Maako 14
Mbobakakanza kujaya Jesu
1 Kwakasyeede mazuba obilo kalitanasika Pobwe lya Kwiindilila apobwe lya Cinkwa Citakwe Mimena. Bapaizi basilutwe abamayi ba Mulawo bakali kuyandaula nzila yakujata Jesu cakusisikizya kuti bamujaye. 2 Bakaamba kuti, “Tutazoomujati ciindi capobwe, nkaambo ambweni kuzooba lupyopyongano akati kabantu, alimwi bazootulwana.”
Jesu mbwaakananikwa mafuta
3 Naakali kumunzi wa Betani muŋanda ya Saimoni uutegwa sicinsenda, kacilya kwakasika mukaintu, wakajisi nsazi yabbwe, iizwide amafuta aanunkilila kabotu, alimwi aadula, aakabambwa ansende iinunkilila kabotu. Wakakompola nsazi akutila mafuta aayo aamutwe wa Jesu. 4 Pele kwakali bamwi bantu bakanyema, batongooka akuti, “Ino kayi anyonyweedwa nzi mafuta? 5 Nkaambo naauzigwa amali aainda myaanda yotatwe kaapegwa kubacete.” Aboobo bakakalalila mukaintu ooyo. 6 Pele Jesu wakati, “Ino mumupenzezya nzi? Amumuleke wandicitila cintu cibotu. 7 Kayi lyoonse bacete muli kuli ambabo, pele tamunooli andime lyoonse pe. Pele mebo nsinooli anywebo lyoonse. 8 Mukaintu ooyu wacita mbuli mbwakonzya, wananika kale mubili wangu ansende kuubambilila kuti ukazikkwe kabotu. 9 Ncobeni ndamwaambila kuti koonse ooko nkwaayookambaukwa Makani Mabotu munyika yoonse, mane aceeci ncaacita mukaintu ooyu ciyooambwa kutegwa kabayoomuyeeyela mpawo.”
Judasi mbwaakaaba Jesu
10 Mpoonya Judasi Isikaliyoti, wakali ngoumwi wabali kkumi ababili, wakainka kubapaizi basilutwe kuti akaabe Jesu kulimbabo. 11 Bakabotelwa kapati kumvwa makani aa Judasi, alimwi bakamusyomezya kuti bayoomupa mali. Judasi wakatalika kuyandaula ciindi cibotu cakwaaba Jesu.
Jesu mbwaakalya Pobwe lya Kwiindilila abasikwiiya bakwe
12 Mubuzuba butaanzi bwapobwe lya Cinkwa Citakwe Mimena, buli mbobuzuba bwakali kujaigwa tubelele twakulisya Pobwe lya Kwiindilila, basikwiiya ba Jesu bakamubuzya kuti, “Nkukuli nkoyanda kuti tukakubambile Pobwe lya Kwiindilila?”
13 Jesu wakatuma basikwiiya bakwe bobilo, wakabalailila kuti, “Kamuya mumunzi, muyooswaana mwaalumi uuyumwide nongo yamaanzi. 14 Mukamutobele, kufumbwa muŋanda mwati kanjile mukati kuli mukamwini ŋanda, ‘Mwiiyi wesu waamba kuti, ili kuli ŋanda yangu oomo mwetilide Pobwe lya Kwiindilila abasikwiiya bangu?’ 15 Mpoonya uyoomutondezya ŋanda mpati yamujulu iijisi zintu zyoonse ziyandika, oomo momweelede kutubambila.”
16 Basikwiiya bakainka kumunzi ooyo, baakujana zyoonse mbubonya mbuli mbwaakaambilide Jesu, mpawo bakabamba cilalilo ca Pobwe lya Kwiindilila.
17 Nikwakaba kumangolezya, Jesu wakasika abasikwiiya bali kkumi ababili. 18 Nibakasengela, Jesu wakati, “Ndamwaambila eeci, umwi wanu ulandaaba, umwi akati kanu uulya andime.”
19 Basikwiiya bakakopwa, aboobo bakatalika umwi aumwi kwaamba kuti, “Sena ndime, Mwami?”
20 Jesu wakavuwa kuti, “Nguumwi wanu nomuli kkumi ababili, nguwenya ngotusunsa aawe mumutiba omwe. 21 Mwanaa Muntu uyoofwa mbubonya mbuli mbokulembedwe anguwe. Pele akomena mapenzi aayooba kumuntu ooyo uutaabe Mwanaa Muntu! Nicakabota kuli nguwe naatakazyalwa!”
