Matalikilo 40

Josefa mbwaakapandulula ziloto zyabasintolongonyina

¹ Ciindi cimwi musule aakooku, bamwi babelesi ba mwami waku Ijipiti, bakamubisizya simalelo wabo. Mwabaaba umwi wakali mupati wabasikujika umwi ooyu wakali mupati wabasikutola zyakunywa zya mwami. ² Falo wakabanyemena babelesi bakwe aaba bobilo, mupati wabasikutola zyakunywa amupati wabasikujika, ³ eelyo wakababikka muntolongo mumaanza aamulangi mupati, mubusena mumonya mwakaangidwe Josefa. ⁴ Mulangi mupati wakabikka Josefa kuti abe nguubalanga abalo aaba. Bakakkala mazuba manji muntolongo.

⁵ Bumwi busiku kabali muntolongo, aaba babelesi ba Falo bobilo bakalota. Umwi aumwi wabo wakalota ciloto cakwe mwini cakajisi bupanduluzi bwaco cilikke. ⁶ Lino Josefa naakabonana ambabo cifumo-fumo, wakabona kuti balipengede mumyoyo. ⁷ Eelyo wakababuzya kuti, “Ino nkaambo nzi ncomuuside sunu?” ⁸ Bakamwiingula kuti, “Twalota, pele kuno kunyina uukonzya kupandulula ziloto eezyo pe.” Amvwe boobo Josefa wakati, “Leza nguunga wapandulula ziloto, amundaambile nzimwalota.”

⁹ Lino mupati wabasikutola zyakunywa wakaamba ciloto cakwe wati, “Mebo muciloto cangu kwali cisiko camusaansa, camenede kumbele lyangu, ¹⁰ cajisi mitabi yotatwe. Mpoonya mbucasonsela buyo matu, cafulula maluba-luba, ndilyonya amicelo yatalika kubizwa. ¹¹ Lino mujanza lyangu ndajisi nkomeki ya Falo, aboobo ndacela nsaansa eezyo akuzisininina munkomeki mane ndamupa Falo kuti anywe.” ¹² Aawo Josefa wakati, “Mboobu mbocaamba. Mitabi yotatwe yaamba mazuba otatwe. ¹³ Kwamana buyo mazuba otatwe Falo uyookugwisya muntolongo, alimwi uyookulekelela mulandu wako, unooyoomupa nkomeki mbubonya mbuli mbookali kumubelekela kotana jana mapenzi aaya. ¹⁴ Pele ukandiyeeye mebo zintu zyaakukweendela kabotu, akaka ukandaambilile ambebo kuli Falo, kuti ndizoogwisigwe muntolongo. ¹⁵ Mebo ndakabbigwa akugwisigwa munyika ya Bahibulu, akwalo okuno taakwe acomwe ncondakacita kuti ndibikkwe muntolongo.”

¹⁶ Lino awalo mupati wabasikujika naakabona kuti ciloto camweenzinyina capandululwa kabotu, wakati kuli Josefa, “Ambebo nceeci ciloto ncendalota. Ndayumwide nsuwo zyotatwe zyazinkwa amutwe, ¹⁷ nkabela mucisuwo cali atala aansuwonyina mwali misyobo yoonse yazilyo zikange zya Falo. Pele bayuni bali kuzilya.” ¹⁸ Josefa wakaingula kuti, “Nkooku kupandulula kwaco. Nsuwo zyotatwe zyaamba mazuba otatwe. ¹⁹ Kwamana buyo mazuba otatwe, Falo uzookugwisya akuyookukosola mutwe. Eelyo mubili wako uyoowaanzika mumusamu, nkaako bayuni bayoolya mutumba wako.”

²⁰ Lino oobo buzuba bwatatu bwakali mbobwakuzyalwa kwa Falo, aboobo wakacitila babelesi bakwe boonse pobwe pati. Mpoonya wakagwisya muntolongo mupati wabasikupa zyakunywa kuli Falo amupati wabasikujika. ²¹ Lino mupati wabasikupa zyakunywa wakamubweedezya alimwi mumulimo wakwe, ²² pele mupati wabasikujika wakamujaya. Kwakaba mbubonya mbuli Josefa mbwaakaambide mukupandulula ziloto zyabo. ²³ Pele mupati wabasikupa zyakunywa taakwe naakayeeya Josefa, wakamuluba.