Maako 12

Cikozyanyo cabasimuunda

¹ Ciindi eeco Jesu wakabaiisya muzikozyanyo. Wakati, “Kwakali muntu wakalima muunda wamisaansa akuuyakila lubaya, wakasya dindi lyakusinina nsaansa, akuyaka ngazi yasikulinda. Wakuupa kubalimi, eelyo wakaya kucisi cimbi. ² Ciindi cakutebula micelo yamusaansa nicakasika, wakatuma mubelesi kubalimi kuti atambule cipaanzi cakwe camicelo yamumuunda. ³ Balimi aabo mubelesi ooyo, bakamuuma akumutanda, akumupilusya cinkwamaanza. ⁴ Nkabela mukamwini muunda wakatuma uumbi mubelesi. Balimi bakamuuma waba aaluuma akumupenzya cakumuusya nsoni. ⁵ Alimwi wakatuma uumbi mubelesi, ooyo bakamujaya. Abamwi banji mbaakali kutuma bakali kucitwa mbubonya oobo, bamwi bakali kuumwa, bamwi bakali kujaigwa. ⁶ Kwakasyeede omwe buyo wakeelede kutumwa, ooyu mwanaa mukamwini muunda ngwaakali kuyandisya. Lino kumamanino wakamutuma mwanaakwe kubalimi. Wakaamba kuti, ‘Bayoolemeka mwanaangu!’ ⁷ Pele balimi bakaambilana kuti, ‘Ooyu ngosimulya zina. Amuboole tumujaye! Aawo muunda ulaba wesu!’ ⁸ Mpoonya bakamujata akumujaya, bakamusowela kunze aamuunda.”

⁹ Lino Jesu wakababuzya kuti, “Ino mukamwini muunda ulacita buti? Masimpe ulasika kuzoobajaya balimi aabo akupa muunda kubantu bambi. ¹⁰ Tee mwakabala Malembe aamba kuti:

‘Bbwe ndibakaka bayaki,

ndelyakaba bbwe liyandisi lyacooko.

¹¹ Mwami nguwakacitya eezi nkaako zilagambya kapati.’”

¹² Beendelezi ba Bajuda bakasoleka kujana nzila yakwaanga Jesu nkaambo bakalizi kuti wakali kusendekezya mbabo mucikozyanyo eeci. Pele bakayoowa bantu, aboobo bakamusiya bainka.

Makani aakutela

¹³ Bamwi Bafalisi abamwi beenzinyina mwami Helodi bakatumwa kuli Jesu kuti bamujate mukwaamba. ¹⁴ Bakasika kuli nguwe akuti, “O Mwiiyi, tulizi kuti uli muntu uululeme. Topenzegwi amakani aakuti naa bantu bakuyeeya buti, pele wiisya kabotu nzila yabwini ya Leza. Twaambile, sena cilwana Mulawo wesu kuti katutela mutelo ku Muleli Mupati waku Loma? Tuleelede kutela, naa pe?”

¹⁵ Jesu wakaziba luuni lwabo. Mpoonya wakababuzya kuti, “Nkaambo nzi ncomusola kundisunka? Amweete mali ndaabone.”

¹⁶ Eelyo bakaleta di lyomwe, mpoonya Jesu wakababuzya kuti, “Ino mutwe ooyu nguwani, azina lilembedwe mpawo ndilyani?” Bakati kulinguwe, “Nzya Muleli Mupati waku Loma.”

¹⁷ Jesu wakaamba kuti, “Amupe ku Muleli Mupati waku Loma zintu zyakwe, alimwi amupe Leza zintu zya Leza.” Lino bakagambwa kapati akaambo kanguwe.

Makani aabubuke bwabafu

¹⁸ Lino munsi kwakamusikila Basaduki bamwi. Mbambabo aabo baamba kuti bantu tabakooyoobuka kuzwa kubafu. ¹⁹ Bakaamba kuti, “Mwiiyi, Mozesi wakatulembela mulawo ooyu wakuti, ‘Naa munyoko wafwa, wasiya mukaintu katakwe mwana, wamukowa uleelede kukwata mukamufu, kutegwa amuzyalile bana mufu.’ ²⁰ Cimwi ciindi kwakali babunyina bakali ciloba. Mupati wabo wakakwata mukaintu, pele wakafwa katakwe bana mbaakazyala. ²¹ Muzyalwanyina wakamutobela kuzyalwa wakakwata mukamufu, pele awalo wakafwa katakwe bana. Awatatu wakacita mbubonya oobo, ²² mane boonse bali ciloba bakacita mbubonya. Boonse bakakwata mukaintu ooyu akufwa kaatakwe bana. Kumamanino, mukaintu awalo wakafwa. ²³ Mubuzyo wesu ngooyu, boonse baakubusigwa kuzwa kubafu, ino mukaintu uyooba wani, nkaambo boonse bakali mukwete?”