Mulalilo wa Mwami
22 Nibakali kulya, Jesu wakabweza cinkwa, wakalumba, wakacikomona akucipa kuli basikwiiya bakwe. Wakati, “Nkooko amutambule. Ooyu ngomubili wangu.”
23 Amane wakabweza nkomeki, nkabela naakamana kulumba Leza, wakiipa kuli mbabo bakanywa, 24 Jesu wakati, “Oobu mbulowa bwangu bwacizuminano, bwatililwa banji. 25 Kwaambisya, ndamwaambila kuti nsiciyoonywi limbi musinza wansaansa mane do kubuzuba mbwentikanywe musinza mupya mubwami bwa Leza.”
26 Nibakamana kwiimba lwiimbo, bakainka kucilundu camisamu ya Oliva.
Jesu mbwaakaamba kuti Pita uyoomutama
27 Jesu wakati kulimbabo, “Nywebo nyoonse mulatyompwa akundisiya, nkaambo malembe alati, ‘Nzoouma mweembezi nkabela mbelele ziyoomwaika.’ 28 Pele ndaakubusigwa kuzwa kubafu njoomusaangunina kuya ku Galilii.”
29 Pita wakavuwa kuti, “Mebo nsikooyookusiya, nikuba kuti boonse bakakusiye.”
30 Jesu wakaambila Pita kuti, “Uciyeeye eeci. Sunu masiku mukombwe katanalila lwabili, unooli waamba kale ziindi zyotatwe kuti tondizi pe.”
31 Pita wakavuwa cakusinizya wati, “Nikuba kuti ndifwe anduwe nsikookutama.”
Alimwi abalo basikwiiya bamwi boonse bakaamba mbubonya.
Jesu mbwaakakomba mumuunda wa Getesemani
32 Bakasika kubusena butegwa Getesemani, Jesu wakati kuli basikwiiya bakwe, “Amukkale aano, nenciyookomba.”
33 Wakatolelezya Pita, Jemusi a Joni, aawo wakatalika kuba aamapenzi mapati mumoyo. 34 Nkaako wakati kulimbabo, “Moyo wangu uluuside kapati abuusu bwalufu. Amusyaale aano, mulangile.”
35 Jesu wakaindilila kaniini, wavuntama ansi wakomba, wakumbila kuti, naa kacikonzeka mapenzi mapati aaya atamusikili. 36 Wakakomba wati, “Abba. Taata! Zyoonse zintu zilakonzeka kulinduwe. Ndigwisizya nkomeki yamapenzi eeyi. Pele kutabi mbuli mbweyanda, akube mbuli kuyanda kwako omwini.”
37 Naakapiluka, wakajana kuti basikwiiya botatwe aabo baloona, eelyo wakati kuli Pita, “Saimoni, uloona na? Sena wakacilwa kulanga muciindi eeci ciniini buyo?” 38 Wakati kulimbabo, “Amulangile akukomba kuti mutanjili mumasunko. Moyo ncobeni ulayandisya pele mubili wabula nguzu.”
39 Mpoonya wakabweeda lwabili kuyookomba, kaamba majwi ngoonya ngaakaambide lutaanzi. 40 Amane, wakasika kuli basikwiiya, wabajana baloona, nkaambo bakafwide ŋonzi kapati. Mpoonya bakabula acakwaamba kulinguwe.
41 Jesu naakapiluka lwatatu kulimbabo wakati, “Sena mucoona akulyookezya? Mbubo! Ciindi casika lino! Amubone, nciconya ciindi eecino Mwanaa Muntu wapegwa mumaanza aabasizibi. 42 Amunyamuke, tweende! Ngooyu sikundaaba ulaafwiifwi.”
Jesu mbwaakajatwa
43 Jesu naakacili kwaambaula, awalo Judasi, wakali umwi wabali kkumi ababili, wakasika antoomwe ankamu yabantu yakayumwide mapanga ankoli. Nkamu eeyi yakatumidwe aabapaizi basilutwe, bamayi ba Mulawo, alimwi abapati bacisi. 44 Lino sikumwaaba wakabapede citondezyo cakuti, “Ooyo ngwenjoomyonta, ngonguwe mukamujate. Mumutole, akuyoomubambisya.”
