Maako 9

¹ Jesu wakacili kwaamba kuti, “Ncombeni ndamwaambila kuti mpobali bamwi aano batakooyoofwa kabatanabona bwami bwa Leza kabusika anguzu.”

Ciwa ca Jesu mbucakasanduka

² Naakainda mazuba aali cisambomwe, Jesu wakatola Pita, Jemusi, Joni, batanta acilundu cilamfu. Basikwiiya aabo kabeebelede ciwa ca Jesu cakasanduka caba bumbi. ³ Zyakusama zyakwe zyakamweka zyakatuba buu. Taakwe muntu muno munyika uukonzya kuzitubya boobu pe. ⁴ Nkabela basikwiiya aaba bakabona Elija a Mozesi kabakanana a Jesu. ⁵ Pita wakaambila Jesu kuti, “Mufundisi, ncibotu kuti tuli aano. Tulayaka zilawo zyotatwe, cimwi cibe cako, cimwi ca Mozesi, cimwi ca Elija.” ⁶ Pele taakazi ncaakali kwaamba, nkaambo walo abeenzinyina bakaliyoowede.

⁷ Eelyo kwakalibonya kkumbi lyakasika akubavumbilila. Mukkumbi oomo mwakazwa jwi lyakati, “Ooyu ngo Mwanaangu ngwendiyandisisya, amumuswiilile!” ⁸ Basikwiiya nibakacebauka, taakwe aumbi ngobakabona, pele buyo Jesu alikke nguwakali aabo.

⁹ Lino nibakali kuya buseleluka kuzwa mucilundu, Jesu wakalailila basikwiiya aaba kuti, “Eezi nzimwabona mutakaambili muntu naba omwe pe mane kusikila Mwanaa Muntu akabuke kuzwa kubafu.”

¹⁰ Bakakuswiilila kulailila kwakwe, nikuba boobo bakacili kwaambauzyanya mulicabo kuti, “Ino ooku ‘Kubuka kuzwa kubafu’ caamba nzi?” ¹¹ Basikwiiya aaba bakabuzya Jesu, kuti, “Ino bamayi ba Mulawo baambila nzi kuti Elija nguuelede kusaanguna kuboola?”

¹² Mukubaingula wakati, “Ncobeni Elija nguuelede kusaanguna kuboola kuti abambe zintu zyoonse. Nikuba boobo, ino nkaambo nzi Malembe naaamba kuti Mwanaa Muntu uleelede kupenga kapati akukakwa? ¹³ Ncobeni ndamwaambila kuti Elija wakasika kale, alimwi bantu bakamucita mbuli mbubakayanda beni, mbubona mbuli Malembe mbwaamulungulula.”

Jesu mbwaakaponya sikasuntu

¹⁴ Nibakasika kuli basikwiiya bamwi, bakabona nkamu mpati yabantu, kwakali bamayi ba Mulawo bakali kukazyanya abasikwiiya. ¹⁵ Bantu bacimubona buyo Jesu, bakagambwa kapati, bakazuzaana kulinguwe akumujuzya. ¹⁶ Jesu wakababuzya basikwiiya bakwe kuti, “Ino mukazyanya nzi abantu aaba?”

¹⁷ Nkabela umwi mwaalumi wakali munkamu wakavwiila Jesu kuti, “O Mwiiyi, mebo ndaleta mwanaangu kulinduwe. Ooyu mulombe unjidwe muuya mubi nkaako takonzyi kwaambaula. ¹⁸ Coonse ciindi nuumusikila muuya mubi, ulamusuntusya, ulazwa kkovu kumulomo akuluma ntwino, inga mubili wakwe wayuma ntaa. Ndalibakumbide basikwiiya bako kuti bagwisye muuya mubi ooyu, pele bakakilwa.”

¹⁹ Jesu wakaingula kuti, “Kaka nywebo nobantu batasyomi! Ino ndikkale ciindi cilamfu cili buti andinywe? Mmupengele ciindi cilamfu cili buti? Amumulete kuno kuli ndime!” ²⁰ Eelyo bakamuleta kulinguwe.

Muuya ucibona buyo Jesu wakatalika kumuzengemya mulombe, mpoonya wakawa ansi akwaalabana, watalika kuzwa kkovu kumulomo. ²¹ Jesu wakabuzya wisi mwana kuti, “Ino eezi zyakamutalika lili?”

Wisi wakati, “Kuzwa naakacili mwana muniini. ²² Ziindi zinji muuya ooyu wali kusola kumujaya niwakali kumuwisizya mucikko, nimuba mumaanzi. Pele naa kuti kokonzya kucita cimwi cintu, akaka tubede aalubomba, tugwasye!”

²³ Jesu wakati, “Caamba nzi kwaamba kuti, ‘Kuti kokonzya?’ Nkaambo zintu zyoonse zilakonzeka kumuntu uusyoma Leza.” ²⁴ Mpoonya-mpoonya wisi mulombe wakapozomoka akuti, “Ndasyoma, ndigwasye nnzunde kutasyoma kwangu!”

²⁵ Jesu naakabona kuti bantu banji baya buswena aawo mpobakabede, wakakalalila muuya mubi kuti, “Yebo omuuya uutamvwisyi, uutaambyi, ndakulailila kuti uzwe mumulombe ooyu, utakanjili limbi mulinguwe!”

