Maako 10

Makani aakulekana

¹ Jesu wakazwa mumunzi wa Kapenaumu, wazubuka mulonga wa Jolodani akuya kucisi ca Judiya. Makamu aabantu akumubunganina, wakabaiisya mbubonya mbuli mbwaakali kucita lyoonse.

² Bamwi Bafalisi bakamuzida kuti bamusunke bakati, “Twaambile, sena muntu uleelede kuleka mukaintu wakwe kweendelana amulawo wesu?”

³ Jesu wakababuzya mubuzyo wakati, “Ino Mozesi wakamulailila buti?”

⁴ Bakati, “Mozesi wakazumizya mwaalumi kulembela mukaintu wakwe lugwalo lwakumuleka, mpoonya amuleke.”

⁵ Jesu wakati kulimbabo, “Nkaambo kabuzangi bwanu Mozesi ncaakamulailila boobo. ⁶ Pele kwakaambwa kuti, kumalengelo, ‘Leza wakalenga mwaalumi amukaintu. ⁷ Akaambo kaako mwaalumi uyoosiya wisi abanyina akukakatila mukaintu wakwe, ⁸ nkabela bobilo aaba balaba mubili omwe.’ Tabacili babili, pele baba omwe. ⁹ Aboobo aabo Leza mbaakaswaanganya kutabi muntu uubaandaanya.”

¹⁰ Nibakajokela kuŋanda, basikwiiya abalo bakabuzya Jesu makani aaya ngoonya. ¹¹ Wakabaambila kuti, “Kufumbwa ooyo uuleka mukaintu akukwata uumbi, ulaamulandu wabumambe kulinguwe. ¹² Munzila yeelene, mukaintu uuzwa kumulumaakwe akukwatwa mwaalumi uumbi, walalikwa.”

Jesu mbwaakaleleka bana

¹³ Bamwi bantu bakaleta bana babo kuli Jesu kuti abaampe maanza akubaleleka, pele basikwiiya bakwe bakalikulesya bantu aabo. ¹⁴ Jesu naakabona boobo, wakanyemena basikwiiya bakwe wabaambila kuti, “Amubaleke bana baze kulindime, mutabakasyi, nkaambo bwami bwa Leza mbubwabo bali boobu. ¹⁵ Ncobeni ndamwaambila kuti kufumbwa ooyo uutatambuli bwami bwa Leza mbuli mwana, takooyoonjila mulimbubo pe.” ¹⁶ Nkabela Jesu wakabakumbata bana wabaampa akubaleleka.

Mulombwana muvubi

¹⁷ Jesu mbwaakatalika buyo kweenda, kwakamuzuzaanina mulombwana umwi wakamuvuntamina akumubuzya kuti, “O Mwiiyi mubotu, ncintu nzi cibotu ncendeelede kucita kuti ndibe aa buumi butamani?”

¹⁸ Mpoonya Jesu wakati, “Undiitila nzi kuti ndimubotu? Taakwe muntu mubotu ccita Leza alikke. ¹⁹ Kayi ulizi milawo ya Leza yaamba kuti, ‘Utajayi, utaciti bumambe, utabbi, utabejelezyi, utacengi, lemeka uso abanyoko?’”

²⁰ Mulombwana ooyo wakaingula kuti, “O Mwiiyi kuzwa kubwana bwangu taakwe nuuba omwe wamilawo eeyi ngwindatakabamba.”

²¹ Jesu wakamulangisisya caluyando akumwaambila kuti, “Kwasyaala comwe. Koya ukauzye zyoonse nzyojisi, mali ngotikajane ukape bacete, eelyo uyoojana lubono kujulu, omana uzoonditobele.” ²² Amvwe buyo majwi aaya, wakatyompwa, wakainka kauside, nkaambo wakajisi lubono lunji.

²³ Jesu wakacebaukila basikwiiya bakwe akubaambila kuti, “Nciyumu kubantu bavubi kunjila mubwami bwa Leza!”

²⁴ Aaya makani akabagambya basikwiiya. Jesu wakabaambila alimwi kuti, “Beenzuma, nciyumu kunjila mubwami bwa Leza. ²⁵ Ncitete kunkamela kunjila mukapulo kanyeleti kwiinda mbocibede kumuvubi kuti anjile mubwami bwa Leza.”

²⁶ Basikwiiya bamvwe boobo bakayumwa mukanwa, bakabuzyanya kuti, “Mwati inga kuyooba uyoofutuka buya?”

²⁷ Jesu wakabalanga akubaambila kuti, “Kubantu eeci tacikonzeki pe, pele kuli Leza zintu zyoonse zilakonzeka.”

²⁸ Ndilyonya Pita wakati, “Kolanga, swebo twakasiya zyoonse twakutobela.”

