Maako 11

Jesu mbwaakanjila mu Jelusalemu

¹ Lino nibakaswena aafwiifwi a Jelusalemu, bakasika kuminzi ya Betefage a Betani, bakasika kucilundu camisamu ya oliva. Jesu wakatuma basikwiiya bobilo. ² Wakabalailila kuti, “Kamuya kumunzi uulya ngomubwene. Mwaakunjila buyo, muyoojana mwanaa mbongolo uutanatantidwe muntu, ulisungidwe. Mukamwaangunune akumeleta. ³ Kwaakuba muntu uuti kamubuzye kuti ‘Ino mucitila nzi oobu?’ Mukaingule kuti, ‘Mwami ulamuyanda, alimwi ulamupilusya onoono.’”

⁴ Eelyo bakainka kumunzi ooko, baakujana mwanaa mbongolo ulaangidwe anze, kumbali aamulyango waŋanda munsi aanzila. Nibakasika bakamwaangununa. ⁵ Eelyo bamwi bantu bakaimvwi ambali bakababuzya kuti, “A! Mucita nzi, mwaangununa mwanaa mbongolo?”

⁶ Bakabaambila mbubonya mbuli mbwaakabalailila Jesu. Aboobo bakabazumizya. ⁷ Nkabela bakaleta mwanaa mbongolo kuli Jesu, mpoonya babikka majansi aabo alinguwe, Jesu wakatanta. ⁸ Bantu banji bakayala majansi aabo mumugwagwa, alimwi bakakwapula tusanzu twazisamu akutuyala munzila. ⁹ Bantu bakali kweenda kumbele abaabo bakali kumutobela, bakatalika koongolola akulumbaizya Leza bati, “Leza aalumbaizigwe! Ulilelekedwe ooyo uuboola muzina lya Mwami Leza. ¹⁰ Leza aleleke bwami buboola bwataata Devedi sikale wesu! Alumbwe Leza kujulu!”

¹¹ Jesu naakanjila mu Jelusalemu, wakainka akuyoonjila muŋanda ya Leza, wakalanga-langa zintu zyoonse. Pele nkaambo kakuti kwakalisiide kale, wakazwa akuunka kumunzi muniini wa Betani antoomwe abasikwiiya bali kkumi ababili.

Makani aamukuyu

¹² Nibwakaca, bakazwa ku Betani, Jesu wakafwa nzala. ¹³ Wakabona mukuyu aalaale wakavwevwede matu manji, nkabela wakainka kuti akabone naa kuli nkuyu. Pele naakasika munsi, wakajana taakwe nkuyu, matu buyo, nkaambo ciindi cankuyu tiicakanasika. ¹⁴ Jesu wakasinganya mukuyu ooyo akuti, “Kutakabi muntu uulya nkuyu kuzwa kulinduwe.”

Abalo basikwiiya bakwe bakamumvwa naakaamba oobo.

Jesu mbwaakatanda basimakwebo

¹⁵ Nibakanjila mu Jelusalemu, Jesu wakaya kuŋanda ya Leza, watanda bantu boonse bakali kuuzya akuula oomo, wakatingamuna matebule aabasikucincana mali, azyuuno zyabaabo bakali kuuzya nkwilimba. ¹⁶ Alimwi taakwe naakazumizya muntu naba omwe kuti ainde kayumwide cintu mulubuwa lwaŋanda ya Leza. ¹⁷ Amane wakaiisya bantu kuti, “Mumalembe kulembedwe kuti Leza wakati, ‘Ŋanda yangu iyooitwa kuti niŋanda yakukombela kwabantu boonse.’ Pele nywebo mwiicita ciyubilo cababbi!”

¹⁸ Bapaizi basilutwe abamayi ba Mulawo bakacimvwa cakacitika, aboobo bakatalika kuyandaula nzila yakujaya Jesu. Pele bakali kuyoowa, nkaambo nkamu yoonse yabantu yakali kukankamana kukwiisya kwakwe.

¹⁹ Kumangolezya Jesu abasikwiiya bakwe bakazwa mu Jelusalemu.

Ciiyo cijatikizya mukuyu wakayuma

²⁰ Nibwakaca cifumo-fumo, kabaya bweenda munzila, bakabona kuti mukuyu ngwaakasinganya uliyumide cwaa kusikila kumiyanda. ²¹ Pita wakaibaluka cakacitika, nkabela wakati kuli Jesu, “Kolanga Mufundisi, mukuyu uulya ngookasinganya wayuma ntaa!”

²² Jesu wakabavwiila kuti, “Amuyeeye eeci! Kuti naa kamusyoma muli Leza, ²³ inga mulakonzya kwaambila cilundu eeci kuti, ‘zyuka awo mpobede, uliwaale mulwizi.’ Kuti kamutazumbauzyi mumyoyo yanu, pele kamusyoma amoyo oonse kuti eeco ncomwaamba cilacitika, nkasimpe inga cilacitika. ²⁴ Nkaako ndamwaambila kuti ciindi ncimukomba kuli Leza akukumbila cintu, amusyome kuti mulicitambwide kale, zyoonse muyoozipegwa ncobeni. ²⁵ Alimwi lyoonse nomukomba, kamubalekelela boonse kufumbwa mbomuli aamulandu ambabo, mwacita boobo Uso uuli kujulu akamulekelele zibi zyanu. ²⁶ Nkaambo kuti nywebo tamubalekeleli bantu bali aamilandu kuli ndinywe, awalo Uso uuli kujulu takooyoomulekelela milandu yanu.”

Jesu mbwaakabuzigwa zyanguzu zyakwe

²⁷ Bakabweeda ku Jelusalemu. Jesu naakali kweendeenda muŋanda ya Leza, kwakasika bapaizi basilutwe abamayi ba Mulawo abapati ba Bajuda, ²⁸ bakamubuzya kuti, “Ino nguni uukucitya zintu eezi? Alimwi nguni uukupa bulelo bwakucita zintu boobu?”

²⁹ Jesu wakabavuwa kuti, “Ndilamubuzya buyo mubuzyo omwe. Mwandipandulwida, ambebo ndamwaambila wakandipa bulelo bwacita zintu eezi. ³⁰ Amundaambile, nguni wakatuma Joni kuti abbapatizye, ngu Leza naa mbantu? Amundaambile!” ³¹ Bakatalika kukazyanya muli cabo kuti, “Ino twaambe buti? Kuti naa twaamba kuti, ‘Leza nguwakumutuma’ ulaamba kuti, ‘Ino kayi mwakalekela nzi kumusyoma Joni?’ ³² Pele sena twaambe kuti, ‘Mbantu?’” Bakayoowa kwaamba oobo, nkaambo bantu boonse bakali kusyoma kuti Joni wakali musinsimi mwini. ³³ Bakamuvuwa Jesu kuti, “Tatuzi.” Jesu wakati kuli mbabo, “Nkokuti, ambebo nsikoomwaambila naa mbulelo nzi mbwecitya zintu eezi.”