Maako 1
Kukambauka kwa Joni Mubbapatizi
1 Aaya nga Makani Mabotu aaamba zya Jesu Kilisito, Mwanaa Leza. 2 Akatalika mbuli mbwaakalemba musinsimi Izaya:
“Leza wati, ‘Ndatuma mutumwa wangu
kumbele lyako kuyookubambila nzila.’
3 Kuli waambilizya munkanda kuti,
‘Amubambe mugwagwa wa Mwami Leza!
Amululamike nzila yakwe kabotu!’”
4 Aboobo ncobeni Joni wakalibonya munkanda kabbapatizya bantu akukambauka kuti, “Amweempe kunzila zyanu zibi, mubbapatizigwe, kuti Leza amulekelele zinyonyoono zyanu.” 5 Nkabela bantu banji bamucisi ca Judiya amumunzi mupati wa Jelusalemu, bakainka kuyooswiilila nzyaakali kwaamba Joni. Eelyo nibakalyaamba zinyoonyono wakababbapatizya mumulonga wa Jolodani.
6 Joni Mubbapatizi ooyu wakali kusama cisani cakalukidwe aboya bwankamela, alutambo lwacikanda mucibuno. Cakulya cakwe cakali cikwikwi abuci. 7 Wakaambilizya kuti, “Uuboola musule lyangu ulilemenede kwiinda ndime cakuti mebo nseelede kukotama akwaangununa ndyasyo zyakwe. 8 Mebo ndimubbapatizya amaanzi, pele walo uyoomubbapatizya a Muuya Uusalala.”
Jesu mbwaakabbapatizigwa ambwaakatepaulwa
9 Kaatanainda mazuba manji Jesu wakasika kuzwida kumunzi wa Nazaleta, mucisi ca Galilii, mpoonya Joni wakamubbapatizya mumulonga wa Jolodani. 10 Jesu mbwaakazwa buyo mumaanzi, wakabona kuti julu lyajaluka a Muuya wa Leza kuuseluka alinguwe mbuli nkwilimba. 11 Eelyo jwi lyakamvwigwa kuzwa kujulu kaliti, “Nduwe Mwanaangu ngwenjandisya, alimwi ulandibotezya.”
12 Mpoonya-mpoonya Muuya Uusalala wa Leza wakamutola munkanda. 13 Oomo munkanda mwakali buyo banyama, Jesu mwaakakkala alikke mazuba aali makumi one. Eelyo Saatani, mucengi mupati, naakamana kumusunka, bangelo bakazoomukutaukila.
Jesu mbwaakaita basikuzuba bone
14 Nkabela Joni naakajatwa akubikkwa muntolongo, Jesu wakaya kucisi ca Galilii kuyookambauka Makani Mabotu aazwa kuli Leza. 15 Wakati, “Bwami bwa Leza buliswenede aafwiifwi! Aboobo amweempe zibi zyanu, musyome Makani Mabotu.”
16 Jesu naakali kuya bweenda ankomwe yalwizi lwa Galilii, wakajana baalumi bobilo, Saimoni amwanookwabo Andulu, kabazuba nswi.
17 Nkabela Jesu wakati kulimbabo, “Amunditobele, kuti nkamucite bazubi babantu.” 18 Mpoonya aawo bakasiya tunyandi twabo akumutobela.
19 Naakeendeenda kuya kumbele, wakabona bana ba Zebedii bobilo, ba Jemusi a Joni. Bakali mubwato, kabasuma-suma tunyandi twabo. 20 Ucibabona buyo wakabaita. Nkabela bakasiya Zebedii wisi abasimilimo bakwe mubwato, bakamutobela.
Muntu wakanjidwe muuya mubi
21 Jesu abasikwiiya bakwe bakasika kumunzi wa Kapenaumu, nkabela nibwakasika Buzuba bwa Kulyookezya butegwa Sabata, Jesu wakanjila mucikombelo ca Bajuda akutalika kwiisya bantu. 22 Bakakankamana kukwiisya kwakwe, nkaambo tiikwakali mbuli kwabamayi ba Mulawo, majwi aakwe akali kuyasa.
