Maako 15
Jesu mbwaakabetekwa a Pilato
1 Bucica buyo cifumo-fumo, bapaizi basilutwe antoomwe abapati bacisi, bamayi ba Mulawo ankuta yoonse yabbetekelo bakaswaangana cakufwambaana kuti babambe nzila yalubeta. Jesu bakamwaanga anketani, bamutola baakumupa mumaanza aamweendelezi Pilato. 2 Pilato wakabuzya Jesu kuti, “Sena nduwe mwami wa Bajuda?” Jesu wakavwiila kuti, “Mbombubo oobo mbooamba.” 3 Bapaizi basilutwe bakatamikizya Jesu twaambo tunji. 4 Pilato wakamubuzya alimwi kuti, “Sena yebo tokwe ncoamba? Bona kuvula twaambo ntobakwaamba.”
5 Jesu wakaumwine buyo, kataambi niliba jwi lyomwe. Nkaako Pilato wakagambwa kapati.
Jesu mbwaakapegwa mulandu walufu
6 Kufumbwa ciindi ca Pobwe lya Kwiindilila Pilato wakali kwaangununa mwaange omwe kufumbwa ooyo bantu ngubakumbila. 7 Ciindi eeco kwakali mwaalumi uutegwa Balabbasi, wakali muntolongo antoomwe abafumpi bakajaide bantu bamwi mumanyongwe. 8 Nkamu yabantu banji niyakabungana akutalika kubuzya Pilato kuti abakondelezye mbuli mbwaakazibide kubacitila mwaka amwaka aciindi eeco, 9 Pilato wakababuzya kuti, “Sena muyanda kuti ndimwaangunwide mwami wa Bajuda ooyu?” 10 Nkaambo wakalizi kabotu kuti bapaizi basilutwe bakapede Jesu mumaanza aakwe akaambo kamunyono.
11 Pele bapaizi basilutwe bakasungilizya nkamu yabantu kuti bakumbile Pilato kuti abaangunwide Balabbasi mubusena bwa Jesu. 12 Pilato alimwi wakaambila bankamu kuti, “Ino muyanda kuti ndimucite buti ooyu ngomwiita kuti mwami wa Bajuda?”
13 Bakoongolola bati, “Akankaminwe aciingano.”
14 Mpoonya Pilato wakababuzya wati, “Ino kayi mbubi mbwaacita?” Bakoongololesya kabati, “Akankaminwe aciingano.”
15 Pilato mbwaakayanda kukondelezya bantu, wakabaangunwida Balabbasi. Naakamana kukwabbauzya Jesu wakamwaaba kuti akankaminwe aciingano.
Basilumamba mbubakamucita cisesyo Jesu
16 Basilumamba bakanjizya Jesu mulubuwa lwaŋanda yamweendelezi, bakaita basilumambanyina boonse bakali kooko. 17 Bakasamika Jesu jansi lyamusyobo wacisombo, bakaluka musini wamamvwa akuubikka alinguwe. 18 Bakatalika kumusabwida bati, “Wabonwa O Mwami wa Bajuda.” 19 Alimwi bakamuuma amutwe acisamu, bamuswida mate, bamuvuntamina akumukotamina. 20 Bamane kumusabwida boobu, bakamusamununa jansi eelyo akumusamika zisani zyakwe mwini. Mpoonya bakamutola kuti bakamukankamine aciingano.
Jesu mbwaakakankaminwa aciingano
21 Munzila bakaswaana mwaalumi wakali kutegwa Saimoni, wakali kuya mumunzi ooyo kuzwida musokwe, bakamusungilizya kuyumuna ciingano ca Jesu. Mulombwana ooyu ngu Saimoni uuzwa kumunzi wa Sailini wakali kuya mu Jelusalemu, ngowisi Alekizandaa a Lufusi. 22 Bakasisya Jesu kubusena butegwa Gologota, nkokuti, “Busena Bwakapapa Kamutwe.” 23 Ooko bakasola kumupa waini uuvweledwe ndulwe, Jesu wakakaka kuunywa. 24 Bakamukankamina aciingano, batalika kwaabana zisani zyakwe akati kabo, bakauma cisolo kuti bazibe uutitole cisani cimwi acimwi. 25 Cakali ciindi cacikasaalizi nibakamukankamina aciingano. 26 Atala aamutwe wakwe bakalemba majwi atondezya ncibakamujaila aakuti, “Ngooyu Mwami wa Bajuda.” 27 Alimwi kwakali azimbi ziingano zyobilo aakabambwidwe bafumpi bobilo, umwi kululyo umwi kulumwensi lwa Jesu. [ 28 Mbombubo oobu mbucakaba cakasimpe cilembedwe mu Malembe kuti, “Wakabalilizigwa abasizibi.”
