Matalikilo 24

Izaka mbwaakakwatilwa

¹ Lino Abulahamu wakacembala kapati, alimwi Leza wakali kumuleleka muli zyoonse nzyaakali kucita. ² Abulahamu wakaambila mubelesi wakwe mupati, ooyo wakali mulangi walubono lwake loonse wakati, “Njizya janza lyako kunsi acibelo cangu, omana ukonkezye. ³ Ukonkezye ku Mwami Leza, wajulu anyika, kuti tokooyoosalila mwanaangu Izaka mukaintu wakukwata kuzwa ku Bakenani bamunyika njekkede. ⁴ Uleelede kubweeda kucisi cokwesu nkotikajanine mwanaangu Izaka mukaintu kuzwa kubantu bangu.” ⁵ Mubelesi wakabuzya kuti, “Ino kuti mukaintu waakukaka kuboola andime kuno, nkacite buti? Sena ndikabweedezye mwanaako kucisi ooko nkookazwida?” ⁶ Abulahamu wakaingula kuti, “Utakasoli kuyoobweedezya mwanaangu ooko pe! ⁷ Nkaambo Mwami Leza, Leza wajulu, wakandigwisya muŋanda yataata akuzwa munyika yanzubo zyangu, walo wakandisyomezya acikonke kuti uyoopa nyika iino kulunyungu lwangu. Leza uyootuma mungelo wakwe kulinduwe kuti ukakonzye kujanina mwanaangu mukaintu wakukwata ooko. ⁸ Pele naa mukaintu atakazumini kuboola anduwe, pe, yebo uyooangunuka kuzwa kucikonke eeci ncooticite. Pele nikuba kuti zintu zikabe buti, utakabweedezyi mwanaangu ooko pe.” ⁹ Nkaako mubelesi wakabikka janza lyakwe kunsi aacibelo ca Abulahamu, simalelo wakwe, wakakonkezya kuti uyoocita mbuli mbwaamwaambila.

¹⁰ Mpoonya ooyo mubelesi wakatola nkamela zyasimalelo wakwe zili kkumi azipego zibotu zinji, wakalibambila kuunka kumunzi wa Nahoo, mucisi ca Mesopotamiya. ¹¹ Lino naakaakusika ooko, wakacita nkamela zyakwe kuti zifugame kumukalo wakali kunze aamunzi. Eeci cakali ciindi camangolezya aawo bakaintu nobaboola kuzooteka maanzi. ¹² Mpawo wakakomba wakati, “O Mwami Leza, Leza wa simalelo wangu, ndigwasye kuti makani eende kabotu sunu alimwi utondezye luyando lwako kuli simalelo wangu Abulahamu. ¹³ Mpaawa ndiwaano amukalo alimwi basimbi boonse bamumunzi oomu balaboola kuti bateke maanzi. ¹⁴ Ono ndakumbila musimbi umwi kuti, ‘Baama, tula nongo ndipa maanzi aakunywa.’ Lino musimbi ooyo aamba kuti, ‘Amunywe, ndamana ndapa ankamela zyanu kuti zinywe,’ ndizibe kuti ngonguwe ngoosalila mutwanga wako Izaka. Naa cacitika ndaziba kuti watondezya luyando lwako kuli simalelo wangu Abulahamu.”

¹⁵ Katana akumanizya kukomba, musimbi umwi uutegwa Labeka wakasika kayumwide nongo akkuko. Wakali mwanaa Betuweli, Betuweli ooyo wakali mwanaa Milika mukaintu wa Nahoo, munyina Abulahamu. ¹⁶ Labeka wakacili musimbi uutanaziba mwaalumi alimwi wakali mubotu kapati. Wakanjila mumukalo wateka maanzi munongo, mpoonya wazwida anze. ¹⁷ Mubelesi wa Abulahamu wakazuzaanina kulinguwe akuyooamba kuti, “Baama, ndikumbila maanzi ndinywe.” ¹⁸ Musimbi wakati, “Ngaaya amunywe.” Mpoonya wakafwambaana kutula nongo, wiijatilila ciindi naakali kunywa mubelesi ooyo. ¹⁹ Naakamana kunywa, Labeka wakaamba kuti, “Azyalo nkamela zyanu ndazitekela ndizipe zinywe kusikila zyoonse zimvwe.” ²⁰ Cakufwambaana wakatila maanzi aayo mucinywido, wakazuzaanina kumukalo kuyooteka aambi, wazoozitilila mucinywido, eelyo nkamela zyakanywa akumvwa. ²¹ Ciindi coonse eeco Labeka naakali kukutauka milimo eeyo, mubelesi wa Abulahamu wakali kulangilila kaumwide kuti abone naa ncobeni Leza wakamupa coolwe mulweendo lwakwe.