²⁴ Jesu wakavuwa kuti, “Mulisweekede nkaambo tamuzi Malembe niziba nguzu zya Leza. ²⁵ Bantu baakubusigwa kuzwa kubafu mubuzuba oobo takucikwe cilengwa cakukwatana, pele banoopona mbuli mbobapona bangelo. ²⁶ Lino kumakani aakubusigwa kwabafu, sena tamunabala mubbuku ndyaakalemba Mozesi mpaakalemba akaambo kaciteyo cakali kuyaka? Leza wakaambila Mozesi kuti, ‘Ndime Leza wa Abulahamu, Leza wa Izaka, a Leza wa Jakobo.’ ²⁷ Ngu Leza wabaumi, tali Leza wabafu pe. Naa mbomuyeeya mumakani aaya, mulisweekede kapati.”

Mulawo mupati

²⁸ Ooko kwakali umwi mwiiyi wa Mulawo wakamvwa kubuzya kwabo. Wakabona kuti Jesu wakabaingula kabotu Basaduki, eelyo wakasika kulinguwe akumubuzya kuti, “Ino nguuli mulawo mupati kwiinda imwi yoonse?”

²⁹ Jesu wakati, “Ngooyu mulawo mupati, ‘Komvwa yebo Isilayeli! Mwami Leza wesu ngo Mwami alikke. ³⁰ Uleelede kuyanda Mwami Leza wako amoyo wako oonse, amuuya wako oonse, amiyeeyo yako yoonse, anguzu zyako zyoonse.’ ³¹ Aumwi mulawo mupati wabili ngooyu, ‘Uleelede kuyanda mweenzinyoko mbubonya mbuli mboliyanda omwini.’ Taakwe mulawo mupati kwiinda eeyi pe.”

³² Mwiiyi wa Mulawo wakati kuli Jesu, “Waamba kabotu, O Mwiiyi, cili kasimpe mbuli mbooamba kuti Mwami Leza alikke ngo Leza, taakwe baleza bamwi pele nguwe alikke. ³³ Eelyo muntu uleelede kuyanda Leza amoyo wakwe oonse, amiyeeyo yakwe yoonse, anguzu zyakwe zyoonse, alimwi uleelede kuyanda mweenzinyina mbuli mbwaliyanda mwini. Kuswiilila milawo eeyi yobilo nkubotu kapati kwiinda kuleta banyama kuti batentwe acipaililo akupa zipaizyo zimwi kuli Leza.”

³⁴ Jesu wakabona kuti mwiiyi ooyu wakavuwa camaanu, eelyo wakamwaambila kuti, “Toli kule abwami bwa Leza.”

Kuzwa kuciindi eeco taakwe muntu wakamubuzya mubuzyo alimwi.

Mubuzyo wamakani aa Munanike wa Leza

³⁵ Jesu naakali kwiisya muŋanda ya Leza wakabuzya kuti, “Bamayi ba Mulawo baamba buti kuti Kilisito uyoozwa kulunyungu lwamwami Devedi? ³⁶ Devedi walo naakanjidwe Muuya Uusalala wa Leza wakaamba kuti,

‘Mwami Leza wakati ku mwami wangu,

kkala kubbazu lyalulyo lwangu,

kusikila nkabikke basinkondonyoko kuti babe kunsi aamatende aako.’

³⁷ “Devedi mwini wakaamba kuti, ‘Mwami,’ ino inga ulaba buti mwanaakwe?”

Jesu mbwaakacenjezya akaambo kabamayi ba Mulawo

Babuleya bakatambula kwiisya kwa Jesu akubotelwa. ³⁸ Naakali kubaiisya wakaamba kuti, “Amucenjele abamayi ba Mulawo, aabo bayandisya kuya bweenda kabasamide zisani zilamfu, kujuzigwa cakulemekwa muzisambalilo, ³⁹ akukkala zyuuno zyabulemu muzikombelo, amumapobwe. ⁴⁰ Bacenga bamukabafu akubanyanga mbono zyabo, alimwi bayanda kubonwa abantu kwiindila mukukomba kwabo kulamfu. Cisubulo cabo kuli Leza ciyooindilila kubija.”

Cipo camukamufu

⁴¹ Jesu naakakkede muŋanda ya Leza kumbali aaciyobwedo camali, wakali kulangilide bantu kababikka mali. Bavubi banji bakali kubikka mali manji. ⁴² Mpawo umwi mukamufu mucete wakaboola akubikka tuli tobilo twamukuba. ⁴³ Mpoonya Jesu wakaita basikwiiya bakwe wati, “Ndamwaambila kuti mukamufu ooyu mucete wapa kunji kwiinda boonse babikka muciyobwedo. ⁴⁴ Nkaambo bamwi babikka tuniini buyo kuzwa kubuvubi bwabo bunji, pele walo mubucete wabikka zyoonse nzyajisi, taakwe ncaasyaazya muŋanda yakwe.”