Malaki 1

¹ Ngaaya majwi aa Mwami Leza ngaakaambila Baisilayeli kwiindila muli Malaki.

Mwami Leza mbwayanda Baisilayeli

² Mwami Leza wakati, “Ndamuyanda pele nywebo mulabuzya kuti, ‘Ino utuyanda buti?’” Mwami Leza ulati, “Sena Isau taakali ngomupati wa Jakobo? ³ Nikuba boobo ndakamusulaika. Cisi cakwe cazilundu cakaba cimpayuma, lukono lwakwe lwakaba busena bwabamwaaba bamunkanda.”

⁴ Kuti naa Baedomu baambe kuti, “Minzi yesu yakanyonyoonwa, nikuba boobo tuliiyakulula.” Mwami Leza uyooingula kuti, “Amubaleke bayakulule pele njooimwaya alimwi. Bantu bayoobaita kuti, ‘Cisi cibi,’ alimwi bayooti, ‘Musyobo ooyu Mwami Leza ngwanyemenede kwalyoonse alyoonse.’”

⁵ Nywebo Nobaisilayeli muyoolibonena eeci nobeni, eelyo muyooti, “Mwami Leza mmupati, cakuti ulaindilila noiba minyinza ya Baisilayeli.”

Mwami Leza mbwaakatapatila bapaizi

⁶ Mwami Leza Singuzuzyoonse ulati, “Mwana ulalemeka wisi, awalo mubelesi ulalemeka simalelo wakwe. Kuti naa nkendili uso, ino kulemekwa kwangu kuli kuli? Kuti naa nkendili simalelo wanu, ino tamundiyooweli nzi? Nywebo nobapaizi ndinywe musampaula zina lyangu. Pele mulabuzya kuti, ‘Ino twalisampaula buti zina lyako?’ ⁷ Mubikka zilyo zisofweede acipaililo cangu. Pele mubuzya kuti, ‘Ino twakusofwaazya buti? Tamundilemeki kwiindila mukuyeeya kuti tebule lya Mwami Leza lilisampukide.’” ⁸ Nomuleta banyama boofu kuti bapaizigwe, sena takuli kubisya? Nomupaizya banyama balema naa baciswa, sena takuli kubisya? Amukasoleke kubapa kumweendelezi wanu! Sena uyoomubotelwa? Sena uyoomutambula? Mbwaamba Mwami Leza Singuzuzyoonse.

⁹ Lino atukumbile Leza atubede aaluse. Lino akaambo kazipego zyanu zili boobu, sena inga wamutambula? Mbwaamba Mwami Leza Singuzuzyoonse. ¹⁰ Ndabula muntu akati kanu uunga wajala milyango yaŋanda ya Leza kutegwa kamutakunki mulilo wabuyo acipaililo cangu! Nsiboteledwe andinywe, alimwi taakwe zipaizyo zyanu nzendiyootambula, mbwaanda Mwami Leza. ¹¹ Zina lyangu liyoolemekwa akati kabantu kuzwa kuzwida zuba kuyoosika kumabbililo aalyo. Mumasena oonse kuyooletwa tununkilizyo azipaizyo zitambulika muzina lyangu, nkaako zina lyangu liyoolemekwa akati kabamasi, mbwaamba Mwami Leza Singuzuzyoonse. ¹² Pele nywebo mulalisofwaazya nomwaamba kuti, “Tebule lya Mwami Leza, lilisofweede, zilyo zyalyo, zilisampukide! ¹³ Alimwi mwaamba kuti, Zilakatazya, akuzisampaula, mbwaamba Mwami Leza Singuzuzyoonse. Nomuleta banyama mbomunyanga bantu, balema naa baciswa akubapa kuti babe bacipaizyo sena ndeelede kubatambula kuzwa kulindinywe?” Mbwaamba mwami Leza. ¹⁴ Mwami Leza Singuzuzyoonse ulati, “Asinganyizigwe mubeji ooyo uunga ulijisi munyama mweenze akati kabutanga bwakwe, wamana wakakonkezya kumupaizya, pele kwamana upaizya munyama uuli aakampenda ku Mwami Leza. Mebo ndendime Mwami mupati, zina lyangu lileelede kuyoowegwa akati kabamasi. Mbwaamba Mwami Leza.