²⁶ Mpoonya muuya mubi wakakwiila, wakamuzengemya mulombe, eelyo wakazwa mulinguwe. Mulombe wakali kulangika mbuli kuti ulifwide, mane bantu boonse bakatalika kwaamba kuti “Wafwidilila!”

²⁷ Jesu wakajata mulombe kujanza akumubusya, wamwiimika.

²⁸ Lino Jesu naakanjila muŋanda, basikwiiya bakwe bakamubuzya kumbali bati, “Ino swebo twakacilwa buti kugwisya muuya mubi kuzwa mumulombe?”

²⁹ Jesu wakaingula kuti, “Pele kukomba kulikke nkokukonzya kugwisya muuya uuli mbuli ooyu.”

Jesu mbwaakaamba zyalufu lwakwe alimwi

³⁰ Jesu abasikwiiya bakwe nibakazwa ooko, bakainka akwiinda mucisi ca Galilii. Jesu taakwe naakayanda kuti muntu naba omwe azibe nkwaabede, ³¹ nkaambo wakali kwiisya basikwiiya bakwe kuti, “Mwanaa Muntu uyooabwa kubantu bayoomujaya, pele nikuba boobo mumazuba otatwe uyoobuka kuzwa kubafu.”

³² Balo taakwe nibakamvwisisya kwiisya ooku, pele bakayoowa kumubuzya.

Nguni mupati mubwami bwakujulu?

³³ Lino Jesu abasikwiiya bakasika kumunzi wa Kapenaumu, nibakanjila muŋanda, wakababuzya kuti, “Ino mwali kukazyanya nzi munzila?” ³⁴ Balo bakaumuna buyo, nkaambo kakuti munzila bakali kuyabukazyanya nkani yakuti ino mupati akati kesu nguni. ³⁵ Jesu wakakkala, nkabela wakaita basikwiiya bali kkumi ababili wakati kulimbabo, “Kufumbwa uuyanda kuba mutaanzi akati kanu uleelede kuba musyaalizi, alibikke munsi lyabeenzinyina, ababelekele boonse.” ³⁶ Mpoonya wakatola kana kamwi akukaimika akati kabo. Wakakakumbata akuti kulimbabo, ³⁷ “Kufumbwa uutambula umwi watwana mbuli aaka muzina lyangu utambula ndime, alimwi kufumbwa uunditambula, tatambuli ndime buyo pe, pele ulatambula ooyo wakandituma.”

Kufumbwa uutatukazyi nguwesu

³⁸ Joni wakati kuli Jesu, “O Mwiiyi, twakabona umwi muntu kagwisya myuuya mibi muzina lyako, pele twakamukasya, nkaambo taakali umwi wesu.”

³⁹ Jesu wakaingula kuti, “Mutamukasyi pe, nkaambo taakwe muntu uucita milimo yanguzu muzina lyangu uunga ulakonzya kundisandukila akundibisizya kufwambaana. ⁴⁰ Nkaambo kufumbwa uutali sinkondoma uli kulubazu lwesu. ⁴¹ Amuyeeye eeci! Kufumbwa muntu uumupa maanzi aakunywa akaambo kakuti muli bantu ba Munanike wa Leza, muntu ooyo uyootambula cileleko cakwe ncobeni.

Zilebyo

⁴² “Pele kufumbwa uulebya umwi wabaniini basyoma kuti babisye, inga cabota kuti aangililwe ziyo pati munsingo akubbizigwa mulwizi lulamfu. ⁴³ Nkaako kuti naa kuboko kwakulebya kuti ubisye, ukukosole! Nkaambo nkubotu kuti ukanjile mubuumi butamani koli cilema kwiinda kuwaalwa mubbibi lyamulilo uutamani kojisi maboko obilo. ⁴⁴ Mwalo ‘Omo mvunyu zyabo mozitafwi, alimwi mulilo muutazimi.’] ⁴⁵ Alimwi naa cituta cakuulu kwako cakulebya, ucikosole. Inga ncibotu kunjila mubuumi butamani koli cilema kwiinda kuwaalwa mubbibi lyamulilo uutamani kojisi zituta zyobilo. [ ⁴⁶ Mwalo ‘Omo mvunyu zyabo mozitafwi, alimwi mulilo muutazimi.’] ⁴⁷ Alimwi kuti naa liso lyako lyakulebya kuti ubisye, linonkole. Ncibotu kuti ukanjile mubwami bwa Leza acimbolyo, kwiinda kuti ukasowelwe mubbibi lyamulilo uutamani ameso obilo. ⁴⁸ Mwalo ‘Omo mvunyu zyabo mozitafwi, alimwi mulilo muutazimi.’

Zyakusunkwa

⁴⁹ “Nkaambo mbuli cilyo mbocilungwa munyo mbubonya oobo anywebo muyoobotezegwa amulilo wamapenzi! ⁵⁰ Munyo mubotu, pele kuti naa munyo wasampuka, ino inga ulakonzya buti kulunzigwa? Amube amunyo muli ndinywe lwanu, alimwi amukkale muluumuno abeenzinyoko.”