²² Lino Labeka naakamana kunywisya nkamela, mubelesi ooyo wakagwisya nweenwe yangolida yakali kulema cisela casyekeli, alimwi ankaya zyangolida zyobilo zilema masyekeli aali kkumi. ²³ Eelyo wakamubuzya wati, “Ndaambila, ino uli mwanaani? Alimwi sena kwenu kuli busena bwakuti mebo abaaba mbendaabo inga twakonzya koona masiku?” ²⁴ Labeka wakaingula kuti, “Ndili mwanaa Betuweli, muzyukulu wa Nahoo a Milika. ²⁵ Cakulya cankamela nkocili abusena bwakuti moone nywebo nkobuli.” ²⁶ Eelyo muntu ooyo wakafugama akukomba kuli Leza ²⁷ wati, “Alumbwe Mwami Leza, Leza wasimalelo wangu Abulahamu, wabamba cisyomezyo cakwe kuli simalelo wangu. Leza wandisolweda akundilulamika kuŋanda yabaluzubo lwasimalelo wangu.”

²⁸ Mpoonya musimbi ooyo wakazuzaanina kwabo, wakubaambila makani oonse. ²⁹ Labani, munyinandumi Labeka, wakabona nweenwe ankaya kumucizi wakwe. Mbwaakamanina buyo makani wakazuzila kumukalo kwakali mweenzu ooyo. ³⁰ Wakasika kubusena kwakaimvwi mubelesi wa Abulahamu munsi ankamela kumukalo. ³¹ Wakati kulinguwe, “Amuboole kumunzi, nywebo nomulelekedwe a Mwami Leza. Ino mukkalila nzi okuno kusokwe? Amubone nkobuli busena kuŋanda alimwi ndijisi abusena bwankamela zyanu.” ³² Mweenzu ooyo naakasika kumunzi wakanjila muŋanda. Labani wakaangununa mukuli wankamela alimwi wakazipa bwizu kuti zilye. Naakamana, wakeeta maanzi aakuti mubelesi wa Abulahamu abantu bakwe basambe kumaulu. ³³ Nibakabaletela cakulya, ooyo mubelesi wa Abulahamu wakaamba kuti, “Nsikoolya kusikila ndaambe makani ngejisi.” Labani wakati, “Mbubo, amwaambe.”

³⁴ Wakatalika akwaamba kuti, “Ndili mubelesi wa Abulahamu. ³⁵ Mwami Leza wakamuleleka simalelo wangu akumucita kuti abe muntu mupati. Wakamupa matanga aambelele, mpongo alimwi aŋombe, amali aansiliva aangolida manji, alimwi abazike baalumi abakaintu, ankamela alimwi ambongolo. ³⁶ Sala, mukasimalelo wangu wakazyala mwana mulombe kali mucembele kale. Lino simalelo wangu wakapa lubono lwakwe loonse ndwajisi mumaanza aamwanaakwe. ³⁷ Lino mebo wakandicita kuti ndikonkezye kuti ndilabamba malailile aakwe aaya aakuti, ‘Utakasoli kujanina mwanaangu mukaintu wakukwata kuzwa kubasimbi bamunyika ya Kenani, omuno mwenkede. ³⁸ Ukainke kumunzi wokwesu, kubantu baŋanda yataata, baluzubo lwangu, kuti ukajanine mwanaangu mukaintu kuzwa kulimbabo.’ ³⁹ Lino mebo ndakaamba kuli simalelo wangu kuti, ‘Ino nkacite buti naa mukaintu ooyo akakake kuboola kuno.’ ⁴⁰ Pele walo wakati, ‘Mwami Leza ooyo ngwentobela lyoonse, uyootuma mungelo wakwe, kuti akeende ayebo akuyookupa coolwe. Uyoojana mukaintu wamwanaangu kuzwa kubantu bokwesu, kuzwa mumukwasyi wataata. ⁴¹ Kuti naa waakuunka kubantu bokwesu, bamana balo bakakukasye musimbi, aawo yebo uyooangunuka kuzwa kucikonke eeci.’”