45 Judasi mbwaakasikila buyo, wakaindilila kuli Jesu wati, “Mufundisi.” Mpoonya wakamumyonta. 46 Aboobo bakajata Jesu, bamwaanga. 47 Umwi wabaabo bakaimvwi munsi wakasomona panga lyakwe, wakakwezula kutwi kwamuzike wamupaizi mupati. 48 Mpoonya Jesu wakaambila nkamu eeyi kuti, “Nkaambi nzi mwazikundijata amapanga ankoli mbuli kuti ndimubbi? 49 Mazuba manji ndakali andinywe nindakali kwiisya muŋanda ya Leza, pele taakwe nimwakandijata. Pele eeci cacitika kut ikube mbuli mbokwaambwa mu Malembe.”
50 Mpoonya basikwiiya boonse bakamumwaika. 51 Umwi mulombwana wakasamine buyo mulembo, wakali kuya butobela Jesu. Nibakasoleka kumujata, 52 wakabasupuka, wakatija acinswe, wabasiila mulembo ngwaakasamide.
Jesu mbwaakatolwa kunkuta
53 Bakamutola Jesu kuŋanda yamupaizi mupati, ooko nkubakabungene bapaizi basilutwe, bapati bacisi, alimwi abamayi ba Mulawo. 54 Pita wakali kuya butobela munsi alaale, mane wakanjila mulubuwa lwaŋanda yamupaizi mupati. Wakakkala antoomwe abalindizi, watalika kuyota mulilo. 55 Bapaizi basilutwe abeendelezi bacibetekelo boonse bakasola kuti bajane twaambo twini twakuti Jesu bamupe mulandu walufu, Jesu, bakatubula. 56 Kwakali bakamboni banji bakamutamikizya twaambo, pele kwaamba kwabo tiikwakeendelana pe.
57 Mpoonya aawo bamwi baalumi bakaima akwaamba makani aakubejelezya Jesu bati, 58 “Twakamumvwa muntu ooyu kaamba kuti, ‘Ndiyoomwaya ŋanda ya Leza eeyi yakayakwa aamanza aabantu, kwaakumana mazuba otatwe ndiyooimika iimbi iitayakwi aabantu.’” 59 Aaba abalo makani aabo taakeendelana pe.
60 Mupaizi mupati wakaima kumbele lyabo boonse, wabuzya Jesu kuti, “Sena unyina cakwaamba kumakani aaya ngobakwaamba?”
61 Jesu wakaumwine buyo, taakwe ajwi ndyaakaamba. Mpoonya mupaizi mupati wakamubuzya alimwi kuti, “Sena yebo nduwe Munanike, Mwanaa Leza Uulemekwa?”
62 Jesu wakaingula wati, “Ndendime nguwe, alimwi nyoonse muyoobona Mwanaa Muntu kakkazikidwe kululyo lwa Singuzuzyoonse, akuboola mumakumbi aakujulu.”
63 Mupaizi mupati wakazapula cisani cakwe mukunyema wati, “Takucikwe abumbi bumboni buciyandika! 64 Mwalimvwida nobeni mbwaasampaula Leza. Ino muyeeya buti?”
Boonse bakazumina kuti apegwe mulandu wakujaigwa.
65 Bamwi bakatalika kumuswida mate, bamuvumbilila kumeso akumuuma kabati, “Ziba, nguni wakuuma?” Abalo balindizi bakamutola akumuuma mbayi.
Pita mbwaakatama Jesu
66 Pita naakacikkede mulubuwa, kwakasika umwi wabasimbi babelesi bamupaizi mupati. 67 Musimbi ooyu naakabona Pita kayota wakamulangisisya akuti, “Ayebo wakali a Jesu waku Nazaleta.”
68 Pele Pita wakatama waamba kuti, “Nsizi pe, alimwi nsikonzyi akumvwa ancoamba.” Eelyo Pita wakazwa aawo, waswena kumbali aamulyango walukwakwa lwalubuwa. Nciconya eeco ciindi mukombwe wakalila.
69 Musimbi ooyo wakabona Pita aawo, kumane wakaambila aabo bakaimvwi mpawo wati, “Ooyo ngumwi wabo.” 70 Pita wakatama alimwi.
Nikwakainda kaindi kaniini, aabo bakaimvwi aawo bakaambila Pita bati, “Yebo tokonzyi kukazya kuti toli wabo, nkaambo uzwa kucisi ca Galilii ayebo.”
71 Mpoonya Pita wakatalika kukonkezya kuti, “Leza andisubule kuti nkeli ndabeja. Nsimwizi abuniini muntu ngomwaamba.”
72 Mpoonya buyo aawo mukombwe wakalila lwabili, Pita wakaibaluka mbwaakamwaambilide Jesu naakati, “Mukombwe katanalila lwabili unoonditamide ziindi zyotatwe.” Nkabela wakatalika kulila.