Mateyo 12

Makani aa Buzuba bwakulyookezya butegwa Sabata

¹ Mubuzuba bwa Kulyookezya butegwa Sabata, Jesu wakainda mumyuunda yamaila, basikwiiya bakwe bakafwa nzala. Eelyo bakatalika kupulula makunka aamaila balya. ² Bafalisi nibakabona boobo bakati kuli nguwe, “Bona basikwiiya bako bacita citazumizigwi amulawo mu Buzuba bwa Sabata.” ³ Jesu wakabaingula kuti, “Sena tiimwakabala Devedi mbwaakacita, ciindi walo abaabo mbaakalaabo nibakafwa nzala? ⁴ Tee bakanjila muŋanda ya Leza akulya cinkwa cacituulo kuli Leza, eeco ncibatakeelede kulya, ccita buyo bapaizi mbibakeelede kulya cinkwa eeco balikke? ⁵ Naa tiimwakabala mbuli bapaizi ba muŋanda ya Leza mbubaali kutyola mulawo wa Buzuba oobu nikuba boobo taakwe nibakapegwa mulandu? ⁶ Pele mpali aano wiinda ŋanda ya Leza. ⁷ Nimwalizi ncokaamba kapango kati, ‘Ndiyanda lweengelelo kutali cipaizyo pe,’ nimwatatamikizya batakwe mulandu pe. ⁸ Nkaambo Mwanaa Muntu ngomwami wa Buzuba bwa Sabata.”

Jesu mbwaakaponya muntu wakapuutide janza

⁹ Lino Jesu naakazwa ooko wakainka akunjila mucikombelo ca Bajuda. ¹⁰ Ooko kwakali mwaalumi umwi wakapuutide janza. Mpawo bantu bakabuzya Jesu kuti, “Sena kuleelede kuponya muntu mu Buzuba bwa Kulyookezya butegwa Sabata?” Bakabuzya boobu kuti bamujanine kaambo. ¹¹ Nkaako wakabaingula kuti, “Nguni aakati kanu ulaa mbelele yomwe nkabela yawida mudindi mu Buzuba bwa Sabata uunga takooigwisya? ¹² Kayi muntu ulayandika kapati kwiinda mbelele. Nkaako mulawo ulazumina kucita ciluleme mu Buzuba bwa Sabata.” ¹³ Ucimana Jesu wakati kumwaalumi ooyo, “Vungununa janza.” Eelyo wakalivungununa, lyakapona akuba mbuli lyeenzinyina. ¹⁴ Bafalisi bakazwa akuyoolivwiya kuti bamujaye buti Jesu.

Musale wa Leza

¹⁵ Lino Jesu naakaziba mizeezo yabo wakazwa ooko. Nkabela bantu banji bakamutobela nkaako wakaponya balwazi boonse. ¹⁶ Ucimana wakabalailila kuti batamuyubununi. ¹⁷ Eeci caakucitika mbubonya mbwaakaambide musinsimi Izaya kuti,

¹⁸ “Ngooyu mubelesi wangu ngundasala ngwenjandisisya.

Nzyacita zilandikkomanisya.

Ndiyoomupa muuya wangu,

nkabela uyoolungulula kuli bamasi kuti Leza uliluleme.

¹⁹ Takooyoovulumuka nikuba kupozomoka pe.

Takooyoolituntaizya mumazila.

²⁰ Takooyootyola katete kacuzukide

nikuba kuzima kamuni kayaka.

Uyoofwida bantu luse kusikila bululami bwakwe bukazunde.

²¹ Bulangizi bwabamasi buyooba muli nguwe.”

Zya Jesu a Belizebule

²² Mpoonya bantu bakamuletela moofu, syataambi, wakanjidwe muuya mubi. Wakamuponya, watalika kwaambaula akubona. ²³ Lino bantu boonse bakagambwa akuti, “Sena ooyu ulakonzya kuba mwanaa Devedi ooyo?” ²⁴ Bafalisi nibakamvwa boobo bakati, “Peepe, ngu Belizebule, mwami wamyuuya mibi nguupa ooyu muntu nguzu zya kugwisya myuuya mibi.” ²⁵ Lino Jesu naakaziba ncibakali kuyeeya wakati kulimbabo, “Kuti bantu bacisi comwe babukilana, eeco cilooleka. Alimwi kuti bantu bamumunzi omwe naa mukwasyi babukilana, munzi naa mukwasyi ooyo ulooleka. ²⁶ Kuti naa Saatani wagwisya beenzinyina, nkokuti walilwana lwakwe. Ino inga bwami bwakwe bwakkala buti? ²⁷ Kuti naa ndilagwisya myuuya mibi anguzu zya Belizebule, amundaambile, ino baccilili banu baigwisya aanguzu zyani? Nkaako bayoomuzula akutondezya kuti mulilubizizye. ²⁸ Peepe tali Belizebule, pele Muuya wa Leza nguundipa nguzu zyakwiigwisya myuuya mibi, caamba kuti bwami bwa Leza bwasika kuli ndinywe. ²⁹ Kunyina muntu uukonzya kunjila muŋanda yasinguzu akusaala zintu zyakwe, ccita wasaanguna kwaanga singuzu ooyo. Ndendilyo nanga wakonzya kusaala zintu zyamuŋanda yakwe. ³⁰ Kufumbwa uuteendelani andime ngusinkondoma ayooyo uutabunganyi antoomwe andime ulamwaya. ³¹ Nkaambo kaako ndamwaambila kuti Leza ulakonzya kumulekelela muntu cibi coonse, niciba cakumusampaula. Pele kuti naa muntu wasampaula Muuya Uusalala takooyoolekelelwa pe. ³² Mbubonya oobo kufumbwa waamba cakubisya-bisya Mwanaa Muntu ulakonzya kulekelelwa, pele ooyo uukanana cakubisya-bisya Muuya Uusalala takooyoolekelelwa pe, kuciindi cino nikuba kuciindi ciboola.”