23 Mpoonya kwakanjila mucikombelo muntu umwi wakanjidwe muuya mubi, wakoompolola wati, 24 “Ino twakucita nzi yebo Jesu wa Nazaleta? Sena waboola kuzootunyonyoona? Ndilikuzi kuti nduwe Uusalala wa Leza!”
25 Mpoonya Jesu wakakalalila muuya mubi kati, “Umuna, kozwa mumuntu ooyu!”
26 Eelyo muuya mubi wakamusuntusya muntu ooyo. Wakoongolola ajwi pati, mpoonya wazwa mulinguwe. 27 Bantu bakagambwa kapati, bakatalika kubuzyanya kuti, “Ino ncinzi eeci? Nkwiisya kupya kuli buti ooku? Muntu ooyu ulaanguzu zyakukonzya kukalalila myuuya mibi alimwi ilacita ncaamba!”
28 Mpoonya-mpoonya mpuwo ya Jesu yakamwaika mucisi coonse ca Galilii.
Jesu mbwaakaponya bantu banji
29 Mbubakazwida buyo mucikombelo bakagama kuŋanda ya Saimoni a Andulu, abalo ba Jemusi a Joni bakainka aabo. 30 Lino mbwaakanjilila buyo, bakamwaambila kuti banyinazyala Saimoni baciswa mubili ulapya kapati. 31 Wakainka nkubakalede. Wakabajata janza akubabusya, mpoonya-mpoonya bakapona, bakatalika kubakutaukila.
32 Nikwakaba kumangolezya, bantu bamumunzi ooyo bakamuletela boonse bakali kuciswa malwazi aandeene-andeene abaabo bakanjidwe myuuya mibi. 33 Bantu boonse bamumunzi ooyo bakabungana amulyango waŋanda eeyo. 34 Jesu wakaponya bantu banji bakali kuciswa malwazi aandeene-andeene, akugwisya myuuya mibi minji. Taakali kwiizumizya myuuya mibi kwaambaula nkaambo kakuti yakalimuzi.
Jesu mbwaakakambauka mucisi ca Galilii
35 Nikwakaba kubucedo Jesu wakabuka wazwa. Wakasiya munzi wakaya kubusena buliibide kuyookomba. 36 Saimoni abeenzinyina nibakabona kuti tawo, bakainka kuyoomuyandaula. 37 Nibakamujana, bakati kulinguwe, “Bantu boonse bayandaula nduwe.”
38 Jesu wakabaingula kuti, “Tweelede kuunka kuminzi iimbi iituzingulukide. Ndileelede kuti nkakambaukile nkuko akwalo, nkaambo ncencico ncendakazida.”
39 Eelyo wakeendeenda mucisi coonse ca Galilii kuya bukambauka muzikombelo zya Bajuda akugwisya myuuya mibi.
Jesu mbwaakaponya sicinsenda
40 Lino kwakasika mwaalumi umwi kulinguwe, wakali kuciswa cinsenda. Wakamufugamina wamukumbila kuti amugwasye. Wakati, “Kuti koyanda, ulakonzya kundiponya.”
41 Mpoonya Jesu wakeetezegwa. Wakatandabika janza lyakwe akumuguma, wakamwaambila kuti, “Ndayanda, pona.” 42 Mpoonya sicinsenda wakaponyezegwa. 43 Nkabela Jesu wakamwaambilisisya canguzu, amane wakamuleka kuti ainke. 44 Wakati, “Swiilila, utaambili muntu naba omwe makani aaya, pele ukalitondezye kumupaizi, ukape cipaizyo mbuli mbwaakalailila Mozesi, kuti cikabe citondezyo kuli boonse kuti wapona ncobeni.”
45 Muntu ooyo wakainka uya bwaambilizya makani aaya, cakuti Jesu taakacili kukonzya kunjila muminzi antangalala. Pele wakali kukkala kulaale aminzi. Nikuba boobo bantu bakali kumuzida kuzwa kumabazu aandeene-andeene.