Matalikilo 8

Kumana kwazambangulwe akuyuminina kwamaanzi

¹ Lino Leza taakamuluba Nowa abanyama bamusokwe abavubwa baya mbaakali aabo mubbwato. Mpawo Leza wakacitya guwo pati kuti libbubbule, eelyo maanzi akatalika kuyuminina. ² Maanzi aalwizi lwakunsi aanyika akaleka kupoomoka, aalo maanzi akali kuzwa kujulu akaimikwa. ³ Nkaako maanzi akatalika kuya buyuminina kwamazuba aali mwaanda amakumi osanwe. ⁴ Mubuzuba bwakkumi aciloba bwamwezi waciloba, bbwato lyakakkala acilundu cili mubusena bwa Alalati. ⁵ Maanzi aakacili kuya buyuminina, eelyo mubuzuba bwakusaanguna bwamwezi wakkumi, nsonga yazilundu yakalibonya.

⁶ Nikwakainda mazuba aali makumi one, Nowa wakajalula mpulungwido yabbwato njaakapangide, ⁷ wakatuma cikwangala anze. Muyuni ooyo wakali kuuluka-uluka buyo koonse-koonse kusikila maanzi naakayuminina. ⁸ Kumane Nowa wakatuma nziba kuyoolanga kuti naa maanzi ayuminina. ⁹ Pele akaambo kakuti maanzi akacilivumbide nyika nziba taakwe niyakajana busena bwakukkala kuti ilyookezye nkaako yakabweeda kulinguwe. Eelyo Nowa wakatandabika janza mumpulungwido akwiibweedezya mubbwato. ¹⁰ Wakalindila mazuba aali ciloba, eelyo wakiituma alimwi nziba kuzwa mubbwato. ¹¹ Niyakabweeda kulinguwe kumangolezya wakabona yaletelela atu tete lyamusamu wa Oliva mumulomo wayo. Aboobo Nowa wakaziba kuti maanzi atalika kuceya ansi. ¹² Alimwi Nowa wakalindila aambi mazuba aali ciloba, eelyo nziba wakiituma alimwi. Pele kuciindi eeci taakwe niyakabweeda alimwi kulinguwe pe.

¹³ Nowa naakaba aamyaka iili myaanda iili cisambomwe aumwi mubuzuba bwakusaanguna bwamwezi wakusaanguna, maanzi akayuminina cakumaninina anyika. Naakajalula cijazyo campulungwido yabbwato, wakalanga anze wabona kuti nyika yayumina. ¹⁴ Mubuzuba bwamakumi obilo aciloba bwamwezi wabili, nyika yakayumininide limwi.

¹⁵ Lino Leza wakaambila Nowa kuti, ¹⁶ “Kozwa mubbwato yebo amukaintu wako, bana bako abakaintu babo. ¹⁷ Kozwa antoomwe abanyama boonse, abayuni abanyama bavubwa azikalaba, uzigwisizye anze kutegwa zikazyalane akuvuzyanya.” ¹⁸ Aboobo Nowa wakazwa mubbwato amukaintu wakwe, bana bakwe antoomwe abakaintu babo. ¹⁹ Banyama boonse bamusokwe, abanyama bavubwa abayuni, alimwi azikalaba, zyoonse zyakazwa mubbwato mutukamu-tukamu twamisyobo yazyo.

Nowa mbwaakapa cipaizyo ku Mwami Leza

²⁰ Mpawo Nowa wakayakila Mwami Leza cipaililo, wakabweza omwe-omwe kuzwa kumisyobo yabanyama abayuni beelede kupaizya, wakabatenta acipaililo. ²¹ Nkabela Mwami Leza naakamvwa bweema bubotu, wakalyaambauzya lwakwe mwini wakati, “Nsikooyoosinganya limbi nyika akaambo kazintu nzyacita muntu. Nkaambo ndilizi kuti kuzwa kuciindi cabwana bwakwe, miyeeyo yakwe yoonse mmibi. Nsikooyoozinyonyoona limbi zintu zyoonse zipona munyika mbuli mbondacita lino.

²² Kwaciindi coonse nyika eeyi niiciliwo, kunooli ciindi cakusyanga aciindi cakutebula.

Lyoonse kunoli ziindi zyamupeyo azyamusemuna, ziindi zyacilimo azyamainza, aziindi zyasikati azyamasiku. Ziindi eezi tazikooyoomana pe.”