Matalikilo 47

¹ Aboobo Josefa wakaya kuyooambila Falo kuti, “Taata abapati bangu basika kuzwa ku Kenani, baletelela amatanga aabo aambelele, aaŋombe alimwi alubono loonse ndobajisi. Nkobali ku Gosyeni.” ² Naakamana kukanana, wakatondezya aabo banabokwabo bosanwe kuli Falo. ³ Lino Falo wakababuzya kuti, “Ino muzi mulimo nzi?” Mpoonya bakamwiingula kuti, “Tuli beembezi omwami, mbubonya mbuli bwakali bamatata. ⁴ Twaboola kuti tuzookkale munyika iino nkaambo omwami, nzala ilunzya kasuko ku Kenani cakuti mane takucikwe amacelelo mabotu aamatanga eesu ooko. Nkaako omwami, tukumbila kuti tukkale mu Gosyeni.”

⁵ Mpawo Falo wakaambila Josefa kuti, “Uso abapati bako bakusikila ⁶ inga bakkala ku Gosyeni. Nkabela naa ulizi bamwi babo bakonzya kweembela kabotu, ubape bulangi bwabutanga bwangu abwalo.” ⁷ Aboobo Josefa wakaleta Jakobo wisi akuzoomutondezya kuli Falo. Aawo Jakobo wakaleleka Falo. ⁸ Falo wakabuzya Jakobo kuti, “Ino uli aamyaka yongaye?” ⁹ Jakobo wakaingula kuti, “Myaka yakweendeenda kwangu iili mwaanda amakumi otatwe. Eeyi myaka mice alimwi njabuyumu-yumu, tiili mbuli myaka njibakapona bamatata mukweendeenda kwabo pe.” ¹⁰ Amane kwiingula boobo Jakobo wakalaya Falo akuunka. ¹¹ Eelyo Josefa wakapa wisi abanabokwabo cipaanzi canyika ya Ijipiti mbotu kwiinda. Wakababikka munyika iili kubbazu lyaku Lamesisi, mbubonya mbuli Falo mbwaakalailila. ¹² Josefa wakali kupa zilyo kuli wisi akubanabokwabo, alimwi akuli boonse bamukwasyi mbuli kumweelwe wabo.

Josefa mbwaakeendelezya muciindi canzala mpati

¹³ Inzala yakakomena kapati cakuti tiikwakali kujanika cilyo munyika yoonse mbwiibede, mane bantu bamu Ijipiti amu Kenani bakagonkelwa akaambo kanzala. ¹⁴ Eelyo Josefa wakabungika mali ngobakali kuuzya cakulya bantu ba Ijipiti abaku Kenani, wakatola mali aaya kuŋanda ya Falo. ¹⁵ Lino mali oonse naakabamanina bantu bamu Ijipiti abamu Kenani bakasika kuli Josefa akuzoomwaambila kuti, “Tulomba cilyo! Bona tulakufwida. Kayi mali atumanina.” ¹⁶ Mpawo Josefa wakabaingula kuti, “Anooli mali aanu amumanina, mweelede kweeta lubono lwabanyama akubbadela kulindime, ndendilyo nenga ndamupa cakulya.” ¹⁷ Nkabela bakaleta lubono lwabo lwabanyama kuli Josefa, walo wakabapa cilyo mukusintana amabbiza aabo, mbelele zyabo, ŋombe ambongolo zyabo. Mwaka ooyo Josefa wakabapa bantu cilyo mukusintana abanyama babo.

¹⁸ Mumwaka wakatobela bantu bakaboola kulinguwe alimwi akuzooti, “Tatukonzyi kusisa makani aaya kulinduwe mwami, aakuti mali eesu oonse atumanina, alimwi lubono lwesu lwabanyama lulikulinduwe sunu. Nkokuti swebo taakwe acomwe ncotujisi cakunga twakupa pe, ccita buyo mibili yesu amyuunda yesu. ¹⁹ Sena ncibotu kuti tufwe swebo amyuunda yesu? Utuule swebo alimwi uule amyuunda yesu mukusintana acakulya. Tulaba bazike ba Falo, alimwi ngonguwe uutitole amyuunda yesu. Utupe maila kutegwa tupone, tutafwi anzala kuti nyika itanyonyooki.”

²⁰ Aboobo Josefa wakaula myuunda yoonse mu Ijipiti, yakaba ya Falo nkaambo muntu oonse mu Ijipiti wakauzya muunda wakwe, nkaambo nzala yakali mpati kapati munyika. ²¹ Munzila eeyi Josefa wakaula bantu banyika yoonse ya Ijipiti mboizulwa baba bazike. ²² Inyika njaatakaula njeeyo yakali yabapaizi. Balo taakwe nibakauzya myuunda yabo nkaambo Falo wakali kubavozya mali mace aakuponena mpawo. ²³ Nkabela Josefa wakaambila bantu kuti, “Amubone! Sunu ndamuula nywebo amyuunda yanu mwaba bantu ba Falo. Lino ngaaya maila ngomweelede kusyanga mumyuunda. ²⁴ Ciindi cakutebula mweelede kuti mukape cipaanzi casanu cazilyo zyanu kuli Falo. Citikasyaale ciyooba canu, cikabe cakuyoosyanga acakulya canu amikwasyi yanu.” ²⁵ Balo bakaingula kuti, “Watufutula, watucita kabotu. Lino swebo twaba bazike ba Falo.” ²⁶ Josefa wakacita kuti ube mulawo wacisi ca Ijipiti wakupa cipaanzi casanu cazyakulya zyatebulwa kuli Falo. Mane ooyu mulawo nkuucili asunu. Pele myuunda yabapaizi ilikke njiyatakali ya Falo.

Jakobo waambilizya mbwayanda kuti bana bakwe bakacite aakufwa

²⁷ Bana ba Isilayeli bakakkala mu Ijipiti ku Gosyeni. Bakayuma akuba aabana banji. ²⁸ Jakobo wakakkala myaka iili kkumi aciloba mu Ijipiti, kusikila waba aamyaka iili mwaanda amakumi one aciloba. ²⁹ Lino nicakaswena aafwiifwi ciindi calufu lwakwe, wakaita mwanaakwe Josefa akuti kulinguwe, “Konkezya kulindime, bikka janza lyako kunsi lya cibelo cangu akusyomezya kuti uyoosyomeka kapati kulindime. Ciindi ndaakufwa utakandizikkili mu Ijipiti pe. ³⁰ Ndiyanda kuyoozikkilwa ooko kulede bamatata. Ukandiyumune kuzwa mu Ijipiti akuyoondizikka kucuumbwe cabo.” Josefa wakaingula kuti, “Mbubo, ndiyoocita oobo mbooamba.”

³¹ Isilayeli wakaamba kuti, “Konkezya kulindime kuti uyoocita ncobeni.” Mpoonya Josefa wakakonkezya. Eelyo Isilayeli wakakotamina kumitwe lyabulo bwakwe akukomba Leza.