Maako 8

Jesu mbwaakasanina zyuulu zyone zyabantu

¹ Kaatanainda mazuba manji bantu banji-banji bakabunganina Jesu alimwi. Nibakabula cakulya, Jesu wakaliitila basikwiiya bakwe akubaambila kuti, ² “Bandeetezya bantu aaba nkaambo bali aandime kwamazuba otatwe, alimwi taakwe ancobalya. ³ Naa kuti ndabaleka kuya kuminzi yabo kabatalide, banooya bunetuka, nkaambo bamwi babo bazwa kule.”

⁴ Basikwiiya bakwe bakati, “Ino muno munkanda inga twazijana kuli zilyo zyakusanina bantu banji boobu?”

⁵ Jesu wakabuzya kuti, “Ino mujisi zinkwa zyongaye?” Bakati “Zili ciloba.”

⁶ Mpoonya Jesu wakaambila makamu aabantu kuti akkale ansi. Eelyo wakabweza zinkwa eezyo zili ciloba, walumba Leza, amane wakazikomona, wazipa basikwiiya bakwe kuti baabanye bantu, basikwiiya bakacita mbubonya mbuli mbubakalaililwa. ⁷ Alimwi bakalijisi tumwi tuswi tuniini, tuce buyo, atwalo naakamana kulumba, wakaambila basikwiiya bakwe kuti babaabanye atwalo. ⁸ Boonse bantu bakalya bakkuta. Kwakali bantu bakatisike kuzyuulu zyone. ⁹ Nkabela basikwiiya bakabwezelela bufwefwelenga bwakasyaala bantu nibakakkuta. Bakazuzya zisuwo zili ciloba. Jesu wakaambila bantu kuti bainke. ¹⁰ Mpoonya-mpoonya wakanjila mubwato abasikwiiya bakwe baya kucisi ca Dulamanuta.

Zyakwiisya kwakubeja kwa Bafalisi

¹¹ Bamwi Bafalisi bakasika kuli Jesu akutalika kukazyanya anguwe. Bakamukumbila cakumusunka, bakati abatondezye citondezyo cibonya kuti ulaanguzu zizwa kuli Leza. ¹² Jesu wakalisinsukila mumoyo wati, “Ino bantu bamazuba aano bayandila nzi zitondezyo? Ncobeni ndamwaambila kuti taakwe ncobaticitilwe pe.”

¹³ Mpoonya Jesu wakabasiya, wanjila mubwato wainka mutala lwizi.

Mimena ya Bafalisi aya mwami Helodi

¹⁴ Basikwiiya bakaluba kubweza zinkwa nibakanjila mubwato, bakajisi buyo cinkwa comwe. ¹⁵ Nkabela wakabacenjezya kuti, “Ncobeni, amucenjele amimena ya Bafalisi aya mwami Helodi.”

¹⁶ Balo bakatalika kulyaambauzya akati kabo akwaamba kuti, “Ncaambila boobu nkaambo wabona kuti tatujisi cakulya.”

¹⁷ Jesu wakalizi ncobakali kwaambaula, eelyo wakababuzya kuti, “Nkaambo nzi ncomwaambaula makani aakubula zinkwa? Sena ambuli sunu tamumvwisyi? Sena miyeeyo yanu icilelede? ¹⁸ Sena meso aanu taabonesyi? Amatwi aanu taamvwisyi na? Sena tamuyeeyi ¹⁹ kuti kuzwa muzinkwa zyosanwe ndakasanina bantu bali zyuulu zyosanwe? Kwakazula zisuwo zyabufwefwelenga zyongaye?” Bakaingula bakati, “Kkumi azibili.”

²⁰ ALimwi wakati, “Kuzwa kuzinkwa zili ciloba, ndakasanina bantu bali zyuulu zyone, ino mwakazuzya zisuwo zyongaye zyabufwefwelenga?” Bakaingula bati, “Nciloba.”

²¹ Mpoonya Jesu wakabaambila kuti, “Sena tamuna kumvwisisya?”

Jesu wakaponya muntu moofu ku Betesaida

²² Lino bakasika kumunzi wa Betesaida. Ooko bantu bamwi bakaleta muntu moofu kuli Jesu, bakamukumbila kuti amugume akumuponya muntu ooyo. ²³ Mpawo Jesu wakajata moofu ooyo kukuboko wamugwisizya kunze aamunzi. Mpoonya wakamuswida mate mumeso, amane wakamuvumbilila amaanza akumubuzya kuti, “Sena wakonzya kubona cimwi cintu?”

²⁴ Moofu naakabbamuna meso wakati, “Ndakonzya kubona bantu beendeenda, pele balangika mbuli misamu.”

²⁵ Mpoonya Jesu alimwi wakabikka maanza ameso aamoofu. Ciindi eeci moofu wakalangisya, mboni zyakwe zyakajaluka, wakakonzya kubonesya. ²⁶ Jesu wakamulailila kuti, “Koya kuŋanda yako, utajokeli mumunzi ooyu pe.”

Jesu ngo Munanike wa Leza

²⁷ Mpoonya Jesu abasikwiiya bakwe bakaya kuminzi yacisi caku Sizaliya Filipi. Munzila wakababuzya kuti, “Amundaambile, ino bantu bandaamba kuti ndime ni?”

²⁸ Balo bakati, “Bamwi bakwaamba kuti nduwe Joni Mubbapatizi, bamwi balati uli musinsimi Elija, alimwi bamwi balati uli umwi wabasinsimi.”

²⁹ Eelyo wakababuzya kuti, “Ino nywebo, mundaamba kuti ndime ni?” Pita wakaingula kuti, “Nduwe Kilisito, Munanike wa Leza.”

³⁰ Ndilyonya Jesu wakabalailila kuti, “Mutaambili muntu naba omwe zyandime.”

Jesu mbwaakaambilizya zyakupenga azyalufu lwakwe

³¹ Lino Jesu wakatalika kwiisya basikwiiya bakwe kuti, “Mwanaa Muntu uleelede kupenga mapenzi mapati, akukakwa abapati babantu, bapaizi basilutwe, abamayi ba Mulawo. Bayoomujaya, pele mubuzuba bwatatu uyoobuka.” ³² Makani aaya wakaaamba akwaasalazya kabotu kulimbabo. Amvwe boobo Pita wakatola Jesu kumbali, wakatalika kumukalalila. ³³ Jesu wakacebuka akulanga kuli basikwiiya bakwe, wakakalalila Pita kuti, “Kozwa aawa Saatani, nkaambo toyeeyi miyeeyo ya Leza, pele yabantu!”

Zyakuyumuna ciingano akutobela Jesu

³⁴ Nkabela wakaita nkamu yabantu antoomwe abasikwiiya bakwe kulinguwe. Wakabaambila wati, “Kuti naa muntu kayanda kunditobela aliimye, abweze ciingano cakwe, eelyo anditobele. ³⁵ Nkaambo kufumbwa uuyandisya buumi bwakwe, uyoobuswekelwa, nkabela ooyo uusweekelwa buumi bwakwe akaambo kandime aka Makani Mabotu, uyoobujana. ³⁶ Nkaambo nimpindu nzi njajana muntu wavuba nyika yoonse, kwamana wasweekelwa buumi bwakwe? ³⁷ Naa ncinzi muntu ncakonzya kupa kuti anunuzye buumi bwakwe? ³⁸ Nkaambo kaako kufumbwa uuusa nsoni akaambo kandime amakani aangu munyika eeyi iizwide bantu batasyomeki basunu, awalo Mwanaa Muntu uyoomukaka ciindi ncatikaboole mubulemu bwawisi antoomwe abangelo basalala.”