29 Bantu bakali kwiinda aawo bakali kugunya-gunya mitwe, baamba bati, “Ehee! Wali kuti ulakonzya kumwaya ŋanda ya Leza akwiiyakulula mumazuba otatwe. 30 Nkooko kolifutula lwako omwini, useluke aciingano.”
31 Bapaizi basilutwe abamayi ba Mulawo bakaseka Jesu, bakaambilana muli cabo kuti, “Wakali kufutula bamwi, pele takonzyi kulifutula. 32 Atumubone ooyo Munanike wa Leza, mwami wa Isilayeli, aaseluke aciingano ono, nitutimusyome.”
Abalo baalumi bakabambwidwe bakasabwida Jesu.
Jesu mbwaakafwa
33 Nilyasika aacilungu-lungu, kwakaba mudima uusiya mbi munyika yoonse kusikila aacilangankumo. 34 Naakamana maola otatwe Jesu wakoongolola ajwi pati wati, “Eloi, Eloi, lama sabakatani?” Caamba kuti, “Leza wangu, Leza wangu wandisiila nzi?”
35 Bamwi babo bakaimvwi munsi-munsi, bakati, “Amuswiilile, wiita Elija!” 36 Umwi wabo wakazuza wabweza nsinsa, wanyika mundulwe, waitunga kukasako kalamfu, wazuzila kuli Jesu akuyoomusyonka kumulomo wati, “Atulindile tubone naa Elija ulasika kuzoomuselusya aciingano.”
37 Jesu wakoongololesya, mpoonya wafwa.
38 Mpoonya-mpoonya cisitilizyo camuŋanda ya Leza cakayauka muzibeela zyobilo, kuzwa ajulu do ansi. 39 Mpawo umwi silumamba mupati wakaimvwi aafwiifwi aciingano wakabona Jesu mbuli mbwaakoongolola akufwa, wakati, “Ncobeni ooyu muntu wali Mwanaa Leza.”
40 Kwakali bamwi bakaintu bakali kulangilide alaale. Akati kabo kwakali Maliya waku Magadala, Maliya banyina Jemusi muniini a Jose a Salomi. 41 Aaba bakali kutobela akugwasya Jesu naakacili mucisi ca Galilii. Alimwi bakaliwo abamwi bakaintu bakaboola ku Jelusalemu antoomwe a Jesu.
Kuzikkwa kwa Jesu
42 Josefa uuzwa kumunzi waku Alimatiya naakasika zuba lyakali aafwiifwi kubbila. 43 Josefa wakali silubeta uulemekwa mucibetekelo cipati ca Bajuda. Muntu ooyu wakali kulangila kuboola kwabwami bwa Leza. Nikuba kuti bwakali buzuba bwakulibambila Buzuba bwa Kulyookezya butegwa Sabata, Josefa wakayumya moyo, wakainka kuyooima kumbele lyamweendelezi Pilato, wakakumbila mutumba wa Jesu. 44 Pilato wakagambwa kumvwa kuti Jesu wakafwide kale. Wakaita silumamba akumubuzya kuti naa Jesu wakafwide ciindi cilamfu buti. 45 Naakamvwa kwaamba kwasilumamba, Pilato wakaambila Josefa kuti ulakonzya kuyoougwisya mutumba. 46 Josefa wakaula mulembo uutuba, waangula mubili wauputaila mumulembo akuyooulazika mucuumbwe cakasidwe kwiindila mukukolola mwaala. Wakakunkulisya bbwe pati ndyaakajazya amulyango wacuumbwe. 47 Maliya waku Magadala a Maliya banyina Jose bakali kweebelela akubona mwaakalazikwa Jesu.