²⁹ Jesu wakati kulimbabo, “Iiyi mbombubo, alimwi ndamwaambila kuti kufumbwa uuyoosiya ŋanda yakwe, nibaba bana bokwabo, nibaba bacizi, nibaba banyina, naba wisi, nibaba bana bakwe, niiba myuunda akaambo kandime aka Makani Mabotu, ³⁰ uyootambula zinji-zinji kuciindi eeco, myaanda-myaanda yamaanda, bamanyina, bana, myuunda, alimwi kuzwaawo mapenzi. Pele ciindi ciboola uyootambula buumi butamani. ³¹ Pele bataanzi banji bayoosyaalila limwi, pele basyaalizi bayooba mbabataanzi.”

Jesu mbwaakasinsima zyalufu lwakwe ciindi catatu

³² Nibakali kuya bweenda munzila iiya ku Jelusalemu, Jesu wakali kweenda kumbele lyabasikwiiya bakwe bakalibilikide. Abalo bantu bakabatobede munsi bakaliyoowede. Eelyo Jesu wakaita basikwiiya bakwe bali kkumi ababili kumbali akubaambila zintu ziyoocitika kulinguwe. ³³ Wakati, “Tuya ku Jelusalemu, ooko Mwanaa Muntu nkwayooabwa mumaanza aabapaizi basilutwe abamayi ba Mulawo. Balo bayoomupa mulandu walufu akumwaaba kuli bamasi. ³⁴ Bayoomunonga, kumuswida mate, kumukwabbaula akumujaya. Nkabela mumazuba otatwe uyoobuka kuzwa kubafu.”

Kukumbila kwa Jemusi a Joni

³⁵ Lino Jemusi a Joni, bana ba Zebedii, bakasika kuli Jesu. Bakati, “O Mwiiyi, kuli cintu ncotuyanda kuti utucitile.”

³⁶ Jesu wakababuzya, “Ino ncinzi ncomuyanda kuti ndimucitile?”

³⁷ Bakati, “Tuyanda kuti waakukkala acuuno cako cabulemu, ukatuzumizye kuyookkala umwi kululyo umwi kulumwensi lwako.”

³⁸ Mpawo Jesu wakabaambila kuti, “Tamuzi ncomukumbila. Sena mulakonzya kunywida munkomeki yamapenzi njenywida mebo? Sena inga mulakonzya kubbapatizigwa mumapenzi mbweyoobbapatizigwa mebo?”

³⁹ Bakamuvwiila kuti, “Tulakonzya.” Jesu wakabaambila kuti, “Ncobeni muyoonywa munkomeki njeyoonywida, alimwi muyoobbapatizigwa mbuli mbweyoobbapatizigwa mebo. ⁴⁰ Pele kukkala kubbazu lyangu lyalulyo antela kulumwensi lwangu teensi ndime eempa pe. Ngu Taata uuyoopa mabazu aaya kuli baabo mbaakasala.”

⁴¹ Lino basikwiiya aabo bamwi bali kkumi nibakamvwa makani aaya, bakanyemena Jemusi a Joni. ⁴² Mpoonya Jesu wakabaita boonse wakati, “Mulizi kuti bami babamasi balida aamitwe yabantu abalo beendelezi mbubonya. ⁴³ Pele kuli ndinywe takweelede kuba boobo pe. Kufumbwa uuyanda kuba mupati uleelede kuba mubelesi wanu. ⁴⁴ Kufumbwa uuyanda kuba mutaanzi, uleelede kuba mutwanga waboonse. ⁴⁵ Nkaambo Mwanaa Muntu taakwe naakazida kuzoobelekelwa, wakazida kuzoobelekela bamwi milimo akusanga buumi bwakwe kuti anunune bantu banji.”

Jesu mbwaakaponya Batimeyusi moofu

⁴⁶ Mpoonya bakasika kumunzi wa Jeliko. Jesu naakali kuzwa aawo antoomwe abasikwiiya bakwe abantu banji, mwaalumi umwi moofu, zina lyakwe Batimeyusi, nkokuti, mwanaa Timeyusi, wakalikkede kumbali aamugwagwa kakumbila. ⁴⁷ Naakamvwa kuti Jesu uuzwa ku Nazaleta nguuenda, wakatalika koongolola kuti, “Jesu, O Mwanaa Devedi, ndibeda aalweengelelo!”

⁴⁸ Nkabela bantu bakamukalalila, bakamwaambila kuti aumune. Pele walo wakoongololesya kwiinda, wakati, “Akaka, O Mwanaa Devedi, ndibeda aalweengelelo!”

⁴⁹ Mpoonya Jesu wakaima wati, “Amumwiite.” Lino bakamwiita. Bamwaambila kuti, “Botelwa! Nyamuka, koza ulakwiita.”

⁵⁰ Mpoonya wakasotoka, wasowa cibaki cakwe, wainka kuli Jesu.

⁵¹ Jesu wakamubuzya kuti, “Ino uyanda kuti ndikucitile nzi?” Moofu wakati, “O Mufundisi, ndiyanda kubona.” ⁵² Jesu wakamwaambila kuti, “Koya, lusyomo lwako lwakuponya.” Mpoonya-mpoonya wakakonzya kubona, eelyo wakatobela Jesu.