita wakamutola kumbali akutalika kumukalalila wakati, “Peepe, O Mwami! Eeci citakakucitikili!” ²³ Jesu wakacebuka akuti kuli Pita, “Kozwa aawa Saatani. Uli cilebyo kuli ndime, nkaambo toyeeyi miyeeyo ya Leza, pele yabantu.”

²⁴ Mpoonya Jesu wakaambila basikwiiya bakwe kuti, “Kuti naa muntu kayanda kunditobela aliimye abweze ciingano cakwe eelyo anditobele. ²⁵ Nkaambo kufumbwa uuyandisya buumi bwakwe uyoobusweekelwa, nkabela ooyo uusweekelwa buumi bwakwe akaambo kandime uyoobujana. ²⁶ Nkaambo nimpindu nzi njajana muntu, kuti naa wavuba nyika yoonse kwamana wasweekelwa buumi bwakwe? Naa ncinzi muntu ncakonzya kupa kuti anunuzye buumi bwakwe? ²⁷ Nkaambo Mwanaa Muntu uyoosika abangelo bakwe mubulemu bwa Wisi, eelyo uyoobweedezezya muntu omwe-omwe ceelede milimo yakwe njacita. ²⁸ Ncobeni ndamwaambila kuti, mpobali bamwi aano batakooyoofwa kabatanabona Mwanaa Muntu kaboola mubwami bwakwe.”