Maako 2

Jesu mbwaakaponya muntu uuyuminide mubili

¹ Nikwakainda mazuba masyoonto, Jesu wakapiluka kumunzi wa Kapenaumu, mpuwo yakamwaika kuti wakasika kwabo. ² Bantu banji bakayoboloka ooko, ŋanda yakazula mane bamwi bakaata. Jesu wakabakambaukila Makani Mabotu. ³ Naakacili kwaambaula, kwakasika bantu bakamweetela muntu mulema, wakatembedwe abaalumi bone. ⁴ Akaambo kakuvula kwabantu, bakajana kuti cakali ciyumu kusika aafwiifwi a Jesu. Eelyo bakadonkola ciluli kululamika aawo aakakkede Jesu. Bakalengelezya macila aakalede mulwazi. ⁵ Jesu naakabona lusyomo lwabo, wakaambila yooyo wakali mulema kuti, “Mwanaangu, walekelelwa zinyonyoono zyako.”

⁶ Bamwi bamayi ba Mulawo bakaliwo aawo, bakatalika kulibuzya-buzya mumyoyo kuti, ⁷ “Nkaambo nzi muntu ooyu ncasampaula Leza boobu? Taakwe muntu buyo uukonzya kulekelela zinyoonyoono zyabantu ccita Leza alikke.” ⁸ Pele Jesu wakaziba ncibakali kuyeeya wakati, “Nkaambo nzi nomuyeeya zintu zili boobu? ⁹ Ncili citete, kwaamba kumuntu ooyu kuti ‘Walekelelwa zinyonyoono zyako,’ naa kwaamba kuti, ‘Nyamuka, ubweze macila aako enda?’ ¹⁰ Pele ono kuti muzibe kuti Mwanaa Muntu ulijisi nguzu munyika zyakulekelela zinyonyoono.” Jesu wakati kumwaalumi wakalemene ¹¹ kuti, “Nyamuka, bweza macila uye kuŋanda yako!”

¹² Bantu boonse kabalangilila wakabweza macila aakwe wakafwambaana wainka. Lino boonse bakakankamana balumbaizya Leza bati, “Tatuna cibwene cili boobu.”

Jesu mbwaakaita Levi

¹³ Jesu wakainka alimwi kunkomwe yalwizi lwa Galilii. Nkabela bantu banji bakamubunganina, mpawo wakatalika kubaiisya. ¹⁴ Naakali kuya bweenda, wakabona Levi simutelo, mwana wa Alufayusi, kakkede amulimo wakwe. Jesu wakamwaambila kuti, “Nditobele.” Eelyo Levi wakanyamuka akumutobela.

¹⁵ Nkabela Jesu abasikwiiya bakwe bakalya muŋanda ya Levi, antoomwe abasimutelo abatakali kubamba milawo ya Mozesi. Nkaambo bunji bwabo bakamutobela. ¹⁶ Lino bamwi bamayi ba Mulawo, bakali bankamu yaba Bafalisi, nibakabona kuti Jesu ulalya abantu aabo, bakabuzya basikwiiya bakwe bati, “Ino nkaambo nzi ncalidaamwi abali boobu?”

¹⁷ Jesu naakamvwa boobo, wakabavuwa kuti, “Teensi baabo baumi bayanda musilisi, ccita aabo baciswa. Mebo ndakazida aabo mbomuyeeya kuti mbaasizinyonyoono, tiindakazida aabo balulami pe.”

Mbubakabuzya zyakuliimya kulya

¹⁸ Ciindi cimwi basikwiiya ba Joni Mubbapatizi a Bafalisi bakali kuliimya kulya. Nkaako bantu bamwi bakasika kuli Jesu bakamubuzya bati, “Nkaambo nzi basikwiiya ba Joni Mubbapatizi aba Bafalisi balaliimya kulya kakuli basikwiiya bako tabaliimyi?”

¹⁹ Mukwiingula Jesu wakababuzya mubuzyo wakati, “Sena inga beenzinyina sibwiinga balakonzya kuliimya kulya kuti sibwiinga kacili ambabo? Pe, tabakonzyi! Sibwiinga nacili ambabo tabakonzyi kucita boobo. ²⁰ Peepe, nikuba boobo ciyoosika ciindi basinkondonyina nibayoomutola sibwiinga, ndendilyo beenzinyina nibayooliimya kulya mukuusa.

²¹ “Taakwe muntu uusuma cigamba cacisani citana fwinyana kucisani cakaindi, nkaambo kuti wacita oobo inga cigamba eeco cafwiinyana cilamonkola cisani cakaindi, eelyo ciyookomezya cimonko kwiindilila. ²² Alimwi taakwe muntu uunga watila waini mupya munkomo zyamakutu zyakabeleka kale pe. Nkaambo ulaandula nkomo eezyo. Mpoonya nkomo zilanyoonyooka, alimwi waini ulasoomokela ansi. Tee kayi waini mupya utilwa munkomo mpya!”

Makani aa Buzuba bwa Kulyookezya butegwa Sabata

²³ Bumwi Buzuba bwa Kulyookezya butegwa Sabata Jesu wakainda akati kamyuunda yamaila, abalo basikwiiya bakwe bakali anguwe. Mpawo basikwiiya bakatalika kupulula makunka aamaila balya. ²⁴ Nkaako Bafalisi bakati kuli Jesu, “Bona, tacizumizigwi a Mulawo kuti basikwiiya bako kabacita boobu mu Buzuba bwa Sabata!”

²⁵ Jesu wakati kulimbabo, “Sena tiimwakabala Devedi mbwaakacita ciindi walo abaabo mbaakalaabo nibakafwa nzala? ²⁶ Bakanjila muŋanda ya Leza bakalya cinkwa cacituulo kuli Leza. Eeci cakacitika ciindi Abiyata naakali ngomupaizi mupati. Lino kwiindila mu Mulawo wesu bapaizi balikke mbabazumizigwa kulya cinkwa eeci, pele Devedi wakacilya akucaabana abaabo mbaakalaabo.”

²⁷ Jesu wakabaambila kuti, “Buzuba bwa Sabata bwakaanzilwa kuti bumugwasye muntu, muntu taakalengelwa Buzuba bwa Sabata. ²⁸ Aboobo Mwanaa Muntu ngo Mwami wa Buzuba nibuba bwa Sabata.”