Matalikilo 19

Busofwaazi bwabantu bamu Sodomu

¹ Lino bangelo bobilo bakasika kumunzi wa Sodomu ciindi camangolezya, bakajana Loti kakkede munsi amulyango mupati wamunzi. Mbwaakababonena buyo, wakanyamuka akubacingauzya. Naakasika nkobakabede wakafugama kumbele lyabo. ² Wakati, “Amuswiilile, nobaalu bangu, ndamukumbila kuti muleye munjile muŋanda yangu, musambe kumaulu, alimwi mulale bwaŋonzi buyo. Bwaca mulafuma kuya mulweendo lwanu.” Pele bakamwiingula kuti, “Peepe, tulalala anze.” ³ Pele Loti wakazumanana kubakombelezya limwi bakazumina kuunka kuŋanda yakwe. Eelyo wakapanga zinkwa zitakwe minena, alimwi wakababambila cilalilo cibotu kapati, ncobakalya.

⁴ Beenzu aabo kabatanalala, baalumi bamu Sodomu bakasika akwiima kabazingulukide ŋanda ya Loti. Mbanji baalumi bamumunzi bakali aŋanda aawo, bakubusi antoomwe abamanene. ⁵ Bakaita Loti akumubuzya kuti, “Bali kuli baalumi basika kulinduwe masiku aano? Bagwisizye anze tuyanda kuti tusobane ambabo.”

⁶ Nkaako Loti wakazwida anze akujala mulyango waŋanda yakwe. ⁷ Wakati kubantu aabo, “Nobeenzuma, ndamukumbila kuti mutaciti cintu cili mbuli ceeci kubantu aaba. ⁸ Amubone, mebo ndijisi bana basimbi bobilo batanaziba mwaalumi. Naa kamuyanda ndamupa kuti mucite coonse ncomuyanda kulimbabo. Pele mutabi nimucita cimwi cintu cibi kubaalumi aaba beenzu, nkaambo basikila muŋanda yangu, aboobo ndeelede kuti ndibakwabilile.”

⁹ Pele bakamwaambila kuti, “Tija, twiinde, yebo omuzwakule! Nduweni yebo kuti usole kutulailila ncotweelede kucita? Kozwa aawa, nkaambo inga tulakucita cibyaabi kwiinda ncetunga twacita kubeenzu bako aaba.” Mpoonya bakatonka Loti, akuswena kuti bazootyole citendele. ¹⁰ Pele balo baalumi bobilo aabo bakali muŋanda, bakakwelela Loti muŋanda, mpoonya bajala mulyango. ¹¹ Mpawo bakoofwaanzya baalumi boonse bakali anze, cakuti bakakacilwa kubona mulyango waŋanda.

Loti mbwaakazwa mu Sodomu

¹² Lino aabo baalumi bobilo bakabuzya Loti kuti, “Sena kuli bantu bambi baluzubo lwako twaambe bamakwe, bana balombe abasimbi, nokuba kufumbwa mbojisi mumunzi muno? Bagwisye, ¹³ nkaambo munzi ooyu tuyanda kuunyonyoona. Mwami Leza wakamvwa zyabubi buyoosya bwaambwa kujatikizya bantu bamumunzi ooyu, aboobo watutuma kuti tuzoounyonyoone.” ¹⁴ Eelyo Loti wakaya kuyooambila baalumi aabo bakali kusela bana bakwe basimbi, wakati kulimbabo, “Amufwambaane muzwe mumunzi muno, nkaambo Mwami Leza uyanda kuunyonyoona.” Pele balo bakayeeya kuti wisizyala wakali kusobana buyo.

