Maako 7

Tulengwa twabensiku

¹ Lino Bafalisi abamwi bamayi ba Mulawo bakazwa ku Jelusalemu bakabunganina Jesu. ² Nkaambo bakabona kuti bamwi basikwiiya bakwe bakali kulya kabatasambi maanza, tiibakasamba kweendelana acilengwa ca Bafalisi cakuyanda kuti bantu basalale.

³ Bafalisi a Bajuda boonse, batobela kwiisya kwabasikale. Tabalyi, ccita basamba maanza munzila yeelede, ⁴ alimwi tabakonzyi kulya cintu cuulwa mucisambalilo ccita mane balisalazye. Mpiili aimwi milawo yabasikale njibakali kutobela, mbuli yakusanzya nkomeki zibiya, mitiba yamukuba, akusalazya malo.

⁵ Lino Bafalisi abamayi ba Mulawo bakabuzya Jesu kuti, “Nkaambo nzi basikwiiya bako ncobasiya kwiisya kwabasikale? Nkaambo nzi tabasambi maanza ciindi ncobalya?”

⁶ Jesu wakabaingula kuti, “Ani Izaya wakaliluzi naakasinsima akaambo kanu! Nkaambo muli basikuupaupa ameso buyo, mbubonya mbokulembedwe kuti,

‘Aaba bantu balandilemeka amilomo yabo,

pele myoyo yabo ili kule andime.

⁷ Kundikomba kwabo nkwabuyo,

balaiisya njiisyo zyabantu

mbuli kuti nzizya Leza!’”

⁸ Alimwi Jesu wakati, “Milawo ya Leza mwiisowa, mwajatisya njiisyo zyabantu.”

⁹ Wakacili kwaamba wati, “Mulasusya milawo ya Leza kutegwa mubambe milawo yazilengwa zyanu. ¹⁰ Mozesi wakalailila kuti, ‘Lemeka uso abanyoko,’ ‘Kufumbwa ooyo uusampaula wisi nibaba banyina uleelede kufwa.’ ¹¹ Nywebo mwaamba kuti naa muntu waambila wisi nibaba banyina kuti, kufumbwa lugwasyo ndomutambula ngu ‘Koloboni’ (nkokuti cipegwa kuli Leza), ¹² mwazumizya muntu ooyo kuti katacigwasyi wisi abanyina. ¹³ Mukucita boobo mwaubausya majwi aa Leza anjiisyo zyanu. Alimwi nkozili zimwi zintu zinji zili boobu nzyomucita.”

Zintu zisofwaazya muntu

¹⁴ Jesu wakaita bantu banji kuti baze kuli nguwe, eelyo wakati, “Amuswiililisye kuli nceyanda kumwaambila. ¹⁵ Cinjila mumuntu tacimusofwaazyi pe. Pele nciceeco cizwa mulinguwe cimusofwaazya. ¹⁶ Ooyo uujisi matwi aakumvwisya amvwe.”

¹⁷ Lino Jesu naakasiya bantu, wakanjila muŋanda, mpoonya basikwiiya bakwe bakasika kumubuzya akaambo kacikozyanyo eeci. ¹⁸ Jesu wakaingula kuti, “Ani anywebo tamuna mvwisya? Taakwe cinjila mumuntu cinga cilamusofwaazya. ¹⁹ Kayi cinjila buyo mwida akuzwa, tacinjili mumoyo pe.” (Mukwaamba boobo Jesu wakacisalazya kuti zilyo zyoonse zilasalala.)

²⁰ Alimwi wakazwida ambele akuti, “Nceeciya cizwa mumuntu cimusofwaazya. ²¹ Nkaambo mukati kamuntu, mumoyo wakwe, momuzwa miyeeyo mibi iicita kuti muntu abbe ajaye, ²² acite bumambe, alikumbuzye, acite azisusi zibi zyoonse, bubeji, kantu-kantu, munyono, kutukila, kulisumpula abufuba-fuba. ²³ Zyoonse zintu zibi eezi zizwida mukati nzezisofwaazya muntu.”

Zyalusyomo lwamukaintu

²⁴ Lino Jesu naakazwa ooko, wakatozya kuzisi zya Taya a Sidoni. Wakakkala muŋanda imwi, pele taakali kuyanda kuti bantu bazibe. Nikuba boobo taakakonzya kulisisa, bantu bakaziba kuti mwali muŋanda.

²⁵ Nkabela mukaintu umwi, wakajisi mwana musimbi wakanjidwe muuya mubi naakamvwa kuti Jesu mwali muŋanda wakasika akuzoomufugamina. ²⁶ Mukaintu ooyu wakali muzwamasi, musyobo wakwe wakali Mufenisiya uuli mucisi ca Siliya. Wakakumbila Jesu kuti agwisye muuya mubi mumwanaakwe. ²⁷ Jesu wakamwaambila kuti, “Atusanine bana kusaanguna, nkaambo tacili cibotu kunyanga bana cilyo akuciwaala kubabwa.”

²⁸ Mukaintu wakaingula kuti, “Mwami, ncobeni abalo babwa balabwezelelela akulya tufwefwelenga tuloka-loka kuzwa atebule!”

²⁹ Mpawo Jesu wakaingula kuti, “Wavuwa kabotu, nkaambo kamajwi aako aaya koya kuŋanda yako, muuya mubi wazwa mumwanaako!” ³⁰ Nkabela mukaintu ooyo wakabweeda kuŋanda yakwe, waakujana mwana ulilede abulo. Muuya mubi wakalizwide kale mulinguwe.

Jesu mbwaakaponya sikamaama

³¹ Jesu naakapiluka kuzwa kucisi ca Taya, wakainda mumunzi wa Sidoni kuya kulwizi lwa Galilii, wainda akati ka Minzi iili kkumi. ³² Nkabela bamwi bantu bakamuletela sikamaama, musinkematwi, watakali kukonzya kwaambaula, bakakumbila Jesu kuti amusilike kwiindila mukubikka maanza aakwe alinguwe. ³³ Jesu wakamugwisya mubuleya, wamutola kumbali, wanjizya minwe yakwe mumatwi aamuntu ooyo. Wakaswida mate akuguma mulaka wakwe. ³⁴ Jesu wakalanga kujulu, walisinsukila akupozomoka wati, “Efata,” nkokuti, “Sinkuka!”

³⁵ Mpoonya matwi aamuntu ooyo akasinkuka, anenda yakamana, wakatalika kwaambaula kabotu. ³⁶ Lino Jesu wakabalailila aabo bakamweeta kuti, “Mutakaambili muntu uumbi makani aaya!” Pele balo bakamwaisya makani aaya. ³⁷ Nkabela boonse bakaamvwa bakaindilila kukankamana, bakati, “Amulange mbwazicita kabotu zintu zyoonse! Basinkematwi ulabasinkula alimwi abasyaataambi ulabaponya!”