Matalikilo 45
Josefa mbwaakaliyubununa kubanabokwabo
1 Lino Josefa taakacili kukonzya kulijata kumbele lyabeenzinyina bakaimvwi aanguwe. Nkaako wakabalailila kuti, “Amugwisye bantu boonse.” Aboobo kunyina muntu buyo wakaliwo ciindi Josefa naakaliyubununa kubanabokwabo kuti ngonguwe. 2 Lino wakalila kapati cakuti Baijipiti bakamumvwa, alimwi makani oonse aaya akamvwigwa kuŋanda ya Falo. 3 Josefa wakaambila banabokwabo kuti, “Ndime Josefa. Sena taata ucipona?” Bamvwe boobo banabokwabo bakayoowa cakuti tiibakali kukonzya kwiingula. 4 Mpoonya Josefa wakabaambila kuti, “Amuswene aafwiifwi nobakwesu.” Nibakaswena, wakati, “Ndime musyoonto wanu Josefa, ngumwakauzya kuti atolwe ku Ijipiti. 5 Pele mutapengi, nikuba kutyompwa akaambo kakuti mwakanduuzya okuno. Ngu Leza lwakwe mwini wakandituma, akundicita kuti ndimusaangunine kuboola kutegwa ndizoomufutule. 6 Uuno mwaka ngwabili buyo nzala kiicili munyika, pele kucili aimbi myaka yosanwe bantu nobatakalimi naa kutebula. 7 Tamubwene Leza nguwakandituma kuti nsaangune nzoomufutule kuti lunyungu lutalobi. 8 Nkaako tamuli ndinywe mwakandituma kuno pe. Ngu Leza mwini. Wakandibikka kuti ndibe mulailili mupati wa Falo, akuti ndibe mweendelezi waŋanda acisi cakwe coonse ca Ijipiti.
9 “Lino amufwambaane, kuunka kuli taata, mukamwaambile kuti Josefa mwanaako wati, ‘Leza wakandibikka kuti mbemweendelezi wacisi coonse ca Ijipiti. Boola kulindime cakufwambaana. 10 Uzookkala mucisi ca Gosyeni nkaambo inga ndakonzya kukubamba yebo, bana bako, bazyukulu bako, mbelele, mpongo zyako, ŋombe zyako, alimwi azintu zyako zyoonse. 11 Nzookubamba nkaambo kucili aimbi myaka yanzala yosanwe. Mebo nsiyandi kuti yebo, amukwasyi wako azyoonse nzyojisi zifwe nzala pe.’ 12 Lino nywebo nyoonse, alimwi amusyoonto wangu Benjamini, mulakonzya kubona kuti ndime lwangu neeambaula kulindinywe. 13 Amukaambile taata makani aabulemu bwangu boonse mbwendijisi omuno munyika ya Ijipiti, alimwi mukamwaambile azintu zyoonse eezyo nzimwakalibonena. Mufwambaane kweeta taata kuno.”
14 Eelyo Josefa wakamufumbata musyoonto wakwe Benjamini akulila, awalo Benjamini wakalila aawo naakamufumbata. 15 Kuzwa aawo Josefa wakabamyonta banabokwabo boonse, akulila aawo naakali kubafumbata.
16 Lino makani aakuti banabokwabo Josefa bakasika naakamvwigwa kuŋanda ya Falo, Falo lwakwe mwini alimwi ababelesi bakwe bapati, bakabotelwa. 17 Mpoonya Falo wakaambila Josefa kuti, “Baambile banabokwanu kuti balibambile, babweede ku Kenani. 18 Bakamweete wisi alimwi amikwasyi yabo, eelyo bakaboole kulindime. Ndizoobapa nyika iiindilila kubota omuno mu Ijipiti alimwi balakonzya kunoozoolya micelo yanyika mibotu kwiinda. 19 Alimwi ubaambile kuti batolelezye ankalaki zizwa muno mu Ijipiti bakatansike bakaintu babo abana babo. Ubaambile bakamweete uso, bakaboole kuno. 20 Batakapengi akuyeeya lubono lwabo ndobatikasiye, nkaambo kuno yoonse nyika mbotu kwiinda mu Ijipiti izooba yabo.”
21 Lino bana ba Isilayeli bakacita mbubonya oobo. Josefa wakabapa nkalaki mbubonya mbuli Falo mbwaakalailila. Alimwi wakabapa abulilu bwamulweendo. 22 Wakapa kuli umwi aumwi wabo zisani zyakusama, pele kuli Benjamini wakapa mali aansiliva aali myaanda yotatwe alimwi azyakusama zimbi zyeebeka zyosanwe. 23 Kuli wisi wakatumizya mbongolo zili kkumi zyakayumwide mikuli yazilyo zibotu zyamu Ijipiti, alimwi ambongolo zili kkumi zyakayumwide maila, azinkwa, azilyo zimwi zyabulilu bwawisi. 24 Wakatuma banabokwabo mulweendo lwabo, nibakanyamuka wakabaambila kuti, “Mutanooya bupampana munzila.”
25 Lino bakazwa mu Ijipiti babweeda ku Kenani, kuli Jakobo wisi. 26 Nkabela bakamwaambila kuti Josefa ucipona. Alimwi bakati, “Ngonguwe weendelezya cisi coonse ca Ijipiti.” Aaya makani akamugambya Jakobo kapati, alimwi taakali kukonzya kwaazumina pe. 27 Pele nibakamwaambila makani oonse ngaakabaambila, anaakabona nkalaki eezyo Josefa nzyaakatumizya kuzoomubweza kumutola ku Ijipiti, wakakondwa kapati. 28 Mpoonya wakaamba kuti, “Mbubo ndazumina, mwanaangu Josefa ucipona ncobeni! Ndeelede nkamubone nketanafwa.”