⁴² Lino nindasika kumukalo, ndakomba kuti, “O Mwami Leza, Leza wasimalelo wangu Abulahamu, ndalomba ndipa coolwe. ⁴³ Lino mbwendi aamukalo aano, kwaboola musimbi kuzooteka, ndamulomba kuti, ‘Akaka baama, ndipa maanzi aakunywa kuzwa munongo yako.’ ⁴⁴ Lino kuti aingule kuti, ‘Iiyi, konywa ankamela zyako ndilazitekela azyalo zinywe,’ ndaziba kuti ngonguwe Mwami Leza ngwaasalila mwana wasimalelo wangu. ⁴⁵ Nkabela nketanamanizya kukomba ooko kwamumoyo, Labeka wasika kayumwide nongo akkuko, naasika, wanjila mumukalo kuyooteka maanzi. Eelyo ndati kulinguwe, ‘Baama, ndakumbila kondigwasya maanzi ndinywe.’ ⁴⁶ Kufwambaana watula nongo, eelyo waamba kuti, ‘Iiyi, kamunywa alimwi ankamela zyanu ndilazitekela azyalo zinywe.’ Aboobo ndanywa, alimwi wazinywisya ankamela zyangu. ⁴⁷ Nindamubuzya kuti, ‘Ino uli mwanaani?’ Waingula kuti, ‘Ndili mwanaa Betuweli, muzyukulu wa Nahoo a Milika.’ Mpampawo mpindamusamikila nweenwe ankaya kumaboko. ⁴⁸ Mpoonya ndafugama akukomba Mwami Leza. Ndatembaula Mwami Leza, Leza wasimalelo wangu Abulahamu, wakandisolweda kabotu. Wandileta kumwanookwabo simalelo wangu. ⁴⁹ Lino kuti naa mwasyomeka kuli simalelo wangu mundaambile, naa tabusyi mundizibye kutengwa ndizibe cakucita.”

⁵⁰ Mpoonya Labani a Betuweli bakati, “Mbokunga makani aaya azwa ku Mwami Leza, tatuli ndiswe notweelede kusala pe. ⁵¹ Bona ngooyu Labeka mpali, komutola uunke awe. Akabe mukaintu wamwanaa simalelo wako, mbubonya mbuli Mwami Leza mbwaamba.” ⁵² Lino mubelesi wa Abulahamu naakamvwa majwi aabo, wakafugama akukomba Mwami Leza. ⁵³ Nkabela wakagwisya lubono lwamali aansiliva angolida, alimwi azisani, wakazipa kuli Labeka. Kuli Labani munyinandumi Labeka abalo banyina wakabapa zipego zidula.

⁵⁴ Eelyo mubelesi ooyo abantu aabo mbaakali kweenda aabo bakalya akunywa, bamane bakoona. Nibakabuka cifumo-fumo, muntu ooyo wakati, “Mundileke ndibweede kuli simalelo wangu.” ⁵⁵ Pele banyina musimbi alimwi a Labani bakati, “Musimbi kacikkede-kkede andiswe kwamvwiki yomwe naaba mazuba aali kkumi, kwamana natuunke.” ⁵⁶ Muntu ooyo wakati, “Mutandimusyi-musyi pe. Mbuli Mwami Leza mbwaalulamika kale lweendo lwangu, amundileke ndibweede kuli simalelo wangu.” ⁵⁷ Bakaingula kuti, “Atwiite musimbi tumvwe walo mbwayeeya.” ⁵⁸ Aboobo bakaita Labeka akumubuzya kuti, “Sena ulayanda kuunka ambabo?” Wakaingula kuti, “Ndainka.” ⁵⁹ Nkaako bakazumina kuti Labeka awakali kumulela bainke amubelesi wa Abulahamu abantu bakwe. ⁶⁰ Eelyo bakaleleka Labeka amajwi aaya,

“Yebo, omucizi wesu, ukabe banyina babantu banji.

Bana balunyungu lwako abakakome minzi yabasinkondonyina.”

⁶¹ Mpawo Labeka wakanyamuka abasimbi bakwe bakatanta ankamela bainka amubelesi wa Abulahamu. Mbombuboobu mbwaakainka a Labeka.

⁶² Lino Izaka wakalonga kuzwa ku mukalo wa Lahailoyi waakukkala kumusanza wacisi. ⁶³ Kumangolezya naakali kuya bweendeenda kumuunda, wakabona nkamela kazizabuka. ⁶⁴ Lino Labeka naakalanga wakabona Izaka, mpoonya wakaseluka ankamela njakatantide. ⁶⁵ Wakabuzya mubelesi wa Abulahamu kuti, “Ino nguni muntu uulya mumuunda uuzabuza kulindiswe?” Mubelesi wakaingula kuti, “Ngusimalelo wangu.” Aboobo Labeka wakabweza cisani cakwe akulivumba kumutwe. ⁶⁶ Lino mubelesi wakaambila Izaka makani aalweendo lwakwe. ⁶⁷ Nkabela Izaka wakanjizya Labeka mutente lyakwe, wakaba mukaintu wakwe. Izaka wakali kumuyanda kapati mukaintu wakwe cakuti wakatontozegwa musule alufu lwabanyina.