Mateyo 11
Batumwa bakazwa kuli Joni Mubbapatizi
1 Jesu naakamana kulailila basikwiiya bakwe bali kkumi ababili, wakanyamuka kuzwa ooko wainka kuyooiisya akukambauka muminzi. 2 Lino Joni naakali muntolongo wakamvwa zyamilimo ya Kilisito nkaako wakatumizya basikwiiya bakwe amajwi kuli Jesu. 3 Bakati kulinguwe, “Sena ndonduwe uuboola, naa tucilangila uumbi?”
4 Jesu wakabaingula kuti, “Kamuya mukaambile Joni ncomwamvwa akubona, 5 boofu balabona balema baleenda, basizinsenda balaponyezegwa, basinkematwi balamvwa, bafu balabusigwa, bacete balakambaukilwa Makani Mabotu. 6 Ulilelekedwe muntu uutadonaiki mulindime.”
7 Bacizwa basikwiiya baya Jesu wakatalika kubuzya makamu aabantu bakaliwo kaamba zya Joni wakati, “Ino ncinzi ncimwakainkilide kuyoobona munkanda? Sena ndubu lwakali kuyuuntana aluuwo? 8 Ino mwakainkilide kuyoobona nzi? Sena muntu wakasamide zisani ziteteete? Tee kayi aabo basama ziteteete bakkala mumaanda aabami. 9 Amwaambe, mwakali kuyoobona nzi? Musinsimi na? Iiyi njanda kumwaambila masimpe kuti, ngumwakabona mmupati kwiinda musinsimi. 10 Ngonguwe ooyo uulembedwe mumajwi aa Leza kuti, ‘Ndatuma mutumwa wangu kumbele lyako uuti kakululamikile nzila.’ 11 Ncobeni ndamwaambila kuti, noliba lili taakwe naba omwe muntu wakali kwiinda Joni Mubbapatizi. Nikuba boobo ooyo muniini mubwami bwakujulu mupati kwiinda Joni. 12 Kuzwa ciindi ca Joni Mubbapatizi kusikila sunu bwami bwakujulu bwasika canguzu, abalo bankutwe balabutola canguzu. 13 Mozesi abasinsimi boonse bakali kwaamba zyabwami bwakujulu kusikila Joni naakaboola. 14 Aboobo naa kamuyanda kusyoma majwi aabo, Elija ngu Joni. 15 Ooyo ulaamatwi amvwe!
16 “Ino bantu basunu mbakozyanye aanzi? Bali mbuli bana bakazyanya mucisambilo akwiitana kabati, 17 ‘Twakamusibila nyeele, pele taakwe nimwakazyana! Twakoomoka pele taakwe nimwakatulizya.’ 18 Joni wakali kuliimya kulya, katanywi pe, nikuba boobo bantu bakati, ‘Ulinjidwe!’ 19 Lino Mwanaa Muntu naakasika kalya, kanywa, bakati, ‘Amubone sindya, mukolwi, mulongwe wabasimitelo abatabambi milawo ya Mozesi!’ Musongo ulalitondezya mumilimo yakwe.”
Kusinganyizigwa kwaminzi imwi
20 Lino Jesu wakatalika kukalalila bantu bamu minzi oomo mwaakacitila milimo yanguzu nkaambo tiibakeempa. Wakati, 21 “Maawe kulindinywe nominzi ya Kolazini a Betesaida! Nkaambo kuti milimo yanguzu yakacitwa mulindinywe niyakacitilwa mu Taya a Sidoni, minzi yabantu bakunze, nibakeempa kale akusama masaka akulibikka twe kutondezya kuusa. 22 Pele ndamwaambila kuti mubuzuba bwalubeta mulandu wanu uyoobija kwiinda wa Taya a Sidoni. 23 Ayebo Kapenaumu, sena uyeeya kuti bayookulumbaizya kujulu? Peepe, uyoosowelwa mumulilo uutamani. Nkaambo kuti milimo yanguzu yakacitilwa mulinduwe niyakacitilwa mu Sodomu, nokunga asunu munzi ooyu kauciliko. 24 Pele ndakwaambila kuti mulandu wa Sodomu uzooba muniini mubuzuba bwalubeta kweelanya awako.”
Jesu mbwaakalumba
25 Nciconya ciindi eeco Jesu wakakomba wati, “Ndakulumba Taata, Mwami wajulu anyika kuti wayubunwida bantu buyo zintu nzookasisa kubasongo abamaanu. 26 Mbombubo Taata, mbucakakukonda. 27 Zintu zyoonse zyapegwa kuli ndime a Taata. Taakwe naba omwe uundizi pele nduwe Taata olikke. Alimwi taakwe muntu naba omwe uuzi Taata ccita ndime, ayooyo ngundayubunwida.
28 “Amuboole kulindime, nyoonse nomukatede nomulemedwe, ndime eenti mulemunune. 29 Amulivoleke joko lyangu, mundiiye. Amubone mebo ndili bombede alimwi ndimutete moyo, nkaako muyoojana kulyookezya kwa mumoyo. 30 Joko lyangu lilamweelela awalo mukuli wangu ulamuubaubila.”