¹⁵ Nkabela nikwakaba kubucedo, aabo bangelo bakafwamvwaanya Loti kabati, “Kofwambaana! Gwisya mukaintu wako abana bako basimbi bobilo aaba, uunke, kutegwa mutafwidilili munzi ooyu wanyonyoonwa.” ¹⁶ Pele Loti wakacili kuzingauka. Mwami Leza wakamufwida luzyalo, aabo baalumi bakamujata kumaboko, walo amukaintu wakwe, abana bakwe basimbi bobilo, babagwisya mumunzi, akuyoobasiya kunze lyawo. ¹⁷ Nibakamana kubagwisya, umwi wabangelo wakati kulimbabo, “Amutije, mufutule buumi bwamu! Mutacebi, alimwi mutaimi-imi mukkuti pe, amutijile kuzilundu zili kule, kutegwa mutafwidilili.” ¹⁸ Pele Loti wakati, “Peepe, ndakomba kutabi boobo, nobaalu bangu. ¹⁹ Lino amulange, mwandibeda aaluse, alimwi mwanditondezya bubotu butaambiki. Mwandifwida luzyalo lupati nimwafutula buumi bwangu. Pele kuzilundu kwalampisya kapati, nkaambo munzi wanyonyoonwa nketanasika kuzilundu inga ndilafwa. ²⁰ Sena tamuubwene munzi uulya? Ulaafwiifwi, inga ndakonzya kusika kulinguwo kufwambaana. Amundizumizye kuti ndiye kunko, munzi muniini buyo, nkabela buumi bwangu inga bwakonzya kufutuka.”

²¹ Mungelo wakati kuli Loti, “Mbubo, nduuzumina muzeezo ooyo, nsikoounyonyoona munzi uuya. ²² Kofwambaana! Taakwe nceticite mane ukasike kumunzi uulya. Akaambo kaako Loti wakaulika munzi ooyo kuti Zowaa, nkokuti munzi muniini.”

Kunyonyoonwa kwaminzi ya Sodomu a Gomola

²³ Loti wakasika kumunzi wa Zowaa acipaswido cazuba. ²⁴ Mpoonya aawo Mwami Leza wakawisya mulilo wasulufa aminzi ya Sodomu a Gomola. ²⁵ Mbombuboobu Mwami Leza mbwaakanyonyoona minzi eeyo kubikkilizya akkuti lyoonse. Wakabajaya bantu boonse bakali muminzi eeyo azintu zyoonse zyakali kukomena mucisi eeco. ²⁶ Kabaciya muka Loti wakacebuka, mpoonya wakasanduka cuulu camunyo.

²⁷ Lino kubucedo cifumo-fumo, Abulahamu wakafwambaanina kuya kubusena ooko nkwaakaimvwi kumbele lya Mwami Leza. ²⁸ Naakalanga kuminzi ya Sodomu a Gomola akkuti lyoonse, wakabona busi bwakali kusunta kuya mujulu, bwakali mbuli busi buzwa mubbibi lyamulilo pati. ²⁹ Pele Leza naakanyonyoona minzi yamukkuti mwaakali kukkala Loti wakaliyeeyede kukomba kwa Abulahamu, aboobo wakafutula Loti.

Matalikilo aa Bamowabu a Baamoni

³⁰ Lino akaambo kakuti Loti wakayoowa kukkala mu Zowaa, walo abana bakwe basimbi bobilo bakalonga akuunka muzilundu baakukkala mumpangala yabbwe. ³¹ Nkabela mwana mupati wakaambila muce wakwe kuti, “Taata wacembaala, alimwi taakwe mwaalumi uusyeede mucisi uukonzya kutukwata kuti tuzyale bana mbuli ciyanza canyika. ³² Aboobo atumunywisye kapati taata eelyo inga twakonzya kuswaangana anguwe, kutegwa tuzyale bana anguwe.” ³³ Masiku ngoonya aayo bakapa wisi waini, wakanywa. Nkabela mwana musimbi mupati wakoona awisi, pele wisi wakalikoledwe kapati, taakwe naakaziba cakacitika. ³⁴ Buzuba bwakatobela mwana musimbi mupati wakati kumuce wakwe, “Bona, mebo jilo masiku ndakaswaangana ataata, lino asunu tumukozye taata, kuti ayebo ucite mbuli mbwendakacita mebo, eelyo toonse tukazyale bana kuzwa kuli taata.” ³⁵ Aboobo masiku aayo bakamukozya alimwi, nkabela awalo mwanaakwe musimbi muniini wakoona awisi. Pele walo wisi wakalikoledwe alimwi cakuti taakwe naakaziba cakali kucitika. ³⁶ Mbombuboobu bana ba Loti basimbi bobilo mbubakamita kuli wisi. ³⁷ Mwana musimbi mupati wakazyala mwana mulombe, wakamuulika kuti Mowabu. Ngonguwe wakaba sikale wa Bamowabu boonse. ³⁸ Awalo mwana musimbi muniini wakazyala mwana mulombe, wakamuulika kuti Benami. Ngonguwe wakaba sikale wa Baamoni boonse.