Musamu ulazibwa amicelo yawo

³³ “Mbuli mbomuzi kuti musamu kuuli mubotu ayalo micelo yawo mibotu, musamu mubi ulazyala micelo mibi. Kayi musamu uuli woonse ulazibwa amicelo yawo. ³⁴ Nywebo nobana banzoka! Ino inga mulaamba buti cibotu, kakuli nywebo muli babi? Nkaambo muntu waamba cizwide mumoyo wakwe. ³⁵ Muntu mubotu ulaamba zibotu nzyayobola muli nguwe, muntu mubi ulaamba zibi zili muli nguwe. ³⁶ Ncobeni ndamwaambila kuti mubuzuba bwalubeta bantu bayoopegwa mulandu akaambo kamajwi oonse ngubakali kwaamba. ³⁷ Nkaambo mbuli mbwaya kukanana muntu uyoozulwa naa kutapegwa mulandu.”

Cikonzyanyo ca Jona

³⁸ Lino bamwi bamayi ba Mulawo a Bafalisi bakati kuli Jesu, “Omwiiyi tuyanda kuti utucitile maleele.” ³⁹ Jesu wakabaingula kuti, “Basizibi batasyomeki kuli Leza balayanda kubona maleele, pele taakwe nobatitondezegwe, ccita ambweni cakacitika kuli Jona musinsimi. ⁴⁰ Nkaambo mbubonya mbuli Jona mbwaakali mwida lyanswi mpati kwamazuba otatwe, mbubonya oobo awalo Mwanaa Muntu mbwayooba mazuba otatwe mubulongo. ⁴¹ Nkaako baku Nineva bayoomuzula, mubuzuba bwalubeta, balo bakeempa nibakakambaukilwa a Jona. Lino aano mpali wiinda Jona. ⁴² Alimwi mubuzuba bwalubeta mwami mukaintu uuzwa kumusanza uyoomuzula nkaambo wakeenda kuzwa kumagolelo aanyika kuzoomvwa busongo bwamwami Solomoni. Lino aano mpali wiinda Solomoni.

Kubweeda kwamuuya uusofwaazya mumuntu

⁴³ “Kuti muuya uusofwaazya wazwa mumuntu uleendeenda mucimpayuma kuyabuyandaula cilyookezelo, pele ulacibula. ⁴⁴ Wacibula ulati, ‘Ndabweeda kumuntu wangu nkwindazwida!’ Nkabela ciindi ncuupiluka ulajana taakwe cilimo, muntu ooyo uli buyo kabotu. ⁴⁵ Mpoonya aawo ulainka wakweeta iimbi myuuya iili ciloba mibi kwiinda nguwo, nkabela ilanjila akukkala mumuntu ooyo. Eelyo kumamanino buumi bwamuntu ooyo bulabija kwiinda mbwaakali kusaanguna. Mbombubo mbokuyooba kubantu babi mbaazuba aano.”

Bamukowa wa Jesu

⁴⁶ Jesu naakacili kwaambaula kubantu, kwakasika banyina ababunyina bakaima aanze, kabayanda kwaambaula anguwe. ⁴⁷ Nkabela muntu umwi wakamwaambila kuti, “Banyoko abana bokwanu bali anze bayanda kwaambaula anduwe.” ⁴⁸ Jesu wakaingula muntu ooyo wakamwaambila kuti, “Ino baama mbaani, abalo bana bokwesu mbaani?” ⁴⁹ Lino wakatondeka ooko kwakakkede basikwiiya bakwe, wakati, “Tee baama abana bokwesu mbaaba! ⁵⁰ Nkaambo kufumbwa ooyo uucita ziyanda Taata uuli kujulu, ngomukwesu, ngomucizi alimwi mbabaama.”